Read Bibliya Yera 1951 Matayo 26 Bible Online

Matayo 26 - Bibliya Yera 1951 bible

Matayo 26

¹Yesu arangije ayo majambo yose, abgira abigishwa biwe,

²ati Murazi yukw imisi ibiri ni yashira, hazoba Pasika, kand’ Umwana w’umuntu azotangwa abambge.

³Maz’ abaherezi bakuru n’abakuru b’ubgo bgoko bakoranira mu rugo rw’umuherezi mukuru yitwa Kayafa,

⁴baja inama yo gusuka Yesu ngo bamufate, bamwice.

⁵Ariko, bati Ntitumufate mu misi mikuru, hoye kuvyuka umugūmūko mu bantu.

⁶Yesu ar’ i Betaniya mu nzu kwa Simoni umunyamibembe,

⁷umugore aza kuri we afise ikebano ry’amavuta atāmirana y’igiciro kinini cane, ayamusuka ku mutwe, arikw ararya.

⁸Arikw abigishwa babibonye, baritonganya, bati Mbeg’ ubu buhombe n’ubg’ iki?

⁹Aya yoshoboye kugurwa vyinshi bigahabga aboro.

¹⁰Yesu avyumvise arababgira, ati Mubabariza iki uyu mugore? Ankoreye igikorwa ciza.

¹¹Aboro muramana imisi yose, ariko jeho ntituja kwamana imisi yose.

¹²Igitumye ansuka ayo mavuta ku mubiri n’ukuntegurira guhambga.

¹³Ndababgire ukuri: Ah’ ubu butumwa bgiza buzovugwa hose mw isi yose, n’ico uyu akoze na co kizovugwa kibe icibutso ciwe.

¹⁴Maz’ umwe muri bamwe cumi na babiri, yitwa Yuda Isikaryota, aja ku baherezi bakuru,

¹⁵arababaza, ati Mwompēra iki, nkazomubaronkera? Bamugerera intete z’ifeza mirongwitatu.

¹⁶Aherakw arondera uburyo bgo kumubaronkera.

¹⁷Ku musi w’intangamarāra wo kurya imitsima itambiwe abigishwa baza kuri Yesu, baramubaza, bat’ Ugomba ko tugutegurira hehe ah’ uriburīre ivya Pasika?

¹⁸Arabishura, ati Ni muje mu gisagara kwa ntuze, mumubarire, mut’ Umwigisha agize ngw Igihe ciwe kiri hagufi, agira asangirire ivya Pasika n’abigishwa biwe i wawe.

¹⁹Abigishwa bagira nk’uko Yesu yababariye, bategura ivya Pasika.

²⁰Bugorovye, yicarana n’abigishwa biwe cumi na babiri ngo basangire.

²¹Bariko bararya, arababgira, ati Ndababgira ukuri yuk’ umwe muri mwebge agira angure.

²²Barababara cane, batangura kumubaza umwe‐umwe, bati Ni jewe ga Mugenzi?

²³Arabishura, at’ Uwo duhūje amaboko mu gukoza mu mubehe, ni we angura.

²⁴Umwana w’umuntu agira agende, uko vyanditswe kuri we; arik’ uwo muntu agura Umwana w’umuntu azobona ibara: uwo muntu ivyomubereye vyiza iyaba atāvutse.

²⁵Yuda amugura aramubaza, ati Ni jewe ga Mwigisha? Na we at’ Urarivuze.

²⁶Bariko bararya, Yesu yābīra umutsima, awuhezagiye arawumanyagura, awuha abigishwa, ati Ni mwābīre, murye, uyu n’umubiri wanje.

²⁷Yābīra igikombe, agishimira Imana, arakibaha, ati Ni mukinywereko mwese,

²⁸kukw iki ar’ amaraso yanje y’isezerano, aviriye benshi ngo baharirwe ivyaha.

²⁹Ariko ndababgira yuk’ uhereye none ntazokwongera kunywa kur’ izi nzabibu ugashitsa kuri wa musi nzosangirira namwe umutobe wazo musha mu bgami bga Data.

³⁰Bahejeje kuririmba, barasohoka baja ku musozi wa Elayono.

³¹Maze Yesu arababgira, ati Mwebge mwese mur’ iri joro ivyanje bihava bibatsitaza; kuko handitswe, ngo Nzokubita umwungere, intama z’umukuku zisanzare.

³²Ariko ni namara kuzurwa, nzobītangira imbere kuja i Galilaya.

³³Maze Petero aramwishura, at’ Ivyawe n’iyo vyotsitaza bose, jeho nta ho bizontsitaza.

³⁴Yesu aramubgira, ati Ndakubgira ukuri yuko mur’ iri joro inkoko itarabika, uhava unyihakana gatatu.

³⁵Petero aramubgira, ati N’iyo noba nkwiye gupfana nawe, sinokwihakana. N’abigishwa bose bavuga bartyo.

³⁶Maze Yesu ashikana na bo ahantu hitwa i Getsemane, abgira abigishwa biwe, ati Ba muricaye hano, mbanze nje harya gusenga.

³⁷Ajana Petero na bene Zebedayo bompi, atangura kubabara no guhagarika umutima cane.

³⁸Arababgira, at’ Umutima wanje uri n’akabonge kagomba kunyica: ba muragumye aha, mubane maso nanje.

³⁹Yunguruza imbere gatoya, arubama, arasenga, ati Data, asangwa vyoshoboka, iki gikombe ni kindēngāne: ariko ntibibe uko jewe ngomba, yamara bibe uko wewe ugomba.

⁴⁰Agaruka ku bigishwa, asanga basinziriye, abaza Petero, at’ Ubgo ntimurushe mubana maso nanje n’isaha n’imwe?

