Read Bibliya Yera 1951 Gusubira mu Vyagezwe 16 Bible Online

Gusubira mu Vyagezwe 16 - Bibliya Yera 1951 bible

Gusubira mu Vyagezwe 16

¹ Ukwezi kwa Abibu muze mwame mukugira gukuru, mwitondere ivya Pasika y’Uhoraho Imana yanyu; kuko mu kwezi kwa Abibu ari ho Uhoraho Imana yanyu yahenze mw ijoro akabakūra muri Egiputa.

²Muze mutange ivya Pasika, mubihe Uhoraho Imana yanyu kw ikimazi, mubikūye mu mikuku yanyu no mu masho yanyu, mubitangire ahantu Uhoraho azoba yātoranije ngw ahashire izina ryiwe ngo rihabe.

³Ntimuze mugire imitsima yambiwe mubikoza; muze mumare imisi ndwi murya imitsima itambiwe yavyo, ari yo mitsima y’ amagorwa, kuko mwavuye mu gihugu ca Egiputa ikibiriraho; kugira ngw imisi yose muzoba mukiriho, muze mwame mwibuka wa musi mwaviriye mu gihugu ca Egiputa.

⁴Mur’ iyo misi ukw ar’ indwi ntihaze hagire icitwa umwambiro kibabonekamwo, mu gihugu canyu cose; kandi ku kimazi muzotanga ku musi wa mbere ku mugoroba, ntihaze hagire inyama zaco zirāra ngo zishitse mu gitondo.

⁵Ntimuze mutangire ikimazi ca Pasika mu gisagara na kimwe mu vyo Uhoraho Imana yanyu azobaha:

⁶arikw ahantu Uhoraho Imana yanyu azoba yātoranije ngw ahashire izina ryiwe ngo rihabe, az’ abe ari ho mutangira ico kimazi ca Pasika ku mugoroba, ku kirengazuba, ari co gihe nyene mwaviriye muri Egiputa.

⁷Aho hantu nyene Uhoraho Imana yanyu azoba yātoranije az’ abe ari ho mutara inyama zaco, muhazirīre; mu gitondo muheze muhindukire, musubire mu mahema yanyu.

⁸Imitsima itambiwe iz’ ibe ari yo murya kumara imisi itandatu; maze ku wugira indwi muze mugire ikoraniro ry’agahebuza, mushengereye Uhoraho Imana yanyu; ntihaze hagire igikorwa muwukorako.

⁹Muze muharūre amasabato ndwi; muyaharūre muhereye igihe mutanguriye guha amahonda umuhoro.

¹⁰Umusi ukurikira ayo masabato ndwi muze muwugire mukuru wo kuninahaza Uhoraho Imana yanyu, mu gutanga amashikanwa, muyatanze nk’uko muvyigombeye, nk’ukw azoba yarabahaye umugisha;

¹¹muheze munezererwe imbere yiwe, Uhoraho Imana yanyu, ha hantu nyene azoba yātoranije ngw ahashire izina ryiwe ngo rihabe, munezeranwe n’ abahungu banyu n’abakobga banyu, n’abagurano banyu n’abaguranokazi banyu, n’Abalewi baba i wanyu, n’inyambukīra n’ impfuvyi n’abapfakazi baba muri mwebge.

¹²Kandi muze mwibuke yuko mwari mu buja muri Egiputa, mwitondere ayo mabgirizwa, muyashitse.

¹³Muze mugire imisi mikuru y’insāgo kumara imisi ndwi, ni mwaheza kubīka imihūre mwāhūriye ku mbuga, no kwengūra vino zo mu mato yanyu.

¹⁴Kandi muze munezererwe iyo misi mikuru, mwe n’abahungu banyu n’abakobga banyu, n’abagurano banyu n’abaguranokazi banyu, n’ Abalewi, n’inyambukīra, n’impfuvyi n’abapfakazi bar’ i wanyu.

¹⁵Iyo misi ukw ar’ indwi muze muyigire mikuru yo kuninahaza Uhoraho Imana yanyu muri ha hantu azoba yātoranije; kuk’ Uhoraho Imana yanyu azoba yabahaye umugisha mu myimbu yanyu yose, no mu bikorwa vyose mwakoze, kandi muzoba munezerewe rwose.

¹⁶Haze harenguke izinamuhungu wese imbere y’Uhoraho Imana yanyu gatatu‐gatatu mu mwaka, barenguke ha hantu azoba yātoranije. Baze mu misi mikuru y’imitsima itambiwe, no ku musi ukurikira ya masabato ndwi, no mu misi mikuru y’insāgo; ariko ntibaze barenguke imbere y’ Uhoraho iminwe misa.

¹⁷Umuntu wese az’ atange ukw ashoboye, nk’uk’ Uhoraho Imana yanyu azoba yabahaye umugisha.

¹⁸Muze mushireh’ abacamanza n’abashingantahe mu bisagara vyanyu vyose Uhoraho Imana yanyu azobaha, nk’ukw imiryango yanyu iri; baze bacire abantu imanza ziroranye.

¹⁹Ntimuze mugoreke imanza, ntimuze muce urwa nkunzi, canke ngo murye ingurire: kukw ingurire ihuma amaso y’ abanyabgenge, ikagoreka imanza z’ukuri.

²⁰Ivy’ ukuri, mber’ ivy’ ukuri vyonyene abe ari vyo mutumbera mu guca imanza, kugira ngo mubone kubaho, mugume muri ca gihugu mwashikiriye, ico Uhoraho Imana yanyu yabahaye.

²¹Ntimuze mugire igiti c’ubgoko ubg’ ari bgo bgose mushingira Ashera, i ruhande y’igicaniro c’Uhoraho Imana yanyu, ico muzokwubaka.

²²Kandi ntimuze mugire ibuye mushinga nk’inkingi, kand’ ar’ ikintu Uhoraho Imana yanyu yanka.