Read Bibliya Yera 1951 Zekariya 6 Bible Online

Zekariya 6 - Bibliya Yera 1951 bible

Zekariya 6

¹Nuko nongera kwunamura amaso, mbona imikogote ine iturutse hagati y’imisozi ibiri; kand’ iyo misozi yar’ imiringa.

²Umukogote wa mbere wakwegwa n’amafarasi y’utugajo; uwa kabiri wakwegwa n’amafarasi y’ imifyiri;

³uwa gatatu wakwegwa n’amafarasi y’ibitare; uwa kane wakwegwa n’amafarasi y’ibibamba mu tugajo.

⁴Nuko mbaza umumarayika twavugana, nt’ Ivyo bisobanurwa bite ga mugenzi?

⁵Umumarayika aranyishura, at’ Ivyo n’imiyaga ine yo mw ijuru, ivuye gushengerera Nyen’ isi yose.

⁶Umukogote ukwegwa n’amafarasi y’imifyiri ugiye mu gihugu c’i burārūko, ay’ ibitare arayakurikiye; ay’ ibibamba na yo agiye mu gihugu c’i bumanuko.

⁷Ay’ utugajo araza, asaba kugendagenda mw isi yose; aravuga, ati Nuko ni mugende, mugendagende mw isi yose nyene. Nukw agendagenda mw isi yose.

⁸Maz’ arampamagara, arambarira, ati Rāba, ariya agiye mu gihugu c’i burārūko yaruhuye umutima wanje ku vy’ico gihugu c’i burārūko.

⁹Ijambo ry’Uhoraho rinzako,

¹⁰rit’ Uze wākīrire amashikanwa abājanywe kw inyagano, ni bo Heludayi na Tobiya na Yedaya; uwo musi nyene uz’ uje kwa Yosiya mwene Zefaniya, ni ho bazoba bari, bavuye i Babuloni;

¹¹wākīre ifeza n’izahabu, ubigiremw’ ibitsibo, uvyambike umuherezi mukuru, Yosuwa mwene Yehozadaki, mu mutwe,

¹²umubarire, ut’ Uku ni k’Uhoraho Nyen’ ingabo agize, at’ Eh’ umuntu yitwa Shami, azoshamika ahantu hiwe, kand’ azokwubaka urusengero rw’Uhoraho.

¹³Koko ni we azokwubaka urusengero rw’Uhoraho, azogira icubahiro, kand’ azovyagira ku ntebe, aganze; kur’ iyo ntebe azohabera n’umuherezi; kandi bompi bazohuza inama zizana amahoro.

¹⁴Kand’ ivyo bitsibo bizobera Helemu na Tobiya na Yedaya na Heni mwene Zefaniya icibutso mu rusengero rw’Uhoraho.

¹⁵Kand’ abazoba bari kure bazoza bubake urusengero rw’Uhoraho; ni ho muzomenya yuk’ Uhoraho Nyen’ ingabo ari we yabantumyeko. Ivyo bizoshika ni mwagira umwete wo kwumvira ijwi ry’Uhoraho Imana yanyu.