Read Bibliya Yera 1951 Gusubira mu Vyagezwe 13 Bible Online

Gusubira mu Vyagezwe 13 - Bibliya Yera 1951 bible

Gusubira mu Vyagezwe 13

¹Muri mwebge ni hāduka umuvugishwa cank’ umurōsi, akabaha ikimenyamenya cank’ akababarira igitangaza,

²ico kimenyamenya cank’ ico gitangaza kigashika, ico yababariye, ati Ni cashika tuze tugendanire izindi mana, tuzisabe; kand’ ar’ imana mutigeze kumenya;

³ntimuze mwemere amagambo y’uwo muvugishwa canke y’uwo murōsi, kuk’ Uhoraho Imana yanyu azoba abagerageza, ngw amenye yuko mumukundisha imitima yanyu yose n’ubugingo bganyu bgose.

⁴Ariko muze mugendanire Uhoraho Imana yanyu, mumwubahe, mwitondere ivyagezwe vyiwe, mumwumvire, abe ari we musaba, mwifatanye na we akaramata.

⁵Kand’ uwo muvugishwa cank’ uwo murōsi baze bamwice, kukw azoba avuze ibibatera kugarariza Uhoraho Imana yanyu, n’ivyo kubakūra mu nzira Uhoraho Imana yanyu yabarangiye ngo muyicemwo, kand’ ari we yabakūye mu gihugu ca Egiputa, akabagobōtora, akabakūra mu nzu y’ ubuja. Uko az’ abe ari ko mukūra ikibi hagati muri mwebge.

⁶Mu bo muvukana canke muri bene nyoko, canke mu bahungu banyu canke mu bakobga banyu, canke mu bagore banyu mupfumbatirana, canke mu bakunzi banyu b’amagara, muri ben’ abo ni hagira uwo yosha muri mwebge mu mpisho, ati Tugende dusabe izindi mana; (kand’ ar’ izo mutigeze kumenya, mwe na ba sogokuruza;

⁷ar’ imana zo mu mahanga abakīkije, namb’ ar’ ayoba hafi yanyu canke ya kure, uhēreye ku mpera y’isi, ugashitsa ku yindi);

⁸wewe wohejwe ntuz’ umwemerere, ntuz’ umwumvire; ntuz’ umugirire akagongwe, canke ng’umugirire ikibabarwe, canke ng’ umuhishīre;

⁹ariko ntuz’ ubure kumwica: ukuboko kwawe az’ abe ari kwo gutangura kumwica, maze habone gukurikirako n’ abandi bantu bose.

¹⁰Mu kumwica, uz’ umwicishe amabuye, kuko yagerageje kugukwegakwega ng’ uve k’Uhoraho Imana yawe, yagukūye mu gihugu ca Egiputa, mu nzu y’ubuja.

¹¹Abisirayeli bose bazovyumva, batinye, boye kwongera gukorera ikibi kingana girtyo hagati muri mwebge.

¹²Ni mwaramuka mwumvise inkuru mu gisagara kimwe mu vyo Uhoraho Imana yanyu agiye kuzobaha ngo mubibemwo, bavuga,

¹³bati Hādutse abagesera muri mwebge bariko barakwegakwega abo mu gisagara cabo, bat’ Ingo tugende, dusabe izindi mana, kand’ ar’ izo mutigeze kumenya;

¹⁴muze mubibariritse, mubicishe agace, mubihwēbūtse mushirutse umwete. Maze ni mwasanga ar’ ivy’ ukuri, ata mazinda, yuk’ ubuyobe bungana burtyo bukorerwa hagati muri mwebge;

¹⁵ntimuze mubure kuririkisha inkota ababa mur’ ico gisagara, mugitikizanye n’ ibirimwo vyose, muririkishe inkota amasho yaho.

¹⁶Kandi mukoranye amasahu yose yo muri co, muyarunde mu kibuga caho, muturire ico gisagara n’amasahu yaco yose, bibe nk’ikimazi co kwoswa ciramvuriye, gishikaniwe Uhoraho Imana yanyu; ico gisagara kize gihinduke ikigūngūzi c’amasakamburira ibihe vyose: ntikize gisubire kwubakwa ukundi.

¹⁷Muhīrahīre ntihaze hagire ikintu na kimwe mur’ ivyo bijiririjwe muzokozak’ ukuboko, kugira ng’ Uhoraho abone kwigarura, areke uburake bgiwe bg’inkazi, abagirire imbabazi n’ikigongwe, abagwize nk’uko yarahiye ba sogokuruza banyu kw azobikora,

¹⁸ni mwamara kwumvira ijwi ryiwe, Uhoraho Imana yanyu, mukitondera ivyagezwe vyiwe vyose mbagera uyu musi, mugakora ivyo Uhoraho Imana yanyu abona kw ari vyiza.