Read Bibliya Yera 1951 Gusubira mu Vyagezwe 24 Bible Online

Gusubira mu Vyagezwe 24 - Bibliya Yera 1951 bible

Gusubira mu Vyagezwe 24

¹Umuntu ni yarongora umugeni, hanyuma ntamushime, kuko har’ igiteye isoni yamubonyeko, amwandikire icete co kuvāvānura, akimuhe, amwirukane mu rugo rwiwe.

²Ni yamara kuva mur’ urwo rugo, ashobora kwābīrwa n’uwundi.

³Kand’ uwo mugabo wa kabiri ni yamwanka, akamwandikira icete co kuvāvānura, akamwirukana mu rugo rwiwe, cank’ uwo mugabo wa kabiri yamwābiriye agapfa;

⁴umugabo wiwe wa mbere yamwirukanye ntaz’ amugarukane, kuko yamaze kwononekara; kukw ivyo ar’ ikizira k’Uhoraho; ntimuze mukwegere icaha igihugu Uhoraho Imana yanyu ibaha kw ishamvu.

⁵Umuntu arongoye vuba ntakwiye kuja mu ntambara, canke ngw akoreshwe igikorwa ic’ ari co cose; ariko bamureke umwaka wose, anezereze umugore wiwe yarongoye.

⁶Ntihaze hagire umuntu atwara urusyo rw’uwundi cank’ ingasire kw ingwati y’umwenda, kuko yoba atwaye amagara y’umuntu.

⁷Ni hagira uwiba umuntu w’i wabo w’Umwisirayeli, akamujana, akamugira umuja cank’ akamushōra, bakamumufatana; uwo musuma aze yicwe: ukw az’ abe ari ko mukūra ikibi hagati muri mwebge.

⁸Muze mwitwaririke ivy’ indwara y’imibembe, kugira ngo mugire umwete wo kwitondera no gushitsa ivyo abaherezi ari bo Balewi bazobigisha vyose; nk’ukw abo nabibageze, az’ abe ari ko namwe muvyitondera, mubishitse.

⁹Muze mwibuke ivyo Uhoraho Imana yanyu yagiriye Miriyamu, aho mwari mu rugendo muva muri Egiputa.

¹⁰Muri mwebge ni hagira ūgurāna mugenzi we ikintu ic’ ari co cose, ntashobora kwinjira mu nzu yiwe kwiha ingwati.

¹¹Az’ ahagarare hanze, uwo yagurānye abe ari we amusohokanira ingwati.

¹²Kandi ni yaba ar’ umworo, ntaz’ arāre mu mpuzu yamugwatirije;

¹³ntaz’ abure kuyimusubiza izuba rikirenga, kugira ngw arāre mu mpuzu yiwe, amuhezagire; ivyo bizomubera ukugororoka imbere y’Uhoraho Imana yiwe.

¹⁴Muri mwebge ntihaze hagire ūgirira nabi umukozi w’umucangero, kand’ ar’ umworo w’umukene, ar’ uwo mu b’i wanyu, cank’ uwo mu banyamahanga baba mu bisagara vyanyu, mu gihugu canyu:

¹⁵az’ ahore amuha ingero yiwe ku musi ayikoreye; izuba ntirize rirenge atarayimuha; kukw ar’ umworo, ari ho ashize umutima; yoye kuzohava atakambira Uhoraho amurega, akagībgako n’icaha.

¹⁶Abavyeyi ntibaze bicwe bazize abana babo, kand’ abana ntibaze bicwe bazize abavyeyi: umuntu wese az’ azire iciwe caha.

¹⁷Ntihaze hagire ūgoreka urubanza rw’umunyamahanga, cank’ urw’ impfuvyi; canke ngo hagire uwaka umupfakazi impuzu yiwe kw ingwati:

¹⁸ariko muze mwibuke yuko mwari mu buja muri Egiputa, Uhoraho Imana yanyu akahabagobōtora: ni co gitumye mbabuza kuzogenza murtyo.

¹⁹Ni mwimbura imirima yanyu, hakagira uwibagiriray’ umuganda, ntaz’ asubireyo kuwuzana: uzoba uw’ umunyamahanga cank’ uw’ impfuvyi cank’ uw’ umupfakazi; kugira ng’ Uhoraho Imana yanyu abahezagire mu bikorwa vyanyu vyose.

²⁰Muri mwebge iyo hagize ūja guhungurura ivyamye ku giti ciwe c’umwelayo, ntaz’ asubire gusesa mu mashami yawo ubugira kabiri: ibisigaye bizoba ivy’ umunyamahanga cank’ impfuvyi cank’ umupfakazi.

²¹Kand’ iyo hagize ūja kwāmūra inzabibu mu ruzabibu rwiwe, ntaz’ asubiremwo guhūmba: izisigaye zizoba iz’ umunyamahanga cank’ impfuvyi cank’ umupfakazi.

²²Kandi muze mwibuke yuko mwari mu buja mu gihugu ca Egiputa: ni co gitumye mbagera kuzogenza murtyo.