Read Bibliya Yera 1951 Gusubira mu Vyagezwe 21 Bible Online

Gusubira mu Vyagezwe 21 - Bibliya Yera 1951 bible

Gusubira mu Vyagezwe 21

¹Ni mwasanga umuntu yishwe, arambaraye mu gahinga, muri mu gihugu Uhoraho Imana yanyu yabahaye ngo mucegukire, uwamwishe ntamenyekane;

²abakuru n’abacamanza bo muri mwebge baze bagende, bahēre ah’ uwo muvyimba uri, batambuke intambge bashike ku bisagara biri hafi y’ah’ uwo muntu yiciwe;

³maz’ igisagara kizorusha ibindi kuba hafi yaho, abakuru bo mur’ ico gisagara baze bazane inka y’ishashi bakūye mu busho, itigeze gukoreshwa igikorwa, canke ngw isangire ingōgo n’iyindi, zikwega ikintu;

⁴bayimanukane mu mwonga ahar’ amazi atemba, hatagira indimiro cank’ imbibe, bayivunire izosi aho nyene mur’ uyo mwonga.

⁵Maz’ abaherezi bo mu ruvyaro rwa Lewi bīgire hafi, kukw abo ari bo Uhoraho Imana yanyu yatoranije ngo bamuhereze, ngo bahezagire n’abantu mw izina ryiwe, kandi ni bo basanzwe baca imanza zose z’imiburano n’iz’ inguma.

⁶Abakuru bose bo mu gisagara kirusha ibindi kuba hafi y’ah’ uwo muntu yiciwe, baze bakarabire kur’ iyo nka yavuniwe izosi mur’ uwo mwonga,

⁷bavuge, bat’ Amaboko yacu si yo yavishije ayo maraso, kandi n’ amaso yacu ntiyabibonye.

⁸Bat’ Uhoraho, harira abantu bawe Abisirayeli, abo wacunguye, kandi ntubahōre amaraso y’uwazize ubusa. Uko ni ko bazoharirwa ayo maraso,

⁹kandi ni ko muzokūra amaraso y’uwazize ubusa hagati muri mwebge, ni mwakora ivyo Uhoraho abona kw ari vyiza.

¹⁰Ni mwagenda gutera abansi banyu, Uhoraho Imana yanyu akabagabura mu maboko yanyu, mukabajana ar’ inyagano;

¹¹ni hagira ūbona mu banyagano umwigeme mwiza cank’ umugore, akamugomwa, akagomba kumwābīra;

¹²az’ amujane i we, yimoshe, ace inzāra,

¹³akūre impuzu yanyaganywe, agume mu rugo rwiwe, amare ukwezi kwose agandariye se na nyina; hanyuma abone kumwābīra, babane.

¹⁴Hanyuma ni yabona atakimuhimbaye, az’ amureke agende iy’ agomba; ariko ntaz’ amugure amahera, canke ngw amucuranguze ukw agomba, kukw azoba yamaze kumwonona.

¹⁵Umugabo ni yagira abagore babiri, umwe akaba inkundwakazi, uwundi akaba intabga, kandi bompi yabavyayeko, umuhungu w’imfura akaba uw’ intabga;

¹⁶ni yagera kuraga, ntaz’ ahindure umwana w’inkundwakazi kuba uw’ imfura, mu gishingo c’uw’ intabga, kand’ ari we mfura koko.

¹⁷Arikw akwiye kwerekana umwana w’ intabga kw ari we mfura, avyerekanishe kumuha imigabane ibiri y’ivy’ atunze vyose: kukw ari we buzibūra bgiwe; ibigerewe imfura n’ivyiwe.

¹⁸Umuntu ni yagira umwana w’ intabarirwa w’ikigāba, atumvira se na nyina, naho bomukubita agakomeza kutumva;

¹⁹se na nyina baze bamufate, bamushīre abakuru bo mu gisagara cabo kw irembo;

²⁰baheze babarire abo bakuru bo mu gisagara, bat’ Uyu mwana wacu n’intabarirwa kandi n’ikigāba, ntakunda kutwumvira; n’umunyangeso mbi kandi yama aborerwa.

²¹Abagabo bose bo mu gisagara cabo baze bamwicishe amabuye: ukw az’ abe ari ko mukūra ikibi hagati muri mwebge; Abisirayeli bose bazovyumva batinye.

²²Umuntu ni yakora icaha gikwiye kumwicisha, bakamwica, mukamumanika ku giti;

²³umuvyimba wiwe ntuz’ urāre kur’ ico giti, ariko ntimuze mubure kumuhamba kur’ uwo musi nyene: kuk’ ūmanitswe ku giti arik’ umuvumo w’Imana; nuko mumuhambe, kugira ngo ntimwanduze igihugu Uhoraho Imana yanyu yabahaye kw ishamvu.