Read Bibliya Yera 1951 Luka 22 Bible Online

Luka 22 - Bibliya Yera 1951 bible

Luka 22

¹Imisi mikuru y’imitsima itambiwe, yitwa Pasika, yagira ishike.

²Abaherezi bakuru n’abanyabgenge b’ivyanditswe barondera uburyo bgo kumwica, kuko batinya abantu.

³Satani yinjira muri Yuda ari we Isikaryota, yari mu gitigiri ca bamwe cumi na babiri.

⁴Aragenda, aja inama n’abaherezi bakuru n’abakuru b’abashibamyi b’urusengero, y’uburyo bgo kumubaronkera.

⁵Baranezerwa, basezerana kumuha amahera y’ifeza.

⁶Na we aremera, arondera uburyo bgo kumubaronkera, ishengero ritariho.

⁷Umusi w’imitsima itambiwe urashika, uwo bakwiye kubāgak’ umwagazi w’intama wa Pasika.

⁸Atuma Petero na Yohana, arababarira, ati Ni mugende, mudutegurire ivya Pasika, kugira ngo turye.

⁹Baramubaza, bat’ Ugomba ko tubitegurira hehe?

¹⁰Arabishura, at’ Umve, mumaze gushika mu gisagara, murahūra n’umugabo yikoreye umubindi w’amazi; mumukurikire mu rugo ajamwo.

¹¹Mubgire nyen’ urugo, mut’ Umwigisha agize ngw Indāro iri hehe, ah’ asangirira ivya Pasika n’abigishwa biwe?

¹²Na we arabereka icumba kinini co mu nzu yo hejuru gitunganijwe: abe ari co muteguriramwo.

¹³Baragenda, babisanga uko yabibabariye: bategura ivya Pasika.

¹⁴Igihe gishitse, aricara ngw arye, kand’ intumwa na zo zicarana na we.

¹⁵Arababgira, ati Kwifuza nifuje cane gusangira namwe ivy’ iyi Pasika, ntarababazwa.

¹⁶Ndababgire, Sinzokwongera kuyiryako, kugeza ah’ izoshikira mu bgami bg’Imana.

¹⁷Yābīra igikombe, agishimira Imana, arababarira, ati Mwābīre iki, mugisangire:

¹⁸kuko mbabgira yuk’ uhereye none ntazokwongera kunywa ku nzabibu, kugeza ah’ ubgami bg’Imana buzozira.

¹⁹Yābīra umutsima, awushimira Imana, arawumanyagura, arawubaha, arababgira, at’ Uyu n’umubiri wanje ubatangiwe: murakore murtya kugira ngo kibe icibutso canje.

²⁰N’igikombe akigenza artyo bahejeje kurya, arababgira, at’ Iki gikombe n’isezerano risha ryo mu maraso yanje, abaviriye.

²¹Kandi rāba, ukuboko kw’ ūngura kuri kumwe nanje ku meza.

²²N’ukuri, Umwana w’umuntu aragenda, nk’uko vyashinzwe: arik’ uwo muntu amugura azobona ibara.

²³Batangura kubazanya, ngo ni nde muri bo agira akore ico kintu.

²⁴Maze havyuka impāri muri bo, z’uwo bagereranyako kw ar’ umukuru uw’ ari we.

²⁵Arababgira, at’ Abami b’amahanga bayatwaza amanyama, n’abafise ububasha bgo kuyaganza bitwa ba rutungaboro.

²⁶Ariko mwebge s’uko: mugab’ umukuru muri mwebge abe nk’umuto, n’ūganza abe nk’ūbakorera.

²⁷Umukuru ni nde, n’ūkorerwa, canke n’ūmukorera? Mbega s’ūkorerwa? Ariko jeho ndi hagati muri mwebge mmeze nk’ūbakorera.

²⁸Ni mwebge mwamanye nanje mu vyo nageragejwe.

²⁹Nanje mbabīkiye ubgami, nk’uko Data yabumbīkiye,

³⁰ngo muze murīre, munywere ku meza yanje mu bgami bganje: kandi muzokwicara ku ntebe z’icubahiro, mucire imanza imiryango y’Abisirayeli, ukw ar’icumi n’ibiri.

³¹Ati Simoni, Simoni, rāba Satani yabasavye ngw abagosore nk’ingano;

³²ariko wewe nagusengeye ng’ukwizera kwawe ntiguhere. Nawe ni wamara guhinduka, uz’ uremeshe bagenzi bawe.

³³Aramubgira, ati Mugenzi, niteguye kujana nawe no mw ibohero no mu rupfu.

³⁴Aramubgira, ati Petero, ndakubgire, Inkoko itarabika uyu musi, uhava unyihakana gatatu ngo ntunzi.

³⁵Kand’ arababaza, ati Hamwe nabatuma mudafise umupfuko w’amahera cank’ isaho cank’ inkweto, har’ ico mwabuze? Baramwishura, bati Nta co twabuze.

³⁶Arababgira, at’ Ariko noneho, ūfise umupfuko w’amahera awujane, n’ūfise isaho ayijane; kand’ ūdafise inkota, ashōre impuzu yiwe ayigure.

