Read Bibliya Yera 1951 Gusubira mu Vyagezwe 30 Bible Online

Gusubira mu Vyagezwe 30 - Bibliya Yera 1951 bible

Gusubira mu Vyagezwe 30

¹Igihe ivyo vyose bizoba vyabashitseko, ivy’ umugisha n’umuvumo nabashize imbere, mukavyibukira iyo muri mu mahanga yose ah’ Uhoraho Imana yanyu azoba yarabirukaniye,

²mugahindukirira Uhoraho Imana yanyu, mukamwumvira muri vyose, nk’ uko mbibagera uyu musi, mwe n’abana banyu, mumwumvirishije imitima yanyu yose n’ubugingo bganyu bgose;

³Uhoraho Imana yanyu azotuma muhindukira, muve mu kinyago, abagirire ikigongwe, asubire kubakoraniriza hamwe, abakūye mu mahanga yose ah’ azoba yarabasābagirije.

⁴Kandi namba har’ abirukanywe bo muri mwebge bazoba bar’ iy’ ijuru riherera, Uhoraho Imana yanyu azobakūrayo, abakoranye, mber’ iyo ni ho azoja kubazana.

⁵Kand’ Uhoraho Imana yanyu azobasubiza mu gihugu car’ ishamvu ya ba sogokuruza, namwe mucegukire; kand’ azobagirira neza, abagwize gusumvya ba sogokuruza.

⁶Kand’ Uhoraho Imana yanyu azokūrah’ ukudakebga kwo mu mitima yanyu, n’ukwo mu mitima y’uruvyaro rwanyu, kugira ngo mumukundishe imitima yanyu yose, n’ubugingo bganyu bgose, mubone kubaho.

⁷Kand’ Uhoraho Imana yanyu azoshira iyo mivumo yose ku bansi banyu no ku bazoba babagendanira inzigo no ku babadendereza.

⁸Namwe muzohindukirira Uhoraho, mumwumvire, mwitondere ivyagezwe vyiwe vyose mbagera uyu musi.

⁹Kand’ Uhoraho Imana yanyu azobasesekariza ivyiza mu bikorwa vyanyu vyose, agwize uruvyaro rwo mu nda zanyu, n’urwo mu masho yanyu, n’imirima yo mu ndimiro zanyu; kuk’ Uhoraho azokwongera kunezererwa kubagirira neza, nk’uko yanezererwa ba sogokuruza,

¹⁰namba muzoba mwumviye Uhoraho Imana yanyu, mukitondera ivyagezwe n’ amabgirizwa vyanditswe mur’ iki gitabo c’ivyagezwe, mukamuhindukirira, mukamurondeza imitima yanyu yose n’ubugingo bganyu bgose.

¹¹Kukw ivyo vyagezwe mbageze uyu musi atar’ ivyo kubananira, kand’ atar’ ibiri kure.

¹²Ntibiri mw ijuru, ngo muvuge, muti Ni nde yotudūgira mw ijuru, kugira ngw abituzanire, ngo tuvyumvire, tuvyitondere?

¹³Kandi ntibiri hakurya y’ikiyaga, ngo muvuge, muti Ni nde yotujabukira ikiyaga, ngw abituzanire, ngo tuvyumvire, tuvyitondere?

¹⁴Arikw iryo jambo riri hafi yanyu cane, mbere riri mu kanwa kanyu no mu mitima yanyu, ngo mubone kuryitondera.

¹⁵Ehe rāba, uyu musi mbashize imbere ubugingo n’amahirwe, bo n’urupfu n’amagorwa;

¹⁶kuk’ uyu musi mbabariye gukunda Uhoraho Imana yanyu, no kugendera mu nzira ziwe, no kwitondera ivyagezwe vyiwe n’amabgirizwa yiwe n’amatēka yashinze, kugira ngo mubone kubaho, mugasāre, Uhoraho Imana yanyu abahēre umugisha mu gihugu mugiye kwinjira ngo mucegukire.

¹⁷Ariko ni mwakikama mu mitima yanyu, mukanka kwumvira, mukemera inyosha, mugasenga izindi mana, mukazisaba,

¹⁸uyu musi ndabamenyesha yuko mutazobura guhona; ntimuzomara igihe kinini mu gihugu mugiye kujabuka Yorodani ngo mucinjire, mucegukire.

¹⁹Uyu musi ntanze ijuru n’isi kw ivyabona bizobāgiriza, yuko mbashize imbere ubugingo n’urupfu, umugisha n’umuvumo; nuko ni muhitemw’ ubugingo, kugira ngo mubone kubaho, mwe n’uruvyaro rwanyu,

²⁰mukunde Uhoraho Imana yanyu, mumwumvire, mwifatanye na we akaramata, kukw ari we bugingo bganyu n’ukuramba kwanyu; kugira ngo mubone kuba mu gihugu yarahiye ba sogokuruza Aburahamu na Isaka na Yakobo, kw azokibaha.