Read Bibliya Yera 1951 Gusubira mu Vyagezwe 17 Bible Online

Gusubira mu Vyagezwe 17 - Bibliya Yera 1951 bible

Gusubira mu Vyagezwe 17

¹Ntimuze mugire imasa cank’ intama muzanira Uhoraho Imana yanyu kw ikimazi birikw agasembga cank’ igitosekaye cose, kukw ico ar’ umuziro k’Uhoraho Imana yanyu.

²Muri mwebge, mu bisagara vyanyu vyose Uhoraho Imana yanyu azoba yābahaye, ni haboneka umugabo cank’ umugore akora ico Uhoraho Imana yanyu abona kw ari kibi, co kuva mw isezerano ryiwe,

³akagenda agasaba izindi mana, akazisenga, ari nk’izuba, cank’ ukwezi, cank’ inyenyeri, ari zo ngabo zose zo kw ijuru, kand’ ar’ ivyo ntabageze;

⁴mukabibarirwa; mumaze kuvyumva muheze mugire umwete wo kubibariritsa; maze ni mwasanga ar’ ivy’ ukuri bidakekeranywa, yuk’ ubuyobe bungana burtyo bukorerwa mu Bisirayeli,

⁵muce muzana uwo mugabo cank’ uwo mugore, yakoze ico kintu kibi, mumushikane kw irembo ry’igisagara canyu, mumwicishe amabuye.

⁶Umuntu mu kw apfa, aze yicishwe n’ ivyabona bibiri canke bitatu bimwagirije; arikw icabona kimwe ntikize cagirize umuntu ngo yicwe.

⁷Amaboko y’abamwagīrīje az’ abe ari yo atangura kumwica, maze habone gukurikirako n’ abandi bantu bose. Ukw az’ abe ari ko mukūra ikibi hagati muri mwebge.

⁸Ni haramuka habaye urubanza runaniranye, ari mu vy’ abīcanye, canke mu vyo abantu bapfa, canke mu vy’abakomerekanije, cank’ imibūrano yindi ivyutse mu bisagara vyanyu; mwebge abazica muze muhaguruke, muje ha hantu Uhoraho Imana yanyu azoba yātoranije,

⁹mushikīre abaherezi, ari bo Balewi, n’ umucamanza azoba ariho mur’ iyo misi, mubibashikirize, na bo bazobamenyesha uko baciye urwo rubanza.

¹⁰Namwe, ni bamara kurubashikiririza aho hantu Uhoraho azoba yātoranije, muze mukore nk’uko baruciye nyene; muze mwitondere kubigenza nk’uko bababariye kwose,

¹¹mukurikire uko barushinze n’uko baruciye; ntimuze mutirimuke ngo muve kur’ urwo rubanza babashikirije, ngo murucishe ahandi.

¹²Arik’ umuntu ni yibona ku muherezi, ntamwumvire, kand’ ari we ahagarara ngaho nyene imbere y’Uhoraho Imana yanyu ngw amuhereze, canke ntiyumvire uwo mucamanza, uwo muntu baze bamwice; ukw abe ari ko mukūra ikibi muri mwebge Abisirayeli.

¹³Maz’ abantu bose bazovyumva, bace batinya, ntibongere kwibona ben’ ukwo.

¹⁴Ni mwamara gushika mu gihugu Uhoraho Imana yanyu abaha, mukacegukira mukakibamwo; mukiyumvira, muti Reka twishirireh’ umwami wo kutuganza, nk’uko bimeze mu yandi mahanga yose adukikije;

¹⁵umwami muzoshiraho ntaz’ abure kuba uwo Uhoraho Imana yanyu azotoranya; uwo mwami muzoshiraho wo kubaganza az’ abe uwo mu b’i wanyu; ntimuze mushireh’ umunyamahanga ngw abe ari we abaganza, atar’ uwo mu b’i wanyu.

¹⁶Ikibujijwe, ntaze yironderere amafarasi menshi, canke ngw agire abantu atuma muri Egiputa kugira ngo yironkere umukimba w’amafarasi; kuk’ Uhoraho yababariye, ati Ntimuze musubire kujana iyo nzira ukundi.

¹⁷Kandi ntaz’ agire umukimba w’abagore, kugira ngo ntibize bihindure umutima wiwe; kandi ntaze yirundanirize amafeza n’ amazahabu ngo bibe isinzi.

¹⁸Maze ni yamara kuja ku ngoma, aze yiyandikishirize ibi vyagezwe mu gitabo, abikūye mu gitabo gifiswe n’abaherezi ari bo Balewi.

¹⁹Ico gitabo az’ acamane, agisome imisi yose y’ukubaho kwiwe: kugira ngo yige kwubaha Uhoraho Imana yiwe, yitondere amajambo yose y’ibi vyagezwe n’aya mabgirizwa, abishitse;

²⁰kugira ngw abone guhangama ku ngoma yiwe mu Bisirayeli, bo n’uruvyaro rwiwe; kand’ umutima wiwe woye kuzokwishira hejuru ngw akēngēre ab’i wabo, ntaz’ atirimuke ngw ave mur’ aya mabgirizwa, ngw akikamire i buryo cank’ i bumoso.