Read Bibliya Yera 1951 Gusubira mu Vyagezwe 22 Bible Online

Gusubira mu Vyagezwe 22 - Bibliya Yera 1951 bible

Gusubira mu Vyagezwe 22

¹Ni hagira uwo muri mwebge abona inka izimiye, cank’ intama, y’uw’ i wanyu w’Umwisirayeli, wewe uyibonye ntuz’ upfe kwirengagiza, arik’ uz’ uyigarurire inayo.

²Kandi inayo ni yakuba kure, cank’ ukaba utamuzi, uz’ uyijane i wawe, uyigumye, gushitsa aho inayo azoyironderera, uyimuhe.

³Kandi n’indogoba uz’ uyigenze urtyo, bo n’impuzu itakaye, n’ikindi kintu cose c’uw’ i wanyu w’Umwisirayeli cari kizimiye, ukakirengukako: ntuz’ upfe kwirengagiza.

⁴Kandi ni wabona indogoba y’ uw’ i wanyu cank’ inka yiwe itemvye ku nzira, ntuz’ upfe kwirengagiza: ntuz’ ubure kumufasha kuyivyura.

⁵Ntihaze hagire izinamukobga yambarana impuzu n’izinamuhungu, canke ngo hagire izinamuhungu yambarana n’izinamukobga: kuk’ ūkoze ivyo wese aba abaye ikizira k’Uhoraho Imana yanyu.

⁶Ni hagira uwo muri mwebge abona icāri c’inyoni ku nzira imbere yiwe, kiri ku giti canke hasi, kirimw’ ivyana cank’ amagi, nyina ikaba ibundikiriye ivyo vyana cank’ amagi; wewe ubibonye, ntuz’ ufate nyina ng’ uyijanane n’ivyana vyayo:

⁷ntuz’ ubure kureka nyina ngw igende, arikw ivyana ushobora kubitwara; uz’ ureke nyina kugira ng’ ube mu vyiza, urambe.

⁸Ni hagira uwubaka inzu nsha muri mwebge, wewe uyubaka uz’ uyikīkūzekw igikugiro hejuru co gutangīra umuntu, ntakoroke, bigahava bizanira inzu yawe guharūrwakw amaraso y’uno akorotse.

⁹Ntihaze hagire ūsukiranya imbuto z’imiryango ibiri mu ruzabibu rwiwe, imyimbu yose ikazohava ihinduka inyegu y’Ahēra, ar’ iy’ izo mbuto yarimye, ar’ iy’ imizabibu.

¹⁰Ntihaze hagire ūrimisha inka n’indogoba azisangije ingōgo imwe.

¹¹Ntihaze hagire uwambara impuzu ijishwe mu nyuzi z’ubgoko bubiri, nk’iz’ ubgoya bg’intama n’iziva ku giti citwa pishita.

¹²Impuzu zanyu mwambara, muze muzitere ubuyonga mu mitwe yazo ukw ar’ ine.

¹³Umuntu ni yarongora umugeni, akaryamana na we, agaheza akamwanka,

¹⁴akamurega ibiteye isoni, akamwambika ibara, akavuga, ati Narongoye uyu mugeni, maze ndoye iy’ ari, nsanga atagira ibimenyetso vy’ubgigeme.

¹⁵Maze se na nyina b’uwo mukobga baze bābīre ibimenyetso vy’ ubgigeme bgiwe, babishīre abakuru b’igisagara cabo mw irembo ryaco.

¹⁶Se w’uwo mukobga aheze abarire abo bakuru, at’ Uyu mugabo namushingiye umukobga wanje, non’ aramwanse;

¹⁷kand’ amureze ibiteye isoni, ngo ntiyasanganye umukobga wanje ibimenyetso vy’ubgigeme; ariko rero, ibimenyetso vy’ubgigeme bgiwe ngibi. Baheze bagaranzure uwo mwambaro imbere y’abakuru b’igisagara.

¹⁸Abo bakuru bafate uwo muntu bamukubitishe;

¹⁹bateko bamucire iciru ca shekeli z’ifeza ijana, bazihe se w’uwo mukobga, kuko yambitse ibara umwigeme wanyu Abisirayeli; na we uwo mugore akomeze kuba uwiwe; az’ arinde apfa atamwirukanye.

²⁰Na ho ivyo ni vyaba ivy’ ukuri, ata bimenyetso vy’ubgigeme vyabonetse kur’ uwo mukobga,

²¹baze bamusohokane, bamujane ku muryango w’inzu ya se, abagabo bo mur’ ico gisagara cabo bamwicishe amabuye, kuko yakoze ikizira mu Bisirayeli, agasambanira kwa se: ukw az’ abe ari ko mukūra ikibi hagati muri mwebge.

²²Umuntu ni yafatwa aryamanye n’umugore w’uwundi, baze babice bompi: abo ukw ari babiri, uwo mugabo yaryamanye n’ uwo mugore, na nya mugore nyene, bapfe; ukw az’ abe ari ko mukūra ikibi muri mwebge Abisirayeli.

²³Umuntu ni yasanga umukobga mu gisagara, kand’ ar’ umwigeme yasabge n’uwundi, akaryamana na we;

²⁴bompi muze mubajane kw irembo ry’ico gisagara, mubicishe amabuye; umukobga azire kw atavugije induru kandi yari mu gisagara, uwo mugabo azire ko yononye umugeni wa mugenzi we; ukw az’ abe ari ko mukūra ikibi hagati muri mwebge.

²⁵Arik’ umuntu ni yasanga umukobga mu gahinga, kand’ ar’ uwasabge, akamugōbēra, agasambana na we; uwo mugabo yasambanye na we az’ abe ari we apfa wenyene:

²⁶arik’ uyo mukobga ntimuze mugire ico mumugira, kukw ata caha azoba yakoze co kumwicisha: kukw ivyiwe bizoba bibaye nk’uk’ umuntu avira hasi uwundi, akamwica.

²⁷Kuk’ uyo mugabo azoba yamusanze mu gahinga, uyo mwigeme akazoba yaravugije induru, hakabura ikimutabara.

²⁸Umuntu ni yasanga umukobga akizigamye ubgigeme bgiwe, kand’ ataribgasabge, akamufata, agasambana na we, bakabaserukako;

²⁹uyo mugabo azoba yasambanye na we az’ ahe se w’uyo mukobga inkwano ya shekeli z’ ifeza mirongwitanu, uyo aheze abe umugore wiwe, kuko yamwononye; az’ arinde apfa atamwirukanye.

³⁰Ntihaze hagire ūcūra muka se, canke ngo yorosore impuzu ya se, ngw amwambike ubusa.