⁴¹Ni mube maso, musenge, ntimuje mu mosha mabi. Umutima ni wo ukunze, arik’ umubiri ufise intege nke.

⁴²Yongera kugenda ubga kabiri, arasenga, ati Data, asangwa bidashoboka yukw iki kindēngāna, shiti nkinywereyeko, ni bibe nk’uk’ ugomba.

⁴³Yongera kugaruka asanga basinziriye, kukw amaso yabo yar’ aremerewe.

⁴⁴Yongera kubasigaho, aragenda, asenga ubga gatatu, avuga amajambo amwe n’aya mbere.

⁴⁵Maz’ agaruka ku bigishwa, arababarira, ati Ni mwisinzirire noneho, muruhuke. Eh’ igihe kirashitse, Umwana w’umuntu ashizwe mu maboko y’abanyavyaha.

⁴⁶Ni muvyuke, tugende, eh’ ūnguze ari hafi.

⁴⁷Akivuga, Yuda, umwe muri bamwe cumi na babiri, araza, azananye n’igitero cinshi, kizanye inkota n’amahiri, kivuye ku baherezi bakuru n’abashingantahe b’ubgo bgoko.

⁴⁸Arik’ ūmugura yari yabahaye ikimenyetso, at’ Uwo nja gusoma azoba ari we; mumufate.

⁴⁹Ako kanya ashikīra Yesu, aramubgira, ati N’amahoro ga Mwigisha? Maz’ aramusomagura.

⁵⁰Yesu aramubarira, ati Mugenzi wanje, ikikuzanye n’ugikore. Buno baraza, bashōrera amaboko kuri Yesu, baramufata.

⁵¹Maz’ umwe mu bāri kumwe na Yesu atuma ukuboko, asokōra inkota yiwe, ayikubita umushumba w’umuherezi mukuru, amuca ugutwi.

⁵²Buno Yesu aramubarira, ati Subiza inkota yawe ahayo; kukw ababanguye inkota bose bazokwicwa n’inkota.

⁵³Ugira ngo sinoshobora kwinginga Data, na we akandungikira ubu nyene abamarayika basāga legiyono[16] cumi na zibiri?

⁵⁴Non’ ivyanditswe vyoshika bite kw ari ko bikwiye kuba?

⁵⁵Uwo mwanya Yesu abaza ico gitero, ati Mbega munziye kumfata nk’umwambuzi, muzanye inkota n’amahiri? Ko nicara mu rusengero nigisha imisi yose ntimumfate?

⁵⁶Arikw ivyo vyose bibaye, kugira ngw ivyanditswe n’abāvugishwa n’Imana bishike. Bun’ abigishwa bose baramuta, barahunga.

⁵⁷Abāfashe Yesu bamujana kwa Kayafa, umuherezi mukuru, ni ho abanyabgenge b’ivyanditswe n’abashingantahe bāri bakoraniye.

⁵⁸Ariko Petero amuja inyuma barenga arenguka, gushitsa ku rugo rw’umuherezi mukuru, ashika imbere, yicarana n’abagendanyi ngw arābe amaherezo.

⁵⁹Abaherezi bakuru n’abashingantahe b’amakombe bose baronderera Yesu ibirego vy’ibinyoma, ngo babone ingene bomwica.

⁶⁰Ariko barabibura, naho haje abīgize ivyabona benshi. Ubuheruka haza babiri,

⁶¹bat’ Uyo yagize ngo yoshobora gusambura urusengero rw’Imana, akarwubaka mu misi itatu.

⁶²Umuherezi mukuru arahaguruka, aramubaza, ati Nta co wiregura? Aba bakwagirije iki?

⁶³Ariko Yesu arihorera. Umuherezi mukuru aramubgira, ati Ndakurahiye Imana nzima, tubarire kw ari wewe Kristo, Umwana w’Imana.

⁶⁴Yesu aramwishura, at’ Urarivuze; yamara ndababgira yuk’ uhereye ubu muzobona Umwana w’umuntu yicaye i buryo bg’Ububasha, aje mu bicu vyo kw ijuru.

⁶⁵Bun’ umuherezi mukuru yitantamurirakw impuzu ziwe, at’ Ararogose; turacaronderera iki ivyabona? Ehe murīyumviye ingen’ arogose:

⁶⁶mugira ngw iki? Na bo baramwishura, bat’ Akwiye gupfa.

⁶⁷Buno bamuvuma amate mu maso, bamukubita ibipfunsi, abandi baramubīngūra,

⁶⁸bati Yewe Kristo, dupfindūre: ni nde agukubise?

⁶⁹Ariko Petero yari yicaye hanze mu rugo. Incoreke iza ah’ ari, iti Nawe nyene mwari kumwe na Yesu Umunyagalilaya.

⁷⁰Na we abihakanira mu maso ya bose, at’ Ico uvuze sindanakizi.

⁷¹Yungururije mu bikingi vy’irembo, iyindi ncoreke iramubona, ibarira abar’ aho, iti N’uyu nyene yari kumwe na Yesu Umunyanazareti.

⁷²Yongera kubihakana arahira, at’ Uyo muntu sindanamuzi.

⁷³Hahise akanya, abahagazeho baramwēgēra, babgira Petero, bati N’ivy’ ukuri nawe ur’ uwo muri bo; bitayeko n’imvugo yawe iraguhinyuza.

⁷⁴Bun’ atangura kurahira arīsiba, at’ Uyo muntu sindanamuzi. Uwo mwanya inkoko irabika;

⁷⁵Petero yibuka ijambo Yesu yamubgiye, at’ Inkoko itarabika uja kunyihakana gatatu. Arenga irembo, araturika ararira.