Read Bibliya Yera 1951 Gusubira mu Vyagezwe 27 Bible Online

Gusubira mu Vyagezwe 27 - Bibliya Yera 1951 bible

Gusubira mu Vyagezwe 27

¹Mose n’abakuru b’Abisirayeli babarira abantu, bati Muze mwitondere ivyagezwe vyose mbagera uyu musi.

²Umusi muzojabuka Yorodani, mugashika muri ca gihugu Uhoraho Imana yanyu yabahaye, muze mushinge amabuye manini‐manini, muyahome ingwa;

³muheze muyandikekw amajambo yose y’ivyo vyagezwe, mugiheza kujabuka, kugira ngo mubone kwinjira ico gihugu Uhoraho Imana yanyu yabahaye, igihugu gitemba amata n’ubūki, nk’ uk’ Uhoraho Imana ya ba sogokuruza yabasezeraniye.

⁴Nuko ni mwamara kujabuka Yorodani muze mushinge ayo mabuye mbageze uyu musi ku musozi Ebalu, muyahome ingwa.

⁵Kandi muze muhubakire Uhoraho Imana yanyu igicaniro c’amabuye, mutayakojejekw icitwa icuma.

⁶Igicaniro c’Uhoraho Imana yanyu muze mucubakishe amabuye atabājwe; muheze mucoserezekw ibimazi muhaye Uhoraho Imana yanyu,

⁷mutange n’ibimazi vy’ishimwe, mubirīre aho nyene, munezererwe imbere y’Uhoraho Imana yanyu.

⁸Kandi muze mwandike kuri ya mabuye amajambo yose y’ivyo vyagezwe uburyo busomeka neza.

⁹Maze Mose n’abaherezi ari bo Balewi babarira Abisirayeli bose, bati Yemwe Bisirayeli, ni muhore, mwumve: uyu musi muhindutse ihanga ry’Uhoraho Imana yanyu.

¹⁰Ni co gituma mukwiye kwumvira Uhoraho Imana yanyu, mukitondera ivyagezwe vyiwe n’amabgirizwa yiwe, ivyo mbagera uyu musi.

¹¹Maze Mose agera abantu kur’ uwo musi,

¹²at’ Aba az’ abe ari bo bahagarara ku musozi Gerizimu mu guhezagira abantu, mumaze kujabuka Yorodani: Abasimeyoni, n’Abalewi, n’Abayuda, n’Abisakari, n’Abayosefu, n’Ababenyamini;

¹³aba na bo az’ abe ari bo bahagarara ku musozi Ebalu mu kuvuma: Abareyubeni, n’Abagadi, n’Abasheri, n’Abazebuloni, n’Abadani, n’Abanafutali.

¹⁴Maz’ Abalewi baze babarire abantu b’Abisirayeli bose, bababarire mw ijwi rirenga,

¹⁵bat’ Azoba avumwe, umuntu abāza igishushanyo cank’ akakivugutira mu nkero, ar’ igikorwa c’umuhinga, akagishinga mu mpisho, kand’ ar’ ubuyobe k’ Uhoraho. Abantu bose bitabirize, bati Amen.

¹⁶Abalewi bat’ Azoba avumwe, ūkēngēra se canke nyina. Abantu bose bitabirize, bati Amen.

¹⁷Abalewi bat’ Azoba avumwe, ūshingūra akarimbi k’urubibe rw’ umubanyi wiwe. Abantu bose bitabirize, bati Amen.

¹⁸Abalewi bat’ Azoba avumwe, ūhuvya impumyi ngw ite inzira yayo. Abantu bose bitabirize, bati Amen.

¹⁹Abalewi bat’ Azoba avumwe, ūgoreka urubanza rw’inyambukīra, canke rw’impfuvyi canke rw’umupfakazi. Abantu bose bitabirize, bati Amen.

²⁰Abalewi bat’ Azoba avumwe, ūryamana na muka se, kukw aba yorosoye impuzu ya se. Abantu bose bitabirize, bati Amen.

²¹Abalewi bat’ Azoba avumwe, ūryamana n’igitungano ic’ ari co cose. Abantu bose bitabirize, bati Amen.

²²Abalewi bat’ Azoba avumwe, ūryamana na mushiki we, ar’ uwo basangiye se canke nyina. Abantu bose bitabirize, bati Amen.

²³Abalewi bat’ Azoba avumwe, ūryamana na inabukwe. Abantu bose bitabirize, bati Amen.

²⁴Abalewi bat’ Azoba avumwe, uwica mugenzi we mu mpisho. Abantu bose bitabirize, bati Amen.

²⁵Abalewi bat’ Azoba avumwe, ūhērewe ngw aje kwica umuntu ata co yakoze. Abantu bose bitabirize, bati Amen.

²⁶Abalewi bat’ Azoba avumwe, ūdashitsa amajambo y’ibi vyagezwe ngw ayitondere. Abantu bose bitabirize, bati Amen.