Read Bibliya Yera 1951 Gusubira mu Vyagezwe 32 Bible Online

Gusubira mu Vyagezwe 32 - Bibliya Yera 1951 bible

Gusubira mu Vyagezwe 32

¹Tega ugutwi, wa juru we, nanje mvuge; Isi na yo ni yumve amajambo ava mu kanwa kanje.

²Ukwigisha kwanje kugwe nk’ imvura, Amajambo yanje atonde nk’ ikime, Abe nk’ukw imvura y’akajogotera igwa ku rumerēra, Kandi nk’iy’ akavuvu iy’ igwa ku bgatsi.

³Kuko ngira namamaze izina ry’Uhoraho. Enda ni mwaturire Imana yacu kw ifise icubahiro gikomeye.

⁴Ico Gitandara, igikorwa ciwe n’agahore; Kand’ inzira ziwe zose ziragororotse. N’Imana yo kwizigirwa, itarimwo kugabitanya, Iroranya, kandi y’Inyakuri.

⁵Barayihemukiye, ntibakir’ abana bayo, ariko vyabateye agasembga: N’ab’ urunganwe rw’ibidambidambi bagoramye.

⁶Mbeg’ iyo ni yo ngero mushubije Uhoraho, Mwa bantu b’ibipfu b’imburabgenge? Si we Muvyeyi wanyu yabaremye, Akababumba, akabakomeza?

⁷Ni mwibuke ibihe vya kera, Mwiyumvire uk’ urunganwe rwagiye rukūranwa mu myaka yashize. Bibaze ba so, barabibamenyesha, N’abo hambere, barabibabarira.

⁸Igihe Īsumba Vyose yagabanganya amahanga amashamvu yayo, Igatandukanya amoko n’ayandi, Yashizeh’ imbibe z’amahanga, Nk’ukw igitigiri c’Abisirayeli kingana.

⁹Kukw abantu b’Uhoraho ari bo mugabane wiwe, Aba Yakobo ni bo shamvu y’ aho yigereje ibango.

¹⁰Yabasanze mu gihugu c’ ubugaragwa, Mu bugaragwa bg’ubgeranyange, humvikanamw’ ibihūrira; Abakikiza irya n’ino, arababungabunga, Abazigama nk’imbone y’ijisho.

¹¹Nk’ukw inkukuma[6] ikangura ivyana vyayo mu cāri, Igahungiriza amababa hejuru yavyo, Igasanza amababa, ikabijana, Ikabihēka ku mababa yayo:

¹²Uko ni k’Uhoraho yagenda abarōngōra wenyene, Ata mana y’inyamahanga yari kumwe na we.

¹³Yabahaye kugenda bajandagira ku mpinga z’imisozi yo mu gihugu, Barya ivyeze vyo mu mirima; Abaha kuvotagira ubūki bgo mu bitandara, N’amavuta ya elayo ava mu rutare rukomeye;

¹⁴Abaha n’amata y’urubu n’ amatāmatāma, N’ibinure vy’abana b’intama n’ivy’ amapfizi y’intama, N’amasho y’i Bashani, n’ impene, N’ingano zitengengeye nziza; Mwanyoye vino, ari yo maraso y’inzabibu.

¹⁵Ariko Yeshuruni[7] amaze kuvyibuha, atēra akagere: Yaravyibushe, arasenyuka, acika igisēme; Maz’ aca areka Imana yamuremye, Akēngēra ca Gitandara c’ agakiza kiwe.

¹⁶Bayiteye kugira ifūhe kubgo gusaba imana z’inyamahanga, Bayirakishije ibizira bakoze;

¹⁷Bahaye ibimazi abadayimoni batar’ Imana, Bahaye ibimazi imana batigeze kumenya, Imana nsha z’inzaduka, Izo ba sogokuruza batātinya.

¹⁸Ca Gitandara mwavutseko ntimukicibuka: Mwibagiye Imana yabavyaye.

¹⁹Uhoraho yarabibonye, karaziriringa, Ashavurira abahungu biwe n’ abakobga biwe.

²⁰Aravuga, ati Reka mbahishe mu nyonga hanje, Ndābe iherezo ryabo uko rizomera; Kukw ar’ urunganwe rw’ ibidambidambi, N’abana batar’ abizigirwa.

²¹Ati Bantēje ifūhe ibitar’ Imana; Bandakishije ibigirwamana vyabo vy’ubusa: Nuko nanje nzobatēza ishari abatar’ ihanga ry’ukuri, Nzobarakisha ihanga ry’imburabgenge.

