Read Bibliya Yera 1951 Gusubira mu Vyagezwe 31 Bible Online

Gusubira mu Vyagezwe 31 - Bibliya Yera 1951 bible

Gusubira mu Vyagezwe 31

¹Maze Mose arakomeza, abgira Abisirayeli bose aya majambo.

²Arababarira, at’ Ubu mmaze imyaka ijana na mirongwibiri, singishobora gutēra ururengo, kand’ Uhoraho yarambariye, ati Ntuzojabuka uru ruzi Yorodani.

³Uhoraho Imana yanyu ni we azojabuka abagiye imbere, kand’ azorandura ayo mahanga ar’ imbere yanyu, namwe mwegukire igihugu cabo: kandi Yosuwa ni we azojabuka abagiye imbere, nk’uk’ Uhoraho yavuze.

⁴Kand’ ayo mahanga Uhoraho azoyagirira nk’ uko yagiriye Sihoni na Ogi, abami b’Abamori, n’igihugu cabo, abo yaranduye.

⁵Uhoraho azobagabura mu maboko yanyu, namwe muze mubagirire nk’uko nabageze kwose.

⁶Mushikame, mushire amanga, ntimutinye, ntimubacikire ivutu: kuk’ Uhoraho Imana yanyu ari we azojana namwe; ntazobaheba, ntazobata.

⁷Maze Mose ahamagara Yosuwa, amubaririra imbere y’Abisirayeli bose, at’ Ushikame, ushire amanga, kukw ari wewe uzojana aba bantu mu gihugu Uhoraho yarahiye ba sogokuruza kw azokibaha: ni wewe uzokibashikiriza.

⁸Uhoraho ni we azokuja imbere; azobana nawe, ntazoguheba, ntazoguta; ntutinye, nturanduke umutima.

⁹Mose yandika ivyo vyagezwe, abishikiriza abaherezi, ari bo Balewi, abareruzi b’isandugu y’ isezerano ry’Uhoraho, abishikiriza n’abakuru bose b’Abisirayeli.

¹⁰Arabagera, at’ Uk’ umwaka wose ugira indwi utashe, mu gihe cashinzwe c’umwaka wo guheberanira, mu misi mikuru y’insago,

¹¹igihe Abisirayeli bose baje gushengerera Uhoraho Imana yanyu ha hantu azoba yaratoranije, muze muhore musomera ibi vyagezwe Abisirayeli bose.

¹²Muze mukoranye abantu, abagabo n’abagore n’abana, n’abanyamahanga baba muri mwebge, kugira ngo bavyumve, bavyige, bubahe Uhoraho Imana yanyu, bitondere amajambo yose y’ibi vyagezwe, babishitse;

¹³no kugira ngw abana babo bataribgabimenye, bavyumve, bige kwubaha Uhoraho Imana yanyu, igihe cose muzoba mur’ ico gihugu, ico mugiye kujabuka Yorodani ngo mucinjire.

¹⁴Uhoraho abarira Mose, ati Rāba, igihe cawe co gupfa kiri hafi: enda hamagara Yosuwa, murenguke mw ihema ry’ibonaniro, kugira ngo ndamushikirize igikorwa. Nuko Mose na Yosuwa baragenda, bararenguka mw ihema ry’ibonaniro.

¹⁵Maz’ Uhoraho aserukira mur’ iryo hema, ari mu nkingi y’igicu: iyo nkingi ihagarara mu muryango w’iryo hema.

¹⁶Uhoraho abarira Mose, ati Rāba, ugiye guhamvya ba sogokuruza bawe; kand’ iri hanga rizohaguruka, bahurumbire izindi mana nk’ibimaka, ari vyo bigirwamana vy’ico gihugu, aho bagiye kuja kuba muri bene co, bamveko, bice isezerano ryanje nasezeranye na bo.

¹⁷Maz’ ico gihe uburake bganje buzobaziriringira, nanje ndabahebe, ndabahishe mu nyonga hanje, bamarwe n’ivyago vyinshi n’imibabaro bizobazako; bitume bavuga, bat’ Icateye ibi vyago kutuzako s’ukw Imana yacu itari muri twebge?

¹⁸Ico gihe ni koko nzobahisha mu nyonga hanje, mbahōye ibibi vyose bazoba bakoze vyo guhindukirira izindi mana.

¹⁹None rero ni mwandike iyi ndirimbo, uyigishe Abisirayeli, uyibatoze, kugira ngw iyi ndirimbo imbēre icabona ku Bisirayeli kizobāgiriza.

²⁰Kuko ni namara kubashikana mu gihugu narahiye ba sekuruza babo, igihugu gitemba amata n’ubūki, bakarya, bagahāga, bakadibama; bazohērako bahindukirire izindi mana, bazisabe, bankēngēre, bice isezerano ryanje.

²¹Kand’ ivyo vyago vyinshi n’imibabaro ni vyamara kubazako, iyi ndirimbo izobāgiriza nk’icabona, kukw itazokwibagirana ngw ive mu kanwa k’uruvyaro rwabo. N’ubu nzi ivyo bīgereye mu vyiyumviro vyabo, ntarabashikana mu gihugu narahiye ko nzobaha.

²²Nuko kur’ uwo musi nyene Mose yandika iyo ndirimbo, ayigisha Abisirayeli.

²³Kand’ Uhoraho abarira Yosuwa mwene Nuni, at’ Ushikame, ushire amanga; kukw ari wewe uzoshikana Abisirayeli mu gihugu narahiye ko nzobaha: kandi nzobana nawe.

²⁴Maze Mose, ahejeje kwandika amajambo y’ivyo vyagezwe mu gitabo, ayarangije,

²⁵abarira Abalewi, ari bo bareruzi b’isandugu y’isezerano ry’Uhoraho,

²⁶ati Ni mujane iki gitabo c’ivyagezwe, mugishire i ruhande y’isandugu y’isezerano ry’Uhoraho Imana yanyu, kigumeho kugira ngo kibe icabona co kubāgiriza.

²⁷Kuko nzi ubugarariji bganyu, n’ukuntu mutagonda izosi; ko mukunda kugarariza Uhoraho nkiriho, nkiri kumwe namwe mur’ iki gihe, ntimuzorushiriza ni namara gupfa?

²⁸Ni munkoranirize abakuru bose b’imiryango yanyu, n’abashingantahe banyu, kugira ngo mvugire aya majambo mu matwi yabo, ntange ijuru n’isi kw ivyabona bizobāgiriza.

²⁹Kuko nzi yuko, ni namara gupfa, muzokwononekara rwose, mugakikama mugata inzira mbagera uyu musi; kand’ amaherezo, ivyago bizobatera, kuko muzoba mukoze ivyo Uhoraho abona kw ari bibi, mukamurakisha ibikorwa vy’intoke zanyu.

³⁰Nuko Mose avugira mu matwi y’ikoraniro ryose ry’Abisirayeli amajambo y’iyi ndirimbo, gushitsa ah’ ayarangirije.