Read Bibliya Yera 1951 Zekariya 14 Bible Online

Zekariya 14 - Bibliya Yera 1951 bible

Zekariya 14

¹Eh’ umusi uraje, umusi w’ Uhoraho, aho bazogabanganira iminyago yawe hagati muri wewe.

²Kuko nzoba nkoranije amahanga yose ngw atere i Yerusalemu; umurwa uzotsindwa, amazu asahurwe, bafate abagore babende ku kagōbēro; igihimba c’abo ku murwa bazojanwa ar’ inyagano, arikw amasigarira ntazokūrwa kur’ uwo murwa.

³Maz’ Uhoraho azokwisidukira, arwane n’ayo mahanga, nk’uko yahora arwana mu ntambara.

⁴Kur’ uwo musi azohagarika ibirenge ku musozi Elayono werekeye i Yerusalemu ahahera i burasirazuba; uwo musozi Elayono uzotemukamwo kubiri uhereye aherekeye i burasirazuba ugashitsa aherekeye i burengerazuba; uzocikamw’ uruhomoka runini cane; igihimba c’uwo musozi kizokwikumira i burārūko, ikindi cikumire i bumanuko.

⁵Muzohunga muce mu ruhomoka rwo mu misozi yanje; kuk’ uruhomoka rwo mur’ iyo misozi ruzoshika no kuri Azeli: mbere muzohunga nk’uko mwāhunze hamwe isi yatigita ku ngoma ya Uziya umwami w’i Buyuda; maz’ Uhoraho Imana yanje azoza azananye n’abera bose.

⁶Kur’ uwo musi ntihazoba har’ umuco utamanzuye, ntihazoba n’ ikibūnda:

⁷arik’ uzoba umusi umwe rudende uzwi n’Uhoraho, atar’ umurango ntube n’ijoro; ariko hageze mu kagoroba hazoba umuco.

⁸Kandi kur’ uwo musi amazi y’ubugingo azova i Yerusalemu; amazi amwe azotembera mu kiyaga c’i burasirazuba, ayandi mu kiyaga c’i burengerazuba. Bizoba birtyo mu ci no mu mvura.

⁹Kand’ Uhoraho azoba Umwami aganza isi yose; kur’ uwo musi Uhoraho azomenyekana kw ar’ umwe gusa, n’izina ryiwe kw ari rimwe gusa.

¹⁰Igihugu cose kizohinduka ikiyaya, uhereye i Geba ugashitsa i Rimoni ahahera i bumanuko bg’ i Yerusalemu: kandi Yerusalemu hazoshirwa hejuru habe aho hāhoze, uhereye kw irembo ry’igisagara ryitwa irya Benyamini, ugashitsa ah’ irembo rya mbere ryāhoze, ugashitsa no kw irembo ryo ku nkokora, kand’ uhereye ku munara w’amabuye wa Hananeli ugashitsa ku māto yimbge hasi baganiramwo vino z’i bgami.

¹¹Maz’ abantu bazohagerēra, kandi nta muvumo uzoba ukiriho; ariko Yerusalemu hazokwibēra amahoro.

¹²Iki ni co cago Uhoraho azotēza amahanga yose azoba ateye Yerusalemu: inyama z’imibiri yabo zizobatikimirako bagihagaze, n’amaso yabo aborere mu nkombe zayo, n’indimi zabo ziborere mu kanwa kabo.

¹³Kur’ uwo musi Uhoraho azobaca umuhongo w’akaburarugero; maz’ umuntu wese asūmire ukuboko mugenzi we, abangure ukuboko arwane na mugenzi we.

¹⁴Kand’ Abayuda bar’ i Yerusalemu bazorwana, maz’ ubutunzi bg’amahanga yose ahakikije buzorundanirizwa hamwe, amazahabu n’amafeza n’imyambaro, vyinshi vy’ itīti.

¹⁵Kand’ ico cago nyene kizoba ku mafarasi no ku nyumbu no ku ngamiya no ku ndogoba no ku bindi bitungwa vyos bizoba aho bashagaje.

¹⁶Maz’ umuntu wese wo mu masigarira yo mu mahanga yose yateye i Yerusalemu azodūga uk’ umwaka utashe gusenga Umwami Uhoraho Nyen’ ingabo no kumara imisi mikuru y’insago.

¹⁷Arik’ umuntu wese wo mu miryango yose yo kw isi atazodūga ngw aje i Yerusalemu gusenga Umwami Uhoraho Nyen’ ingabo, i wabo ntihazokoroka imvura;

¹⁸kandi n’ihanga rya Egiputa ni ritadūga ngo rize, rizoterwa n’icago Uhoraho azoteza amahanga atadūga kumara imisi mikuru y’insago.

¹⁹Ico kizoba igihano Egiputa hazohanwa, n’amahanga yose atadūga kumara imisi mikuru y’insago.

²⁰Kur’ uwo musi ku nzogera z’amafarasi hazoba handitswe ngo YEREJWE UHORAHO. Kand’ inkono zo mu ngoro y’Uhoraho zizomera nk’inzavya z’imbere y’igicaniro.

²¹Mber’ inkono yose ir’ i Yerusalemu n’i Buyuda izoba yerejwe Uhoraho Nyen’ ingabo; maz’ abatanga ibimazi bose bazoza kuzābīra, bazitekemw’ inyama. Kur’ uwo musi nta Munyakanani azoba akigera mu ngoro y’Uhoraho Nyen’ ingabo.