Read Bibliya Yera 1951 Mariko 14 Bible Online

Mariko 14 - Bibliya Yera 1951 bible

Mariko 14

¹Hāri hasigaye imisi ibiri, imisi mikuru ya Pasika ikagera, ni yo yo kurya imitsima itambiwe. Abaherezi bakuru n’abanyabgenge b’ivyanditswe barondera uburyo bgo gusuka Yesu ngo bamufate bamwice:

²kuko bāvuga, bati Ntitumufate mu misi mikuru, abantu bogūmūka.

³Ar’i Betaniya mu nzu kwa Simoni umunyamibembe, yicaye arikw ararya, haza umugore afise ikebano ry’amavuta atāmirana, y’igiciro kinini cane, y’agati kitwa narada: amena iryo kebano, amavuta ayamusuka ku mutwe.

⁴Bamwe muri bo barītonganya, bati Mbeg’ ubu buhombe bg’aya mavuta n’ubg’ iki?

⁵Kuko yoshoboye kugurwa idenariyo amajana atatu arenga, zigahabga aboro: baramwidodombera.

⁶Yesu arababarira, ati Ni mumureke! Mumubabariza iki? Ankoreye igikorwa ciza.

⁷Aboro murāmana imisi yose; aho mwogombera mwobagirira neza; ariko jeho ntituja kwamana imisi yose.

⁸Akoze ukw ashoboye, ansutse amavuta ku mubiri kuwutegurira guhambga bitaraba.

⁹Ndababgire ukuri: Ah’ ubutumwa bgiza buzovugwa hose mw isi yose, n’ico uyu akoze kizovugwa, kibe icibutso ciwe.

¹⁰Kandi Yuda Isikaryota, yar’ umwe muri bamwe cumi na babiri, aja ku baherezi bakuru, ngw az’ amubaronkere.

¹¹Bavyumvise baranezerwa, basezerana kumuha amahera y’ifeza. Arondera uburyo bgo kumubaronkera.

¹²Ku musi w’intangamarāra wo kurya imitsima itambiwe, uwo bābāgak’ umwagazi w’intama wa Pasika, abigishwa biwe baramubaza, bat’ Ugomba ko twoja hehe gutegura ivya Pasika ng’ ubirye?

¹³Atuma babiri mu bigishwa biwe, arababarira, ati Ni muje mu gisagara, umugabo muribuhūre yikoreye umubindi w’amazi mumukurikire.

¹⁴Ah’ aja kwinjira mubgire nyen’ urwo rugo, mut’ Umwigisha agize ngw Indāro yiwe iri hehe, ah’ asangirira ivya Pasika n’abigishwa biwe?

¹⁵Ubgiwe aribubereke inzu nini yo hejuru, isēzeye, iteguritse; abe ari yo muduteguriramwo.

¹⁶Ba bigishwa baragenda, baja mu gisagara, babisanga uko yabibabariye: bategura ivya Pasika.

¹⁷Bugorovye azanana na bamwe cumi na babiri.

¹⁸Bicaye bariko bararya, Yesu arababgira, ati Ndababgire ukuri: Umwe muri mwebge, uwo dusangira, agira angure.

¹⁹Batangura kubabara, bamubaza umwe‐umwe, bati Mbega ni jewe?

²⁰Arabishura, at’ Umwe muri mwebge cumi na babiri, uwo turiko turakoreza amaboko rimwe mu mubehe, ni we.

²¹Umwana w’umuntu agira agende uko vyanditswe kuri we: arik’ uwo muntu agura Umwana w’umuntu azobona ibara; uwo muntu ivyomubereye vyiza iyaba atāvutse.

²²Maze bariko bararya, yābīra umutsima; awuhezagiye arawumanyagura, arawubaha, ati Ni mwābīre, uyu n’umubiri wanje.

²³Yābīra igikombe; agishimiye Imana arakibaha, bakinywerako bose.

²⁴Arababarira, at’ Ico n’amaraso yanje y’isezerano, aviriye benshi.

²⁵Ndababgire ukuri: Sinzokwongera kunywa ku nzabibu, gushitsa kuri wa musi nzonywera umutobe wazo musha mu bgami bg’Imana.

²⁶Bahejeje kuririmba, barasohoka, baja ku musozi wa Elayono.

²⁷Maze Yesu arababgira, ati Mwese muhava mutsitazwa: kuko handitswe, ngo Nzokubita umwungere, intama zisanzare.

²⁸Ariko ni namara kuzurwa, nzobītangira imbere kuja i Galilaya.

²⁹Maze Petero aramubgira, ati N’iyo vyotsitaza bose, urakūra jeho.

³⁰Yesu aramubgira, ati Ndakubgira ukuri yuko wewe ubgawe uyu musi mur’ iri joro nyene, inkoko itaragereka uhava unyihakana gatatu.

³¹Arikw arīhanukīra cane, ati N’iyo noba nkwiye gupfana nawe, sinokwihakana. N’abandi na bo bavuga bartyo bose.

³²Maze bashika ahantu hitwa i Getsemane, abarira abigishwa biwe, ati Ba muricaye hano, mbanze nje gusenga.

³³Ajana Petero na Yakobo na Yohana, atangura kwumirwa no guhagarika umutima cane.

³⁴Arababgira, at’ Umutima wanje uri n’akabonge kagomba kunyica; ba muragumye hano, mube maso.

³⁵Yunguruza imbere gatoya, yubama hasi arasenga ngw ico gihe kimurengāne, asangwa bishoboka.

