Read Bibliya Yera 1951 Mariko 11 Bible Online

Mariko 11 - Bibliya Yera 1951 bible

Mariko 11

¹Bageze hafi y’i Yerusalemu, bashikira i Betifage n’i Betaniya ku musozi wa Elayono, atuma babiri bo mu bigishwa biwe,

²arababarira, ati Muje mur’ iriya mihana ir’ imbere yanyu; ni mwayishikamwo, muca mubona inyana y’indogoba iziritse, ata muntu yigeze kuyigenderako: muyiziture muyizane.

³Kandi ni hagira ūbabaza, at’ Ivyo mubikoreye iki? Mumwishure, muti Databuja ni we ayigomba. Uwo mwanya arayirungika ino.

⁴Baragenda, basanga inyana y’indogoba iziritse i ruhande y’irembo ku nzira, barayizitura.

⁵Bamwe mu bahahagaze barababaza, bati Mukora iki ko muzitura iyo nyana?

⁶Na bo babishura nk’uko Yesu yababariye: barabareka.

⁷Bazana iyo nyana aho Yesu ari, bayishirakw impuzu zabo, ayicarako.

⁸Benshi basasa impuzu zabo mu nzira, abandi basasa amashami y’ibiti, ayo baciye mu matongo.

⁹Abar’ imbere yiwe n’abamukurikiye barasemerera, bati Hoziyana, hashemezwe ūje mw izina ry’Uhoraho,

¹⁰ubgami buje bushimwe, ni bgo bga sogokuruza Dawidi; Hoziyana mw ijuru.

¹¹Ashika i Yerusalemu, yinjira mu rusengero, maz’ ahejeje kweraguza vyose, kuko bgari bugorovye, arasohoka, aja i Betaniya, ajanye na bamwe cumi na babiri.

¹²Bukeye bamaze kuva i Betaniya, yumva arashonje.

¹³Akiri kure, abona umusukoni urikw amababi, arawēgēra ngo kumbure yogira ic’ awusangako: awushitseko ntiyagira ic’ awubonako, atar’ amababi: kuko kitār’ igihe co kwama c’umusukoni.

¹⁴Arawubgira, ati Ntugapfe har’ ūriye ku nsukoni zawe uhereye ubu ugashitsa ibihe bidashira. Abigishwa biwe baravyumva.

¹⁵Bashika i Yerusalemu. Yinjira mu rusengero, atangura guhindira hanze abarudandarizamwo n’abaruguriramwo, ahenura ameza y’abāvunja amahera n’intebe z’abāriko baragurwakw inuma,

¹⁶ntiyakundira umuntu n’umwe guhita mu rusengero atwaye ikintu co mu mbombovu.

¹⁷Arigisha arababgira, ati Mbega ntivyanditswe, ngw Ingoro yanje izokwitwa inzu yo gusengerwamwo n’amahanga yose? Ariko mwebge mwayihinduye nk’isenga ry’abambuzi.

¹⁸Abaherezi bakuru n’abanyabgenge b’ivyanditswe bavyumvise barondera ingene bomwica, kuko bāmutinya, kukw abantu bose batangazwa n’inyigisho ziwe.

¹⁹Iyo bugorovye, yama ava mu gisagara.

²⁰Bukeye kare‐kare bariko barahita babona wa musukoni, wahereye ku mizi wakabiranye.

²¹Petero yibutse aramubgira, ati Mwigisha, ehe wa musukoni wavumye wakabiranye.

²²Yesu aramwishura, arababgira, ati Mwamane ukwizera Imana.

²³Ndababgira ukuri yuk’ umuntu wese yobgira uyu musozi, ati Shingūka utabge mu kiyaga: ntabikekeranye mu mutima, arikw akizera yukw ico avuze gikorwa, azokibona.

²⁴Ni co gitumye mbabgira yukw ivyo musenga canke musaba vyose, mwizere yuko mubihawe, kandi muzobibona.

²⁵Kandi ni mwahagarara musenga, ni haba har’ ico mupfa n’uwundi, mukimuharire, ngo So wo mw ijuru na we abaharire ivyaha vyanyu: [

²⁶ariko ni mutāharira abandi, na So wo mw ijuru ntazobaharira ivyaha vyanyu.]

²⁷Bongera kuja i Yerusalemu. Akigendagenda mu rusengero, abaherezi bakuru n’abanyabgenge b’ivyanditswe n’abashingantahe baza kuri we,

²⁸baramubaza, bati N’ububasha ki bugutera gukora ivyo? Canke ni nde yaguhaye ubgo bubasha bgo kubikora?

²⁹Yesu arabishura, ati Nanje hinge ndababaze ijambo rimwe, munyishure; mpeze ndababarire ububasha bunkoresha ivyo.

³⁰Non’ ukubatiza kwa Yohana kwaturutse mw ijuru, canke se mu bantu? Ni munyishure.

³¹Bībūranya muri bo, bati Ni twavuga tuti Ni mw ijuru; ahava atubaza, ati N’iki cababujije kumwemera?

³²Ariko mbega tuvuge tuti Ni mu bantu? Batinya abantu, kuko bose biyumvira badakekeranya yuko Yohana yavugishwa n’Imana.

³³Bishura Yesu, bati Ntituhazi. Yesu arababgira, ati Nuko rero nanje simbabgira ububasha bunkoresha ivyo.