Read Bibliya Yera 1951 Matayo 17 Bible Online

Matayo 17 - Bibliya Yera 1951 bible

Matayo 17

¹Imisi itandatu ishize, Yesu ajana Petero na Yakobo na mwene nyina Yohana, abadūgana igisozi kirekire ari bonyene.

²Ahinduka ukundi imbere yabo, mu maso hiwe haka nk’izuba, impuzu ziwe zera nk’umuco.

³Maze Mose na Eliya barababonekera, bavugana na we.

⁴Petero abgira Yesu, ati Mugenzi, bitubereye vyiza ko turi hano: ni wabigomba ndaca insago zitatu hano, rumwe rwawe, urundi rwa Mose, urundi rwa Eliya.

⁵Akivuga, haza igicu gikayangana, kibatera igitūtu; kand’ ijwi riva muri nya gicu, riti Nguyu Umwana wanje nkunda, akampimbara; ni mumwumve.

⁶Abigishwa bavyumvise, bubama hasi baratinya cane.

⁷Yesu arabēgēra, abakorako, ati Ve hasi, ntimutinye.

⁸Bunamuye amaso, ntibagira uwundi babona, atari Yesu wenyene.

⁹Bariko baramanuka ico gisozi, Yesu arabihanikiriza, ati Ntihagire umuntu mubgira ivyo mweretswe, gushitsa ah’ Umwana w’umuntu azozukira avuye mu bāpfuye.

¹⁰Abigishwa baramubaza, bati None rero n’iki gituma abanyabgenge b’ivyanditswe bavuga yuko Eliya akwiye kubanza kuza?

¹¹Arabishura, ati Eliya azoza koko, aroranye vyose neza.

¹²Ariko ndababgira yuko Eliya yamaze kuza, yamara ntibāmumenye, ariko bamwigiriye uko bagomba kwose. Uko ni ko n’Umwana w’umuntu agira ababazwe na bo.

¹³Bun’ abigishwa batahura ko yababgiye Yohana Umubatizi.

¹⁴Bashikiriye ishengero, umuntu araza aramupfukamira,

¹⁵ati Mwami wanje, girira ikigongwe umwana wanje, kukw arwaye intandara, arasinzikaye cane. Kuko kenshi na kenshi agwa mu muriro no mu mazi.

¹⁶Namuzaniye abigishwa bawe, ariko vyabananiye kumukiza.

¹⁷Yesu arishura, ati Yemwe ab’ iki gihe mutizera b’ibidambidambi, nzogeza ryari kubana namwe; nzogeza ryari kubihanganira? Ni mumunzanire hano.

¹⁸Yesu aramukankamira, dayimoni amuvamwo, umuhungu aca akira uwo mwanya.

¹⁹Maz’ abigishwa baza kuri Yesu biherereye, baramubaza, bati Tweho n’iki catumye bitunanira kumusenda?

²⁰Arabishura, ati N’ukwizera kwanyu guke. Ndababgire ukuri: Namba mufise ukwizera kungana n’akabuto ka sinapi, mwobgira kino gisozi, mut’ Imuka aha, uje harya, kandi cokwimuka. Kandi nta kitazobashobokera. [

²¹Ariko ben’ urya ntakūrwamwo n’ikindi atar’ ugusenga no kwisonzesha.]

²²Bakigendagenda i Galilaya, Yesu arababgira, at’ Umwana w’umuntu azoshirwa mu maboko y’abantu,

²³kandi bazomwica, maze ku musi ugira gatatu azozurwa. Barababara cane.

²⁴Bashitse i Kaperinawumu, abatoza ikori ry’urusengero baza kuri Petero, baramubaza, bati Harya Umwigisha wanyu ntatanga ikigabane ca shekeli?[10] Na we at’ Ego me, aragitanga.

²⁵Binjiye mu nzu, Yesu aramwitanga, aramubaza, at’ Ugira ngw iki ga Simoni? Abami bo mw isi babugurisha canke batoza abahe? N’ababo canke n’abandi?

²⁶Aramwishura, ati N’abandi. Yesu aramubgira, ati Noneh’ ababo baracuna.

²⁷Ariko twoye kubatsitaza, genda ku kiyaga, uteremw’ igera, wābīre ifi iribubanze gufatwa, uyasamike, urasangamwo shekeli; abe ari yo ujana, uyitange kubganje nawe.