³⁷Ndababgire, Ibi vyanditswe bikwiye kunshikako, ngo Yaharūranywe n’abanyabicumuro. Kukw ivyanje bigira bishike.

³⁸Baramubgira, bati Mushingantahe, ehe, ngizi inkota zibiri. Arababgira, ati Ziramaze.

³⁹Arasohoka, aja ku musozi wa Elayono, nk’uko yamenyereye: abigishwa biwe na bo baramukurikira.

⁴⁰Ashitse aho hantu, arababarira, ati Ni musenge, kugira ngo ntimuje mu mosha mabi.

⁴¹Atandukana na bo, ashika nk’ahoterwa ibuye, arapfukama, arasenga,

⁴²ati Data, asangw’ ubigomba, kūra iki gikombe, kindēngāne: ariko ntibibe uko jewe ngomba, yamara bibe uko wewe ugomba.

⁴³Umumarayika aramwiyereka, avuye mw ijuru, amuha intege.

⁴⁴Arushirije kwicwa n’umubabaro, ashishikara gusenga cane, icuya ciwe kiba nk’ibitonyanga binini vy’amaraso bitonyanga hasi.

⁴⁵Amaze gusenga, ava hasi aja ah’abigishwa bari, asanga basinzirijwe n’umubabaro.

⁴⁶Arababaza, ati N’iki gitumye musinzira? Ni muvyuke, musenge, ntimuje mu mosha mabi.

⁴⁷Akivuga, haza igitero kizanywe n’uwitwa Yuda, umwe muri bamwe cumi na babiri, abagiye imbere: yēgēra Yesu, ngw amusome.

⁴⁸Yesu aramubaza, ati Yuda, mbeg’ utangisha Umwana w’umuntu kumusoma?

⁴⁹Abāri kumwe na we babonye ibigira bibeho, baramubaza, bati Mugenzi, tubakubite inkota?

⁵⁰Umwe muri bo ayikubita umusavyi w’umuherezi mukuru, amuca ugutwi kw’i buryo.

⁵¹Yesu arababarira, ati Geza aho. Akora ku gutwi kwiwe, aramukiza.

⁵²Yesu abaza abaherezi bakuru n’abakuru b’abashibamyi b’urusengero n’abashingantahe bamuziye, ati Mbega munziye nk’umwambuzi, muzanye inkota n’amahiri?

⁵³Imisi yose nāmana namwe mu rusengero ko mutāramvuye amaboko ngo mumfate; arikw iki n’igihe canyu n’ic’ ububasha bg’umwiza.

⁵⁴Baramufata, baramujana, bamwinjiza mu nzu y’umuherezi mukuru, ariko Petero amuja inyuma barenga arenguka.

⁵⁵Bacanye umuriro mu rugo hagati, bicaye hamwe, Petero yicara hagati muri bo.

⁵⁶Incoreke imubona yicaye ahabona, imwitegereje iravuga, iti N’uyu yari kumwe na we.

⁵⁷Na we arabihakana, at’ Eka nyina wanje, sindanamuzi.

⁵⁸Hashize akanya gato, uwundi aramubona, aramubgira, ati Nawe nyene ur’ uwo muri bo. Petero aramwishura, at’ Eka wa muntu, si jewe.

⁵⁹Hashize umwanya nk’isaha imwe, uwundi abivuga yigumiye, ati N’ivy’ ukuri, uyu yari kumwe na we, bitayeko n’Umunyagalilaya.

⁶⁰Petero aramubgira, at’ Eka wa muntu, sinzi n’ivy’ uvuze. Akivuga, uwo mwanya inkoko irabika.

⁶¹Umwami Yesu arakebuka, yitegereza Petero. Petero yibuka rya jambo ry’Umwami, ingene yamubgiye, at’ Uyu musi inkoko itarabika, uja kunyihakana gatatu.

⁶²Arenga irembo, araturika ararira.

⁶³Abagabo bāri bafashe Yesu baramushinyagurira, baramutonagura,

⁶⁴bamupfuka mu maso, baramubaza, bati Pfīndūra: ni nde agukubise?

⁶⁵N’ibindi vyinshi babimuvuga bamutuka.

⁶⁶Iryo joro rikeye, hakorana abashingantahe b’ubgo bgoko, ni bo baherezi bakuru n’abanyabgenge b’ivyanditswe, bamujana mw ikombe ryabo, baramubaza,

⁶⁷bati Namb’ uri Kristo, tubgire. Arababgira, ati N’iyo nobabgira, ntimwovyemera;

⁶⁸n’iyo nobabaza, ntimwonyishura.

⁶⁹Arik’ uhereye none Umwana w’umuntu azoba yicaye i buryo bg’ububasha bg’Imana.

⁷⁰Bose baramubaza, bati None rer’ ur’ Umwana w’Imana? Arabishura, ati Murarivuze ko ndi we.

⁷¹Bati Turacaronderera iki ivyabona? Kuk’ ubgacu tuvyīyumviye mu kanwa kiwe.