Read Bibliya Yera 1951 Gusubira mu Vyagezwe 23 Bible Online

Gusubira mu Vyagezwe 23 - Bibliya Yera 1951 bible

Gusubira mu Vyagezwe 23

¹Umenetse amavya, cank’ ūshāhūwe, ntaz’ agere mw ikoraniro ry’Uhoraho.

²Umuntu w’ikivyarwa ntaz’ agere mw ikoraniro ry’Uhoraho; haba n’uwo mu ruvyaro rwiwe azorigeramwo, eka mber’ uko bazogenda bavyarana gushitsa no ku bihe cumi.

³ Ntihaze hagire Umwamoni cank’ Umunyamowabu agera mw ikoraniro ry’Uhoraho; haba n’ uwo mu runganwe rwabo azorigeramwo, eka mber’ uko ruzogenda rukurikirana gushitsa icumi;

⁴kuko batābashanganije ivyo kurya n’amazi, igihe mwava muri Egiputa; kandi kuko bāhēreye Balamu mwene Beyori w’i Petori ho muri Aramu‐Naharayimu ngw abavume.

⁵Yamar’ Uhoraho Imana yanyu yanka kwumvira Balamu, arik’ uwo muvumo Uhoraho Imana yanyu awubahindurira umugisha, kuko yabakunda.

⁶Muze murinde mupfa mutabendeje ivy’ amahoro cank’ ivyiza ukw ibihe bizoha ibindi.

⁷Ntimuze mugirire akazīka Abanyedomu, kuko mur’ akara kamwe, kandi ntimugirire akazīka Abanyegiputa, kuko mwar’ inyambukīra mu gihugu cabo.

⁸Abuzukuru babo bazovuka hanyuma bazoshobora kuja mw ikoraniro ry’Uhoraho.

⁹Ni mwagenda gutera abansi banyu, mukagira aho mushagaje, muze mwirinde ikintu kitabereye cose.

¹⁰Muri mwebge ni hagira umugabo yagize ivyamubayeko mw ijoro, bikamuhumanya, az’ agende ave aho mushagaje, ntaz’ ahagaruke uwo musi;

¹¹maze bugira bugorobe, yiyuhagire; izuba rirenze, abone kugaruka aho mushagaje.

¹²Kandi muze mugire ahantu hirya y’aho mushagaje, h’ukwihagarika;

¹³kand’ umuntu wese muri mwebge az’ agire ikimīto agendana; maz’ iy’ agiye ku gahinga, akicara, az’ acimbishe ikinogo, aheze arenzekw ivu ibimuvuyemwo:

¹⁴kuk’ Uhoraho Imana yanyu agendagenda hagati y’aho mushagaje, kugira ngw abakize, agabure abansi banyu mu maboko yanyu; ni co gituma aho mushagaje hakwiye kuba ahantu hera, kugira ngo ntaz’ ababonemw’ ikintu na kimwe giteye ishishi, akarora irya, akabata.

¹⁵Ni hagira umugurano acika, ahunze shebuja, agahungira muri mwebge, ntimuze mumumuhe;

¹⁶az’ abane namwe, abe hagati muri mwebge, ah’ azokwihitiramwo kuba mu bisagara vyanyu, ah’ ashima: ntimuze mumugirire nabi.

¹⁷Ntihaze habemwo ba maraya mu Bisirayelikazi, canke ngo hagire abagabo bendana mu Bisirayeli.

¹⁸Ntihaze hagire ūjana mu ngoro y’Uhoraho Imana yanyu ibihērewe maraya, cank’ ibihērewe umugabo yendwa, ngw abishikishe isezerano iry’ ari ryo ryose: kukw ivyo vyompi ar’ ubuyobe k’Uhoraho Imana yanyu.

¹⁹Muri mwebge ntihaze hagire ūgurāna mugenzi we ngw amucire ivy’ inyungu, ar’ amahera, ar’ ivyo kurya, ar’ ikindi kintu cose cotanzwekw inyungu.

²⁰Umunyamahanga we murashobora kumucira ivy’ inyungu iyo mumugurānye, arik’ uw’ i wanyu ntimuze mumucire inyungu: kugira ng’ Uhoraho Imana yanyu ibahe umugisha ku co muzoba mukoze cose muri mu gihugu mugiye kwinjira ngo mucegukire.

²¹Muri mwebge ni hagira ūsezeranira isezerano Uhoraho Imana yiwe, ntaz’ atebe kurishitsa; kuk’ Uhoraho Imana yiwe itazobura kubimubaza, agasanga vyamuhindukiye icaha.

²²Ariko ni yareka kugira ico asezerana, ntibizomubera icaha.

²³Ibimwiviriye mu kanwa az’ avyitondere, abishitse, kukw ari vyo yasezeraniye Uhoraho Imana yiwe bivuye mu mutima, akabivugisha akanwa.

²⁴Muri mwebge ni hagira ūshika mu ruzabibu rw’uwundi, inzabibu ashobora kuzirīra aho nyene ukw agomba, agahāga; ariko ntagire izo atēkera mu co afise.

²⁵Kandi ni hagira ūca mu mahonda y’uwundi, ashobora kumyoza utwo ahekenya, ariko ntashobora gushira umuhoro muri yo.