Read Bibliya Yera 1951 Gusubira mu Vyagezwe 1 Bible Online

Gusubira mu Vyagezwe 1 - Bibliya Yera 1951 bible

Gusubira mu Vyagezwe 1

¹Aya ni yo majambo Mose yabaririye Abisirayeli bose hakuno ya Yorodani mu bugaragwa, mu kiyaya citwa Araba, aharābana n’i Sufu, hagati y’i Parani n’i Tofeli n’i Labani n’i Haseroti n’i Di‐zahabu.

²Uvuye i Horebu, ukaja ī Kadeshi‐baruneya, uciye ku musozi Seyiri, n’urugendo rw’ imisi cumi n’umwe.

³Mu mwaka wa mirongwine, mu kwezi kw’icumi na rimwe, ku musi wakwo wa mbere, ni ho Mose yabaririye Abisirayeli ivyo Uhoraho yamugeze kubabgira vyose;

⁴amaze gutsinda Sihoni umwami w’Abamori yaba i Heshiboni, na Ogi umwami w’i Bashani yaba ahitwa Ashitaroti n’ahitwa Edireyi.

⁵Hakuno ya Yorodani, mu gihugu c’i Mowabu, ni ho Mose yatanguriye gusobanura ibi vyagezwe,

⁶at’ Uhoraho Imana yacu yatubaririye i Horebu, at’ Igihe mumaze kur’ uyu musozi kirahāgīje:

⁷ni mukebanuke, mufate inzira, muje mu mugamba w’Abamori n’ahandi hose hahereranye na ho mu kiyaya citwa Araba, hose mu mugamba n’ahaciye bugufi, n’i Negebu, no mu kiyaya c’ikiyaga mu gihugu c’Abanyakanani, n’i Lebanoni, muze murinde mushitsa ku ruzi runini Efurate.

⁸Ati Nuko rāba, igihugu ndakibashize imbere, ni mucinjire, mucegukire, igihugu jewe Uhoraho narahiye ba sogokuruza banyu, Aburahamu na Isaka na Yakobo, ko nzobaha, bo n’uruvyaro rwabo ruzobakurikira.

⁹Maze nanje ico gihe narababgiye, nti Sinshobora kubaterura jenyene.

¹⁰Nt’ Uhoraho Imana yanyu yarabagwije, non’ ehe rāba munganya ubginshi n’inyenyeri zo kw ijuru.

¹¹Nt’ Uhoraho, Imana ya ba sogokuruza, arakabagwiza gushitsa ibihetangabo igihumbi, abahezagire, nk’uko yabasezeraniye!

¹²Nti None noshobora nte guterura jenyene ukugorana kwanyu n’uburemerezi bganyu n’ ugutongana kwanyu?

¹³Nti Ni mutoranye mu miryango yanyu abantu b’ubgenge, bazi gusobanukirwa, bamenyekana, ndabagire abakuru bo kubaganza.

¹⁴Namwe muranyishura, mut’ Inama yawe ni nziza.

¹⁵Nuko rero ntoranya abakuru mu miryango yanyu, abantu b’ubgenge bamenyekana, mbagira abakuru bo kubaganza, bamwe igihumbi‐igihumbi, abandi ijana‐ijana, abandi mirongwitanu‐itanu, abandi cumi‐cumi, ngo babarōngōre nk’ukw imiryango yanyu ingana.

¹⁶Kandi mur’ ico gihe nihanikirije abacamanza banyu, nti Ni mwumvirize imanza za bene wanyu, mucire urw’ ukuri umuntu na mugenzi we, cank’ umuntu avuganye n’umunyamahanga aba i we.

¹⁷Nti Ntimuze muce urwa nkunzi, nt’ Ariko muze mwumvirize aboroshe n’abahambaye, mubanganye: nti Ntimuze mutinye umuntu ku kigohe, kukw imanza ar’ iz’ Imana. Nti Kand’ urubanza ruzobananira, muze murunzanire, ndarwumvirize, ndaruce.

¹⁸Nukw ico gihe nabageze ivyo mukwiye gukora vyose.

¹⁹Nuko tuvuduka i Horebu, duca muri bga bugaragwa bunini buteye ubgoba, turaburangiza, nk’ uko mwabibonye; tujana inzira irora mu mugamba w’Abamori, nk’uk’ Uhoraho Imana yacu yatugeze; dushika i Kadeshi‐baruneya.

²⁰Maze ndababarira, nt’ Aha mushitse ni mu mugamba w’Abamori, igihugu Uhoraho Imana yacu aduhaye.

²¹Nti Rāba, Uhoraho Imana yanyu ico gihugu akibashize imbere; nti Dūga mucinjire, nk’uk’ Uhoraho Imana ya ba sogokuruza yababariye; nti Ntimutinye, ntimuranduke imitima.