³⁶Ati Abba, Data, vyose biragushobokera: kūra iki gikombe kindēngāne: ariko ntibibe uko jewe ngomba, yamara bibe uko wewe ugomba.

³⁷Aragaruka, asanga basinziriye, abaza Petero, ati Simoni, urasinziriye? Nturushe uba maso n’isaha n’imwe?

³⁸Ni mube maso, musenge, ntimuje mu mosha mabi. Umutima ni wo ukunze, arik’ umubiri ufise intege nke.

³⁹Yongera kugenda, arasenga, avuga amajambo amwe n’aya mbere.

⁴⁰Yongera kugaruka, asanga basinziriye, kukw amaso yabo yar’ aremerewe cane, ntibāmenya ico bamwishura.

⁴¹Agaruka ubugira gatatu, arababarira, ati Ni mwisinzirire noneho, muruhuke: biraheze. Igihe kirashitse; rāba Umwana w’umuntu ashizwe mu maboko y’abanyavyaha.

⁴²Ni muvyuke, tugende: eh’ ūnguze ari hafi.

⁴³Buno nyene akivuga, Yuda, umwe muri bamwe cumi na babiri, araza, azananye n’igitero kizanye inkota n’amahiri, kivuye ku baherezi bakuru n’abanyabgenge b’ivyanditswe n’abashingantahe.

⁴⁴Arik’ ūmugura yari yabahaye ikimenyetso, at’ Uwo nja gusoma azoba ari we, mumufate, mumujane mumugumije.

⁴⁵Ashitse, aca aramwēgēra, ati Mwigisha: maz’ aramusomagura.

⁴⁶Bamushōrerakw amaboko, baramufata.

⁴⁷Maz’ umwe mu bahagazeho asokora inkota, ayikubita umushumba w’umuherezi mukuru, amuca ugutwi.

⁴⁸Yesu arababaza, ati Mbega munziye kumfata nk’umwambuzi, muzanye inkota n’amahiri?

⁴⁹Ko nāmana namwe mu rusengero nigisha imisi yose, ntimumfate: arikw ibi bibaye kugira ngw ivyanditswe bishike.

⁵⁰Maze bose baramuta barahunga.

⁵¹Kand’ umuhungu umwe w’umusore amuja inyuma, yikuvyekw impuzu imwe gusa, baramufata:

⁵²abatāna impuzu yiwe, ahunga amēnya.

⁵³Bajana Yesu ku muherezi mukuru, abaherezi bakuru bose n’abashingantahe n’abanyabgenge b’ivyanditswe bakoraniraho.

⁵⁴Petero amuja inyuma barenga arenguka, ashika imbere mu rugo rw’umuherezi mukuru; yicarana n’abagendanyi yota umuriro.

⁵⁵Maz’ abaherezi bakuru n’abashingantahe b’amakombe bose baronderera Yesu ibirego vyomwicisha, barabibura.

⁵⁶Nah’ abāmurega ibinyoma bāri benshi, ibirego vyabo ntivyari bihūye.

⁵⁷Bamwe bava hasi, baramubeshera,

⁵⁸bati Twebge twaramwumvise avuga, ati Nzosambura uru rusengero rwubatswe n’intoke nubake urundi mu misi itatu, rutubatswe n’intoke.

⁵⁹Ariko na ho nyene amagambo yabo ntiyar’ ahūye.

⁶⁰Umuherezi mukuru arahaguruka, ahagarara hagati, abaza Yesu, ati Nta co wiregura? Aba bakwagirije iki?

⁶¹Arihorera, ntiyamwishura na rimwe. Umuherezi mukuru yongera kumubaza, ati Ni wewe Kristo, Umwana w’Īshimwa?

⁶²Yesu aramwishura, ati Ndi we; kandi muzobona Umwana w’umuntu yicaye i buryo bg’Ububasha, azananye n’ibicu vyo kw ijuru.

⁶³Maz’ umuherezi mukuru yitantamurirakw imyambaro yiwe, aravuga, ati Turacaronderera iki ivyabona?

⁶⁴Murīyumviye ingen’ arogose: mugira ngw iki? Bose bamucira urubanza ngw akwiye gupfa.

⁶⁵Bamwe batangura kumuvuma amate, bamupfuka mu maso, bamukubita ibipfunsi, bati N’udupfīndūre. Abagendanyi bamushikizakw inshi.

⁶⁶Petero akiri mu rugo ahahera hepfo, haza umwe mu ncoreke z’umuherezi mukuru,

⁶⁷abonye Petero yota umuriro, aramwitegereza, aramubgira, ati Nawe nyene mwari kumwe na wa Munyanazareti Yesu.

⁶⁸Na we arabihakana, ati Sinzi ico uvuze, singitahuye. Maz’ arunguruza, ashika mu bikingi vy’irembo; inkoko irabika.

⁶⁹Ya ncoreke imubonye, itangura kwongera kubgira abahagazeho, it’ Uyu n’uwo muri bo.

⁷⁰Na we yongera kubihakana. Maze hahise akanya, abahagazeho bongera kubgira Petero, bati N’ivy’ ukuri ur’ uwo muri bo, bitayeko ur’ Umunyagalilaya.

⁷¹Na we atangura kurahira arīsiba, at’ Uyo muntu muvuga sindanamuzi.

⁷²Uwo mwanya inkoko ibika ubugira kabiri. Petero yibuka rya jambo Yesu yamubgiye, at’ Inkoko itaragereka, uja kunyihakana gatatu; avyiyumviriye, ararira.