Read Bibliya Yera 1951 Gusubira mu Vyagezwe 10 Bible Online

Gusubira mu Vyagezwe 10 - Bibliya Yera 1951 bible

Gusubira mu Vyagezwe 10

¹Mur’ ico gihe Uhoraho arambarira, ati Wibāzire ibisate vy’amabuye bibiri bisa n’ivya mbere, uheze udūge uyu musozi uze iyo ndi, kand’ ubāze n’isandugu mu giti.

²Ati Nanje ndaheza nandike kur’ ivyo bisate amajambo yari ku vya mbere, bimwe wamena, uheze uz’ ubishire mur’ iyo sandugu.

³Nuko mbāza isandugu mu giti citwa umushita, mbāza n’ ibisate bibiri vy’amabuye bisa n’ivya mbere, ndūga uwo musozi mfise ivyo bisate vyompi mu minwe.

⁴Yandika kur’ ivyo bisate amajambo ahwanye n’ayo yanditse mbere, ari vyo vyagezwe cumi, ivyo Uhoraho yababaririye kur’ uwo musozi, abivugiye mu muriro, kuri wa musi mwari mukoranye: Uhoraho arabimpa.

⁵Nuko ndahindukira, mmanuka uwo musozi, nshira ivyo bisate mw isandugu nabāje; kandi biracarimwo, nk’uk’ Uhoraho yambariye.

⁶(Abisirayeli bavuduka i Beroti‐Bene‐Yakani, bashika i Mosera; ni ho Aroni yapfiriye, bamuhambayo. Eleyazari umwana wiwe asubira ku buherezi bgiwe.

⁷Bavudukayo, bashika i Gudigoda; bavuduka i Gudigoda bashika i Yotibata, igihugu kirimw’ imigezi.

⁸Mur’ ico gihe Uhoraho arobanura umuryango w’Abalewi kugira ngo barerure ya sandugu y’ isezerano ryiwe, kandi ngo bahagarare imbere yiwe bamuhereze, bahezagire n’abantu mw izina ryiwe, nk’uko biri na bugingo n’ ubu.

⁹Ni co catumye Abalewi batagira umugabane cank’ ishamvu muri bene wabo; Uhoraho ni we shamvu yabo, nk’uko yababgiye, ari we Uhoraho Imana yanyu.)

¹⁰Nuko namaze kur’ uwo musozi imisi mirongwine n’amajoro mirongwine, nk’ubga mbere: Uhoraho no mur’ ico gihe na co aranyumvira, ntiyabarandura.

¹¹Maz’ Uhoraho arambarira, ati Va hasi, ufate urugendo, uje aba bantu imbere, kugira ngo binjire igihugu narahiye ba sekuruza ko nzokibaha, bacegukire.

¹²None rero, yemwe Bisirayeli, mbega har’ ikindi Uhoraho Imana yanyu abagombako, atar’ ukumwubaha, no kugendera mu nzira ziwe zose, no kumukunda, no kumukorera n’imitima yanyu yose n’ubugingo bganyu bgose,

¹³no kwitondera ivyagezwe vyiwe n’ amabgirizwa yiwe, ivyo mbageze uyu musi kugira ngo mumererwe neza?

¹⁴Ereg’ Uhoraho Imana yanyu ni we Nyen’ ijuru, mbere ni Nyen’ ijuru risumba ayandi, bo n’isi n’ibirimwo vyose.

¹⁵Ariko rero, Uhoraho yarangirije umutima kuri ba sogokuruza, arabakunda, atoranya n’uruvyaro rwabo ruzoza hanyuma, ni rwo mwebge, abasumbisha ayandi mahanga yose, nk’uko biri na bugingo n’ubu.

¹⁶Nuko mukūreh’ ukudakebga kwo mu mitima yanyu, kandi ntimukomeze kugamika amazosi.

¹⁷Kuk’ Uhoraho Imana yanyu ar’ Imana isumba izindi, n’Umwami asumba abandi, n’ Imana ihambaye, n’Inyabushobozi iteye ubgoba, idatinya abantu ku kigohe, itarya ingurire.

¹⁸Icira imanza impfuvyi n’abapfakazi, ikunda inyambukīra, ikayigaburira, ikayambika.

¹⁹Nuko rero mukunde inyambukīra, kuko namwe mwar’ inyambukīra mu gihugu ca Egiputa.

²⁰Mwubahe Uhoraho Imana yanyu, abe ari we musaba, mwifatanye na we akaramata, izina ryiwe ribe ari ryo murahira.

²¹Ni we shimwe ryanyu, ni we Mana yanyu, yabakoreye vya bihambaye biteye ubgoba, ivyo amaso yanyu yiboneye.

²²Ba sogokuruza banyu bamanutse muri Egiputa ar’ abantu mirongwirindwi: non’ Uhoraho Imana yanyu yabahinduye nk’inyenyeri zo kw ijuru mu kuba benshi.