Read Bibliya Yera 1951 Matayo 19 Bible Online

Matayo 19 - Bibliya Yera 1951 bible

Matayo 19

¹Yesu arangije ayo majambo, ava i Galilaya, aja mu gihugu c’i Yudaya hakurya ya Yorodani.

²Ishengero ryinshi riramukurikira, abakirizayo.

³Abafarisayo baza kuri we bamugeza, baramubaza, bati Mbega biremerwa k’umuntu yirukana umugore kubg’ inyanduruko y’ikintu cose?

⁴Na we arabishura, ati Nta ho murasoma yuk’ uhereye mbere na mbere Rurema yabaremye bar’ uburyo bubiri,

⁵ikavuga, iti Ni co gituma umuntu azosiga se na nyina, akabana n’umugore wiwe akaramata, bompi bakaba umubiri umwe?

⁶Bituma batakiri babiri, ariko baba babaye umubiri umwe. Nukw ico Imana yamatanije, umuntu ntaz’ akimature.

⁷Baramubaza, bati None se, n’iki catumye Mose agera ko bamuha icete co kuvāvānura, akamwirukana?

⁸Arabishura, ati Mose yabarekuye kwirukana abagore banyu kukw imitima yanyu ikomantaye. Arik’ uhereye ubga mbere hose ntivyari bimeze birtyo.

⁹Ariko ndababgire: Umuntu wese yirukana umugore wiwe atamuhōye ubusambanyi, akābīra uwundi, aba asambanye; kand’ uwābīra uwahukanye aba asambanye.

¹⁰Abigishwa baramubgira, bat’ Ivy’ umugabo n’umugore asangwa bimeze birtyo, noneho kurongora n’ikigoye.

¹¹Na we arababgira, ati Si bose bashobora kwemera iryo jambo, atar’ abābihawe.

¹²Kuko har’ inkone zavutse zirtyo uhereye kuva mu nda za ba nyina, kandi har’ inkone zakonwe n’abantu, kandi har’ inkone zīkona ubgazo kubg’ ubgami bgo mw ijuru. Ūshobora kuvyemera n’avyemere.

¹³Bamuzanira abana bato, ngw abarambikekw ibiganza, abasabire. Arikw abigishwa barabakankamira.

¹⁴Yesu arababgira, ati Ni mureke abana bato, ntimubabuze kuza aho ndi, kuk’ ubgami bgo mw ijuru ar’ ubg’ abameze bartyo.

¹⁵Abarambikakw ibiganza, avayo.

¹⁶Haza umuntu kuri we, aramubaza, ati Mwigisha, nkore iciza ki ngo ndonke ubugingo budashira?

¹⁷Aramubaza, at’ Umbariza iki iciza? Inziza n’Imwe. Arikw asangw’ ugomba kwinjira mu bugingo, witondere ivyagezwe.

¹⁸Aramubaza, ati N’ibihe? Yesu aramwishura, ati Ntukice, ntugasambane, ntukibe, ntukāgirize abandi ibinyoma,

¹⁹wubahe so na nyoko, kand’ ukunde mugenzawe nk’uko wikunda.

²⁰Wa musore aramubgira, at’ Ivyo vyose naravyitondeye; har’ ikindi mpajije?

²¹Yesu aramubgira, at’ Asangw’ ugomba kuba agahore, genda ushōre ivyo utunze, ugabire aboro, ni ho uzogira itunga mw ijuru, utek’ uze, unkurikire.

²²Uwo musore yumvise iryo jambo, agenda ababaye, kuko yar’ afise itunga ryinshi.

²³Yesu abgira abigishwa biwe, ati Ndababgire ukuri: Biragoye k’umutunzi yinjira mu bgami bgo mw ijuru.

²⁴Kandi ndababgira yukw icoroshe ar’ ingamiya guca mu zuru ry’urushinge biruta k’umutunzi yinjira mu bgami bg’Imana.

²⁵Abigishwa bavyumvise baratangara cane, bati None rero, ni nde ashobora gukizwa?

²⁶Yesu arabītegereza, arababgira, ati Kubg’ abantu ico ntigishoboka, ariko ku Mana vyose birashoboka.

²⁷Buno Petero aramubaza, ati Mbega twebge ko twaretse vyose tukagukurikira; none tuzohabga iki?

²⁸Yesu arababgira, ati Ndababgira ukuri yuko mwebge abankurikiye, ah’ Umwana w’umuntu azovyagirira ku ntebe y’ubgiza bgiwe, igihe co kuvyarwa ukundi gusha, namwe muzokwicara ku ntebe cumi na zibiri, mucire imanza imiryango cumi n’ibiri y’Abisirayeli.

²⁹Umuntu wese yasize urugo canke bene nyina canke bashiki be canke se canke nyina cank’ abana cank’ itongo kubg’ izina ryanje, azobishumbushwa umurengera, kand’ azoragwa ubugingo budashira.

³⁰Ariko benshi b’imbere bazoba ab’ inyuma, kand’ ab’ inyuma bazoba ab’ imbere.