Read Bibliya Yera 1951 Mariko 15 Bible Online

Mariko 15 - Bibliya Yera 1951 bible

Mariko 15

¹Umutwenzi utambitse, uwo mwanya abaherezi bakuru n’abashingantahe n’abanyabgenge b’ivyanditswe n’abashingantahe b’amakombe bose baja inama, baboha Yesu, baramujana, bamushikiriza Pilato.

²Pilato aramubaza, ati Ni wewe Mwami w’Abayuda? Na we aramwishura, at’ Urarivuze.

³Abaherezi bakuru bamurega vyinshi.

⁴Pilato yongera kumubaza, ati Nta co wiregura? Umve ivyo bakwagiriza ingen’ ari vyinshi.

⁵Maze Yesu ntiyasubira kwishura ijambo na rimwe, bituma Pilato atangara.

⁶Mur’ iyo misi mikuru yahora abarekurira imbohe imwe, uwo bamusavye.

⁷Hārih’ umwe yitwa Baraba, yabohanywe n’abāgararije, bishe abantu mur’ ukwo kugarariza.

⁸Ishengero riradūga, ritangura gusaba kw abagirira nk’uko yamenyereye.

⁹Pilato arababaza, ati Muragomba ko mbarekurira Umwami w’Abayuda?

¹⁰Kuko yamenye yukw ishari ari ryo ryatumye abaherezi bakuru bamutanga.

¹¹Maz’ abaherezi bakuru bosha ishengero gusaba ngw ivyoba vyiza abarekurire Baraba.

¹²Pilato yongera kubabaza, ati Non’ uwo mwita Umwami w’Abayuda, we ndamugire nte?

¹³Bongera kuyogora, bati Mubambe.

¹⁴Pilato arababaza, ati Ku ki? Yakoze ikibi ki? Maze barushiriza kuyogora cane, bati Mubambe.

¹⁵Pilato agomvye kumara ishavu ishengero, abarekurira Baraba, maz’ atanga Yesu ngw abambge, amaze kumutonagura.

¹⁶Maz’ abasoda bamujana imbere mu rugo, ari rwo boma, bahamagara ingabo zose, ziraterana.

¹⁷Bamwambika impuzu y’ishigisha, batsiba igitsibo c’amahwa, bakimwambika mu mutwe;

¹⁸batangura kumuramutsa, bati Ndagize bgakeye, Mwami w’Abayuda.

¹⁹Bamukubita irenga mu mutwe, bamuvuma amate, barapfukama, bamukomera amashi.

²⁰Bamaze kumucurīra, bamwambura ya mpuzu y’ishigisha, bamwambika iziwe mpuzu, bamurengana irembo bamushoreye kumubamba.

²¹Bafata umuntu ahita, Simoni Umunyakurene, avuye mu misozi, ni se wa Alekisandero na Rufo, ngw amutwaze umusaraba.

²²Bamushikana ahitwa i Gologota, risobanurwa ngw Ahantu h’agahanga.

²³Bamuha vino ivanze n’umuti w’umururazi, ntiyayinywa.

²⁴Baramubamba, bagabura impuzu ziwe, barazipfindira, ngo bamenye iyo umuntu wese atwara.

²⁵Igihe bāmubamba zar’ isaha zitatu.

²⁶Icandiko c’ikirego candikwa hejuru yiwe ng’ UMWAMI W’ABAYUDA.

²⁷Kandi babambana na we abambuzi babiri, umwe i buryo bgiwe, uwundi i bumoso. [

²⁸Nukw ivyanditswe birashika, ngo Yaharūranywe n’abanyavyaha.]

²⁹Abahahita baramucurīra, bazunguza imitwe, bati Yō, wewe usambura urusengero, ukarwubaka mu misi itatu,

³⁰ni wikize, wimanure ku musaraba.

³¹N’abaherezi bakuru bamucurīra bartyo, banwengurana n’abanyabgenge b’ivyanditswe, bati Yakijije abandi, we ntashobora kwikiza:

³²Kristo Umwami w’Abisirayeli ni yimanure ku musaraba ubu nyene, tubibone twizere. N’abāri babambanywe na we na bo baramutuka.

³³Maz’ isaha zitandatu zishitse, ubgīrakabiri bukorana mu gihugu cose, bushitsa kw isaha y’icenda.

³⁴Kw isaha y’icenda Yesu asemerera n’ijwi rirenga, ati Eloi, Eloi, lama sabakatani? Risobanurwa ngo Mana yanje, Mana yanje, n’iki kikumpebesheje?

³⁵Maze bamwe mu bahahagaze bavyumvise baravuga, bat’ Umve, ahamagaye Eliya.

³⁶Umwe arirukanga, yābīra sipongo,[4] ayuzuza inkarisha, ayirungikisha irenga; arayimusomesha, ati Hinge turābe ko Eliya yoza kumubambūra.

³⁷Maze Yesu avuga n’ijwi rirenga, aracīkāna.

³⁸Igihuzu gikīngiriza ahēra cane h’urusengero gitantamukamwo kubiri, uhereye hejuru ugashitsa hasi.

³⁹Umugabisha w’abasoda ijana yar’ ahahagaze bahanganye, abonye acīkānye artyo, aravuga, ati N’ivy’ ukuri, uyu muntu yar’ Umwana w’Imana.

⁴⁰Hāriho n’abagore bāri kure babirāba, muri bo hārimwo Mariya Magadalene, na Mariya nyina wa Yakobo mutoya na Yose, hārimwo na Salome.

⁴¹Abo bagore, aho yaba i Galilaya, bāramukurikira bakamukorera: kandi hāriho n’abandi bagore benshi bāri badūganye na we i Yerusalemu.

⁴²Bugorovye, kuko war’ umusi wo Kwitegura, ni wo musi utangurira isabato,

⁴³haza Yosefu w’i Arimataya, umunyekombe w’icubahiro, kandi na we yar’ areretse ubgami bg’Imana, ararinduka aja kuri Pilato, asaba ikiziga ca Yesu.

⁴⁴Ariko Pilato biramutangaza ko yoba amaze gupfa; ahamagaza wa mugabisha w’abasoda, amubaza yukw amaze umwanya apfuye.

⁴⁵Maze yumvise ivy’ uwo mugabisha amubgiye, aha Yosefu ikiziga.

⁴⁶Agura impuzu yera, arakibambūra akizingira mur’ ino mpuzu, agishira mu mva yimbge mu bitandara, atembagaza ikibuye acugaza umuryango w’imva.

⁴⁷Mariya Magadalene na Mariya nyina wa Yose babona ah’ ahambge.