Read Bibliya Yera 1951 Gusubira mu Vyagezwe 18 Bible Online

Gusubira mu Vyagezwe 18 - Bibliya Yera 1951 bible

Gusubira mu Vyagezwe 18

¹Abaherezi, ari bo Balewi, mber’ umuryango wa Lewi wose, ntibaze bagire umugabane cank’ ishamvu mu Bisirayeli: ariko baze batungwe n’ibimazi bizanirwa Uhoraho vyo gutōngōrwa n’umuriro, n’ibindi yagerewe.

²Ntibaze bagire ishamvu mu b’i wabo: Uhoraho ni we shamvu yabo, nk’uko yababariye.

³Uyu az’ abe ari wo uba umwanya w’abaherezi abantu bakwiye kuzohora babakūrira: ūtanze ikimazi, ar’ inka cank’ intama, az’ ahore akūrira umuherezi igikenye c’ukuboko, n’imisaya yompi, n’ umushīshīto.

⁴Kandi muze muhore mubaha ku vy’umushuzo, ku mpeke zanyu no kuri vino yanyu no ku mavuta yanyu ya elayo, n’ubgoya bg’ītanguye gukemurwa mu ntama zanyu.

⁵Kukw ari bo Uhoraho Imana yanyu yatoranije mu miryango yanyu yose, kugira ngo baze bahore bakora igikorwa c’ubuherezi mw izina ryiwe, bo n’uruvyaro rwabo, ibihe vyose.

⁶Kand’ Umulewi ni yava i wanyu ah’ aba, ah’ ari ho hose muri mwebge Abisirayeli, akaja ahantu Uhoraho azoba yātoranije, ashobora kuza ah’ agombeye hose,

⁷akore igikorwa c’ubuherezi mw izina ry’Uhoraho Imana yiwe, nk’ ukw ab’i wabo bose b’Abalewi basanzwe bakora, bahagarara ngaho nyene imbere y’Uhoraho.

⁸Az’ agire umugabane ungana n’uw’ abandi ku vyo kurya, ukūye ivyo yaguze itongo yarazwe na se.

⁹Ni mwamara gushika mu gihugu Uhoraho Imana yanyu abaha, ntimuze mwige gukora ivy’ ibizira ayo mahanga akora.

¹⁰Muri mwebge ntihaze haboneke umuntu atanga umwana wiwe kw ikimazi, ar’ uw’ umuhungu canke w’umukobga, ngo yoswe mu muriro, canke ngo haboneke ūragura, cank’ ūtera amabara, cank’ umupfumu, cank’ umurozi,

¹¹cank’ umwābūzi, cank’ ūja guhamagara imizimu, cank’ umumenyi, cank’ ūraguza imizimu.

¹²Kuk’ ūkora ben’ ivyo wese aba abaye umuyobe k’Uhoraho; kand’ ubgo buyobe ari bgo butumye Uhoraho Imana yanyu agira yirukane ayo mahanga imbere yanyu.

¹³Ariko mweho muze mube abaroranye k’Uhoraho Imana yanyu.

¹⁴Kukw ayo mahanga mugiye gusohora ar’ abantu bemera abatera amabara n’ abapfumu; ariko mweho, Uhoraho Imana yanyu ntiyemera ko mugenza murtyo.

¹⁵Uhoraho Imana yanyu azobahagurukiriza ūvugishwa na we ameze nkanje, ava muri mwebge, mu b’i wanyu: az’ abe ari we mwumvira.

¹⁶Bizoba nk’uko mwabisavye Uhoraho Imana yanyu mur’ i Horebu, kuri wa musi mwari mukoranye, aho mwavuga, muti Ntidusubire kwumva ijwi ry’Uhoraho Imana yacu, no kubona urya muriro uhambaye, ntiduhave dupfa.

¹⁷Uhoraho akambarira, at’ Ivyo bavuze babivuze ko.

¹⁸Ati Nzobahagurukiriza ūvugishwa nanje ava mu b’i wabo, ameze nkawe; ati Nzoshira amajambo yanje mu kanwa kiwe, na we azobabarira ivyo ndamugeze vyose.

¹⁹Ati Kand’ ūtazokwumvira amajambo yanje uyo azovuga mw izina ryanje, nzobimuhōra.

²⁰At’ Arik’ umuvugishwa azohāngāra kwigenera ijambo ntamugeze kuvuga, akarivuga mw izina ryanje, cank’ akagira ico avuga mw izina ry’izindi mana, uwo muvugishwa azobizira apfe.

²¹Ariko ni mwivuganya mu mitima yanyu, mut’ Ijambo Uhoraho atāvuze tuzorimenya dute?

²²Umuvugishwa azogira ico avuga mw izina ry’Uhoraho, hanyuma ntikibe, ntigishike; ico kizoba kitāvuzwe n’Uhoraho: uwo muvugishwa azoba yahāngāye kucigenera: ntimuze mumutinye.