Read Bibliya Yera 1951 Gusubira mu Vyagezwe 25 Bible Online

Gusubira mu Vyagezwe 25 - Bibliya Yera 1951 bible

Gusubira mu Vyagezwe 25

¹Ni hagira abantu bari n’ico bapfa, bakaja kubūrana, bakabacira urubanza, haze hatsinde ūrufise, hatsindwe uwakoze nabi;

²kandi namb’ uyo yakoze nabi yakoze ibikwiye kumukubitisha, umucamanza avuge kw aryama, bamukubitire imbere yiwe igitigiri c’inkoni zihwanye n’ikibi yakoze.

³Ashobora gushitsa ku nkoni mirongwine, ariko ntaz’ azirenze; kugira ng’ uyo w’i wanyu yoye gukēngēreka kuri mwebge, ni yazirenza, akamukubita izindi nyinshi.

⁴Ntimuze murumye umunwa w’inka irikw irasekura ingano.

⁵Abavukana babana, umwe ni yapfa adasize umuhungu, umugore w’uyo apfuye ntaz’ acūrwe n’ uw’ ahandi, ariko muramu we az’ abe ari we amwābīra, amucūre, amugirire ibikwiye muramu w’ umuntu.

⁶Maz’ uw’ imfura azotangura kuvyara az’ abe ari we asubira mu gishingo c’uwapfuye, kugira ngw izina ryiwe ryoye kuzimangana mu Bisirayeli.

⁷Arik’ uwo mugabo n’atākunda gucūra umugorabo, uwo mugorabo az’ aje kw irembo ry’igisagara, abarire abashingantahe, ati Muramwanje yanse guhonōra uwabo ngw izina ryiwe ntirizimangane mu Bisirayeli, ntakunze kungirira ibikwiye muramu w’umuntu.

⁸Abo bashingantahe bo mur’ ico gisagara cabo baheze bamuhamagaze, bamuhanūre; n’atemera gukūrwa kw ijambo, akavuga ati Singomba kumucūra;

⁹uwo mugorabo agende amushikīre imbere y’abo bashingantahe, amukūre inkweto mu kirenge, amucire amate mu maso, avuge, at’ Uku ni kw agirirwa, uwanse guhonōra uwo bavukana!

¹⁰Ab’ inzu yiwe baze bahore bavugwa bartya mu Bisirayeli, ngw Inzu y’uwakūwe inkweto.

¹¹Abagabo ni birwanira, umugore w’umwe muri bo akaza gutabara umugabo wiwe ūrikw aramukubita, agatuma ukuboko, agafata uwo mugabo epfo;

¹²nya mugore muze mumuce igikonjo, ata kagongwe.

¹³Muri mwebge ntihaze hagire ūgira mw isaho yiwe amabuye ageresha ikilo kimwe, kand’ aciye ukubiri, rimwe ari rinini, irindi ari ritoya.

¹⁴Kandi ntihaze hagire ūgira mu nzu yiwe ingero ziciye ukubiri avuga ngo ni efa, imwe ari nini, iyindi ari ntoya.

¹⁵Arikw amabuye ashitse, y’ukuri, az’ abe ari yo mugeresha; n’ingero zitwa efa zishitse, z’ ukuri, az’ abe ari zo mugeresha; kugira ngo muze murambire mu gihugu Uhoraho Imana yanyu abahaye.

¹⁶Kukw abakora ben’ ivyo bose, abakora ibidatunganye bose, baba babaye ikizira k’ Uhoraho Imana yanyu.

¹⁷Muze mwibuke ivyo Abamaleki babagiriye muri mu nzira, igihe mwava muri Egiputa;

¹⁸uko babategeye mu nzira, bakica abasigaye inyuma bo muri mwebge, abanyantegenke bose, hamwe mwari munaniwe murushe; ntibatinye Imana.

¹⁹Ni co gituma Uhoraho Imana yanyu ni yamara kubakiza abansi banyu bose impande zose, akabaha kuruhukira mu gihugu abahaye kw ishamvu ngo mucegukire, muzoba mukwiye kuzimanganya ukumenyekana kw’Abamaleki, bibagirane mu bo musi y’ijuru bose: ntimuze muvyibagire.