²²Maze muraheza mwese muza kuri jewe, mut’ Enda dutume abatasi, babanze kudutatira ico gihugu, bagaruke batubarire inzira twodūgana, n’ibisagara tuzoshikirak’ uko bimeze.

²³Iyo nama nca ndayishima, mbatoranyamw’ abantu cumi na babiri, umwe‐umwe ukw imiryango yanyu ingana.

²⁴Bafata inzira, badūga uwo mugamba, bashika mu gihogoro citwa Eshikoli, barahatata.

²⁵Bamura ku vyo ico gihugu cama, barabituzanira, batubarira inkuru, bat’ Igihugu Uhoraho Imana yacu aduhaye ni ciza.

²⁶Yamara mweho ntimwemera kudūga, muragarariza, mwanka icagezwe c’Uhoraho Imana yanyu.

²⁷Mwidodombera mu mahema yanyu, mut’ Uhoraho kukw atwanka, ni co catumye adukūra mu gihugu ca Egiputa, ngw adutange mu maboko y’Abamori, baturandure.

²⁸Muti None tudūga tuja hehe? Muti Bagenzi bacu ko baturanduye imitima, ngw Abantu baho ni banini, kandi baradusumba; ngw Ibisagara vyabo ni binini, bizitijwe inzitiro z’ amabuye zigera mw ijuru; ngo Mbere babonyeyo n’Abanaki.

²⁹Maze nca ndababarira, nti Ntimuranduke imitima, kandi ntimubagirire ubgoba.

³⁰Nt’ Uhoraho Imana yanyu, umwe ahora abaja imbere, ni we azobarwanira, nk’uko mwabonye ivyo yabakoreye vyose muri Egiputa,

³¹no mu bugaragwa, aho Uhoraho Imana yanyu yagenda abaterura nk’ uko mubizi, nk’uk’ umugabo aterura umwana wiwe, mu rugendo mwagenze rwose, nti Gushitsa aho mwashikiye aha hantu.

³²Ariko naho vyabaye birtyo, ntimwizeye Uhoraho Imana yanyu,

³³yahora abaja imbere mu nzira, kugira ngw abaronderere aho mushinga amahema, mw ijoro akagendera mu muriro, kugira ngw abereke inzira mukwiye gucamwo, ku murango akagendera mu gicu.

³⁴Maz’ Uhoraho yumvise amagambo yanyu, araraka, ararahira,

³⁵ati N’ukuri hakazogira n’umwe wo mur’ aba bantu b’uru runganwe rw’ abanyakibi, azobona igihugu ciza narahiye ko nzoha ba sekuruza;

³⁶Ati Shiti Kalebu mwene Yefune, uyo we azokibona, ati Kandi nzomuha igihugu yaciyemwo, ndagihe n’uruvyaro rwiwe, ati Kuko yankurikiye muri vyose jewe Uhoraho.

³⁷Nanje, Uhoraho yandakiye kubganyu, ati Nawe ntuzokijamwo;

³⁸ati Yosuwa mwene Nuni, wa mutumwa wawe, ni we azokijamwo, ati Nuk’ umuremeshe, kukw ari we azocinjiza Abisirayeli.

³⁹Ati Kand’ ibibondo vyanyu, ivyo muvuze ko bizoba abanyagano, n’abana banyu bataraca ubgenge ngo batandukanye ikibi n’iciza, ni bo bazokijamwo, ni bo nzogiha, bacegukire.

⁴⁰At’ Ariko mwebge ni muhindukire, muje mu bugaragwa, mujane inzira ija ku Kiyaga Gitukura.

⁴¹Maze murambarira, muti Koko twacumuye k’Uhoraho: turadūze, turwane, nk’uk’ Uhoraho Imana yacu yatubariye nyene. Nuko mwese muhagatira ibirwanishwa vyanyu, mupfa kugāgaza ngo mudūge uwo mugamba.

⁴²Maz’ Uhoraho arambarira, ati Babgire uti Ntimudūge, kandi ntimurwane, kuko ntari muri mwebge, mwoye gutsindwa n’abansi banyu.

⁴³Nuko ndabibabarira, ntimwavyumvira, ariko mugarariza ijambo ry’Uhoraho, mupfa guhāngāra, mudūga uwo mugamba.

⁴⁴Abamori babayo barabatega, barabarwanya, barabakinagiza, nk’ukw inzuki zikinagiza umuntu, babīca urugenda, kuva i Seyiri gushitsa i Horuma.

⁴⁵Maze mugarutse, muririra imbere y’Uhoraho, ariko we ntiyashira umutima ku vyanyu, canke ngw abatege amatwi.

⁴⁶Nuko mumara igihe kirekire i Kadeshi, nk’uko mubizi.