Read Bibliya Yera 1951 Mariko 4 Bible Online

Mariko 4 - Bibliya Yera 1951 bible

Mariko 4

¹Atangura ukundi gusha kwigishiriza ku nkombe y’ikiyaga. Ishengero ryinshi cane rikoranira kuri we, bimutera gutambukira mu bgato buri mu kiyaga, yicaramwo, ishengero ryose riguma ku nkombe y’ikiyaga.

²Abigisha vyinshi mu migani, ababgira mur’ ukwo kwigisha kwiwe,

³ati Ni mwumve; umubivyi yasohoye imbuto.

⁴Akibiba, zimwe zigwa i ruhande y’inzira; inyoni ziraza, zirazinobagura.

⁵Izindi zigwa ku rutare, hatar’ ivu ryinshi; zica zimera vuba, kukw ata vu ryinshi ririho:

⁶izuba rirashe, ziraraba, kukw ata mizi zifise, zirūma.

⁷Izindi zigwa mu mahwa, amahwa arakura, arazinyoha, ntizama.

⁸Izindi zigwa mw ivu ryiza, ziramera, zirakura, zihunda impeke, zimwe mirongwitatu, izindi mirongwitandatu, izindi ijana, birtyo birtyo.

⁹Kand’ at’ Ūri n’amatwi yumva, ni yumve.

¹⁰Bīherereye, abāri kumwe na we na bamwe cumi na babiri bamubaza iyo migani;

¹¹arabishura, ati Mwebge mwahawe ibanga ry’ubgami bg’Imana, arikw abo hanze babarirwa vyose mu migani:

¹²ngo kurāba barābe, yamara ntibavyitegereze; kwumva bavyumve, yamara ntibabitahure; ngo kumbure bohindukira bagaharirwa.

¹³Kand’ arababaza, ati Ntimuzi uwo mugani? Non’ imigani yose muzoyitahura mute?

¹⁴Umubivyi abiba ijambo ry’Imana.

¹⁵Ab’i ruhande y’inzira, ah’ iryo jambo ribibga, iyo bahejeje kwumva, Satani aca aza uwo mwanya, akabakūramw’ iryo jambo ryabibge muri bo.

¹⁶N’aba n’uko, ni bo bābibge ku rutare; iyo bumvise iryo jambo, baca baryākīrana umunezero,

¹⁷ntibagire imizi muri bo, ariko bahagarara umwanya muto, maz’ iyo bādutsweko n’amarushwa bo n’akadenderezo bazira iryo jambo, bica bibagwisha.

¹⁸Abandi ni bo bābibge mu mahwa, abo ni bo bumva iryo jambo,

¹⁹maz’ umwitwaririko w’ivy’ isi n’uruhendo rw’ubutunzi no kwifuza ibindi, iyo bibinjiyemwo, binyoha iryo jambo, rikaba ikirumbirane.

²⁰Abābibge mw ivu ryiza, abo ni bo bumva iryo jambo bakaryemera, bagahunda impeke, umwe mirongwitatu, uwundi mirongwitandatu, uwundi ijana, birtyo birtyo.

²¹Kand’ arababaza, ati Mbeg’ itara rizanwa ngo baryubikekw igisimbo canke barishire mu rutara, ntirishirwa ku gitereko caryo?

²²Kukw ata canyegejwe kitazoserurwa, cank’ icagizwe ibanga kitazoja ahabona.

²³Ūri n’amatwi yumva, ni yumve.

²⁴Kand’ arababarira, ati Mwiyubare mu vyo mwumva. Ingero mugeramwo ni yo muzogererwamwo, kandi muzorengerezwa:

²⁵kuk’ ūfise azohabga, arik’ ūdafise azokwakwa n’ico yar’ asanzwe afise.

²⁶Yongera kubabgira, at’ Ubgami bg’Imana busa n’umuntu yabivye imbuto mw ivu,

²⁷bgije agasinzira, bugaca akavyuka, imbuto zikamera, zigakura, atazi ingene zakuze.

²⁸Ivu rimeza ryonyene, habanza kuba ibironge, hanyuma hakaba imiyange, hanyuma hakaba amahundo atēngēngeye impeke.

²⁹Maz’ imirima yeze, aca ayitemesha umuhoro, kukw igihe c’ishwābūra kigeze.

³⁰Kand’ arababaza, at’ Ubgami bg’Imana tubushushanye n’iki? Canke tubusobanurishe umugani ki?

³¹Busa n’akabuto ka sinapi, iyo gatewe mw ivu, nah’ ari kanzinya hanyuma y’imbuto zose ziri mw isi;

³²arikw iyo gatewe, karakura, kakaba kanini, kakaruta ibirimwa vyose, kagashamika amashami manini, kand’ inyoni zo mu kirere zishobora kwārika ivyāri mu gitūtu cako.

³³Kand’ ababgira ijambo ry’Imana mu migani myinshi imwe n’iyo, uko bashobora kwumva.

³⁴Kand’ atabaciriye umugani nta co yababgira, ariko yihereranye n’abiwe bigishwa akabibasobanurira vyose.

³⁵Kur’ uwo musi bugorovye, arababgira, ati Tujabuke tuje hakurya.

³⁶Basiga abantu hano, bamujana mu bgato yahozemwo, kand’ ayandi mato yari kumwe na bo.

³⁷Nuko haza inkūbi ikomeye y’umuyaga, imipfunda yisuka mu bgato, bgariko buruzura.

³⁸Ariko we yar’ aryamye mu mutwe w’inyuma, yiseguye umusego yisinziriye. Baramukangura, baramubaza, bati Mwigisha, ntubabaye ko turiko turapfa?

³⁹Arikangura, azibiza ingunza, abarira ikiyaga, ati Hora, utekereze. Umuyaga uraca, haba agahwekere rwose.

⁴⁰Arababaza, ati N’iki kibateye ubgoba? Ntimurizera?

⁴¹Baratinya, bagira ubgoba bginshi, barabazanya, bati Mbeg’ uyu n’umuntu ki, umuyaga n’ikiyaga ko bimwumvira?