Read Bibliya Yera 1951 Gusubira mu Vyagezwe 19 Bible Online

Gusubira mu Vyagezwe 19 - Bibliya Yera 1951 bible

Gusubira mu Vyagezwe 19

¹Uhoraho Imana yanyu ni yamara kurandura ben’ igihugu agira ngw abahe, ari bo ya mahanga, namwe mukegukira ico gihugu cabo, mukinjira ibisagara vyabo n’amazu yabo;

²muze mwirobanurire ibisagara bitatu hagati mu gihugu canyu, ico Uhoraho Imana yanyu abahaye ngo mucegukire.

³Muze muharure amabarabara ajayo, kand’ ico gihugu Uhoraho Imana yanyu abahaye kw ishamvu, muze mukigabanye mu bihimba bitatu, kugira ng’ umukoracumu abone guhungira mu gisagara kimwe mur’ ivyo.

⁴Uku ni ko bikwiye kugenda ku vy’umukoracumu azohungirayo, ngw abone gukira: ūzokwica umuntu atabigize ibigirankana, atar’ asanzwe amwanka;

⁵nk’iy’ umuntu ajanye na mugenzi we mu kibira kwicira ibiti, akihanukīra n’incabiti guca igiti, incabiti ikaroka, ikamījūkira kuri mugenzi we, ikamwica; ben’ uyo az’ ahungire mu gisagara kimwe mur’ ivyo, abone gukira;

⁶bibe birtyo kugira ng’ umuhōzi amukurikiye ntaz’ amuhamvye mu nzira akiratse, bitewe n’uko habaye kure, akamwica; kand’ atar’ akwiye gupfa, kukw atar’ asanzwe amwanka.

⁷Ni co gitumye mbagera, ngo mwirobanurire ibisagara bitatu.

⁸Uhoraho Imana yanyu ni yasunika hirya imbibe zanyu, nk’uko yasezeraniye ba sogokuruza banyu arahira, akabaha igihugu cose yabasezeraniye;

⁹ni mwitondera ibi vyagezwe vyose mbagera uyu musi, mukabishitsa, mugakunda Uhoraho Imana yanyu, mukāma mugendera mu nzira ziwe, azokibaha; maze muze muheze mwironderere ibindi bisagara bitatu, mubigereke kuri vya bindi bitatu vyari bisanzwe;

¹⁰kugira ngw amaraso y’abatācumuye ntaz’ avishirizwe mu gihugu canyu, ico Uhoraho Imana yanyu abahaye kw ishamvu, ayo maraso akazohava abakora.

¹¹Arik’ umuntu ni yanka uwundi, akamuryamira, agaheza akamuvumbukira, akamwica, maz’ agahungira muri kimwe mur’ ivyo bisagara;

¹²abakuru bo mu gisagara c’i wabo baze batume kumukūrayo, bamushikirize umuhōzi, amwice.

¹³Ntimuze mumugirire akagongwe, arikw amaraso y’ūtācumuye muze muyīkūreko mwebge Abisirayeli, kugira ngo mubone kuba mu vyiza.

¹⁴Ni mwamara kwegukira amashamvu mu gihugu Uhoraho Imana yanyu abahaye ngo mucinjire, ntihaze hagire ūshingūra akarimbi k’urubibe rw’umubanyi wiwe, kāshinzwe n’aba mbere.

¹⁵Icabona kimwe gusa ntikirangije kwagiriza umuntu ico yagabitanije cank’ ikindi caha ic’ ari co cose; amajambo az’ aringanizwe, bivuye mu kanwa k’ ivyabona bibiri canke bitatu.

¹⁶Umuntu ni yaja kurega uwundi ibinyoma, akamurega ngo yakoze ikibi;

¹⁷abo bompi bāgiranya, baze bahagarare imbere y’ Uhoraho, imbere y’abaherezi n’ abacamanza bazoba bariho mur’ ico gihe;

¹⁸abo bacamanza baze babibariritse neza; maze ni basanga uwo muntu avuga ibinyoma, kw abeshera mugenzi we,

¹⁹muze mumushire aho yagira ashire mugenzi we. Ukw az’ abe ari ko mukūra ikibi hagati muri mwebge.

²⁰Abasigaye bazovyumva batinye, boye kwongera gukorera muri mwebge ikibi kingana girtyo.

²¹Ntimuze mugirire akagongwe ūmeze artyo; ubugingo buze buhōrwe ubundi, ijisho rihōrwe irindi, iryinyo rihōrwe irindi, igikonjo gihōrwe ikindi, ikirenge gihōrwe ikindi.