Read Bibliya Yera 1951 Matayo 20 Bible Online

Matayo 20 - Bibliya Yera 1951 bible

Matayo 20

¹Ubgami bgo mw ijuru busa na nyen’ urugo azindutse kurondera abamukorera mu ruzabibu rwiwe.

²Ategeranya n’abakozi ku musi kubaha idenariyo, abarungika mu ruzabibu rwiwe.

³Nko kw isaha zitatu aragenda, abona abandi bīhagarariye mu kaguriro ata co bakora.

⁴Na bo arababgira, ati Namwe ni mugende mu ruzabibu, ndabagerera ivyo mukwiranye. Baragenda.

⁵Yongera kugenda kw isaha zitandatu no ku y’icenda, agira kuno.

⁶Kandi nko kw isaha cumi n’imwe aragenda, abona abandi bīhagarariye; arababgira, ati Mbega ko mwahagaze hano umusi wose ata co mukora?

⁷Baramwishura, bati N’ukw ata waturaritse. Arababgira, ati Namwe ni mungīre mu ruzabibu.

⁸Bugorovye, nyen’ uruzabibu abgira umukoresha wiwe, ati Hamagara abakozi, ubagerere ingero zabo, utangurire mu bo hanyuma gushitsa ku ba mbere.

⁹Abaje kw isaha cumi n’imwe bahabga idenariyo imwe‐imwe.

¹⁰Abātanguye kare bāje, bagira ngo bagererwa ibirenze. Ariko bahabga idenariyo imwe‐imwe na bo.

¹¹Bayahawe bidodombera nyen’ uruzabibu,

¹²bat’ Abaherutse kuza, bagakora isaha imwe gusa, none k’ubaringanije natwe twacumukuye umurango wose no mu ndugumba!

¹³Na we yishura umwe muri bo, ati Mugenzi wanje, sinkugiriye nabi; ntitwemeranije idenariyo imwe?

¹⁴Fata iyawe, ugende. Uyo wo hanyuma nagomvye kumugerera nkawe.

¹⁵Har’ ikimbuza kugira uko ngomba mu vyanje? Cank’ ugize ijisho ribi kuko jewe ndi mwiza?

¹⁶Uko ni kw ab’ inyuma bazoba ab’ imbere, kand’ ab’ imbere bazoba ab’ inyuma.

¹⁷Yesu agira adūge i Yerusalemu, yihererana na ba bigishwa cumi na babiri, maze bari mu nzira arababgira,

¹⁸at’ Ehe turadūze i Yerusalemu, kand’ Umwana w’umuntu azoshirwa mu maboko y’abaherezi bakuru n’abanyabgenge b’ivyanditswe, bazomucira urubanza rwo gupfa,

¹⁹kandi bazomuha abanyamahanga ngw ashinyagurirwe, atonagurwe, abambge, kandi ku musi ugira gatatu azozurwa.

²⁰Buno nyina wa bene Zebedayo aza kuri we, ari kumwe n’abahungu biwe, aramupfukamira, amusaba ijambo.

²¹Aramubaza, at’ Uragomba iki? Na we ati Bivuge, aba bahungu banje babiri ngo baze bicare umwe i buryo bgawe uwundi i bumoso mu bgami bgawe.

²²Yesu arishura, ati Ntimuzi ico musaba. Mwoshobora kunywera ku gikombe jewe ngira nnywereko? Na bo bati Turashobora.

²³Arababgira, at’ Igikombe canje koko muzokinywerako, ariko gutanga ivyicaro i buryo bganje n’i bumoso, s’ivyanje, atar’ abo Data yabiteguriye.

²⁴Bamwe cumi bavyumvise, bitonganiriza ivy’ abo babiri bavukana.

²⁵Yesu arabahamagara, arababgira, ati Murazi yukw abaganwa b’amahanga bayatwaza amanyama, kandi n’abakuru bayo bayagirak’ ububasha.

²⁶Muri mwebge si ko biri. Arik’ ūgomba kuba mukuru muri mwebge az’ abe umukozi wanyu;

²⁷kand’ ūgomba kuba uw’ imbere az’ abe umuja wanyu,

²⁸nk’uk’ Umwana w’umuntu atāzanywe no gukorerwa, atar’ ugukorera abandi, no gutanga ubugingo bgiwe kw incungu ya benshi.

²⁹Bakiva i Yeriko ishengero ryinshi riramukurikira.

³⁰Impumyi zibiri zari zicaye i ruhande y’inzira, zumvise yuko Yesu ahaciye ziratakamba, ziti Mwami, mwana wa Dawidi, tugirire imbabazi.

³¹Ishengero rirazizibiranya ngo zihore. Zirushiriza gutakamba, ziti Mwami, mwana wa Dawidi, tugirire imbabazi.

³²Yesu arahagarara, arazihamagara, arazibaza, ati Mugomba ko mbakorera iki?

³³Ziti Tugomba kw amaso yacu ahumūka Mwami.

³⁴Yesu azigirira akagongwe, akora ku maso yazo, zica zirahumūka, baramukurikira.