²²Kuk’ umuriro w’uburake bganje udometswe, Wātse, ugashika hasi i kuzimu, Ugatōngōra isi n’ivyeze kuri yo, Ukadomeka amatanguriro y’ imisozi.

²³Nzobarundakw ivyago, Nzobamarirakw imyampi yanje;

²⁴Bazogenda bamarwa umunywera n’inzara, bahondoberezwe n’umururumbo, N’ikiza gikaze; Nzobatērēra ibikōko, bibate mu menyo yavyo, Ndabatērēre n’ivyikwega mu mukungugu vy’ubumara.

²⁵Hanze inkota izohēkūra, No mu nzu habe gucika ivutu, Yice imisore n’inkumi, N’abana bonka n’abatāma bameze imvi.

²⁶Nari mmaramaje kubashwiragiriza kure, Nkazimanganya ukwibukwa kwabo mu bantu,

²⁷Iyo ntatinya ibitutsi vy’abansi, N’ukw abarwanizi babo bovyita ukundi, Bakavuga, bat’ Ubuhizi bgacu buhambaye Ni bgo bgakoze ivyo vyose, s’ Uhoraho.

²⁸Kukw ar’ ihanga ry’abantu ata co bībaza, Ata bgenge buri muri bo.

²⁹Iyo baba abanyabgenge bokwibajije ibi, Bakiyumvira ivy’ iherezo ryabo.

³⁰Umwe yoshoboye ate gukinagiza igihumbi, Na babiri kwirukana ibihumbi cumi, Iyo ca Gitandara cabo atabagura, Iy’ Uhoraho atabagabura?

³¹Kukw igitandara ca ba bandi kidahwanye n’icacu, Mbere n’abansi bacu ubgabo barabizi.

³²Umuzabibu wabo wavuye ku w’i Sodomu, No mu mirima y’i Gomora; Inzabibu zabo n’amabamba, Imisoko yazo n’imirurazi.

³³Vino yabo ni nk’ubumara bg’ inzoka, Mbere ni nk’ubumara bgica bg’imvuvyi.

³⁴Mbeg’ ivyo ntibibītswe aho ndi? Ntivyugaraniwe mu bubīko bganje?

³⁵Uguhōra n’ukwanje, nzobasubiriza mu nkōko Igihe ibirenge vyabo bizonyerera. Kuk’ umusi w’ivyago vyabo uri hafi, Kand’ ibigira bibazeko bizotebuka.

³⁶Kuk’ Uhoraho azocira urubanza abantu biwe, Azokwirīmbūra ku vyo agirira abashumba biwe, Ni yabona yuk’ ubushobozi bgabo buheze, Ata wugisigaye, n’iyo yoba imbohe cank’ uwidegemvya.

³⁷Azobaza, ati Mbeg’ imana zabo ziri hehe, Ca gitandara bāri bizigiye?

³⁸Zimwe zārya ibinure vy’ibimazi vyabo, Zikanywa vino z’ibiturire bāshikana? Ni zihaguruke zibatabare, Zibe ari zo zibakingira!

³⁹Nuko rero mumenye yuko jewe, jewe ubganje, ari jewe Mana, Kandi kw ata yindi mana ibangikanye nanje: Ni jewe ntuma umuntu apfa, ni jewe ntuma umuntu abaho; Ni jewe nkomeretsa, ngakiza; Kandi nta woshobora kugira ico arokora mu kuboko kwanje.

⁴⁰Mbere mmanitse ukuboko kwanje, ndagutunze mw ijuru, Nti Ndahiye ukubaho kwanje, nk’uko namah’ ibihe vyose,

⁴¹Yukw igihe nzokarisha inkota yanje irabagirana nk’ umuravyo, Ukuboko kwanje kugafata amatēka, Nzokwihōra abarwanizi banje, Nsubirize mu nkōko abanyanka.

⁴²Imyampi yanje nzoyiboreza amaraso, Amaraso y’abishwe n’ay’ abafashwe mpiri; Inkota yanje izorya inyama, Ikegete imitwe y’abatware b’abansi.

⁴³Yemwe banyamahanga, ni munezeranwe n’abantu bayo, Kukw abāvishije amaraso y’ abasavyi bayo izoyabahōra, Kand’ izokwihōra abarwanizi bayo, Itangire impongano igihugu c’abantu bayo.

⁴⁴Nuko Mose araza, avugira amajambo yose y’iyo ndirimbo mu matwi y’abantu, afatanije na Yosuwa mwene Nuni.

⁴⁵Maze Mose arangije kubgira Abisirayeli bose ayo majambo yose,

⁴⁶arababarira, ati Mushire imitima yanyu ku majambo yose mbabariye uyu musi, muze muyatoze abana banyu kugira ngo baze bitondere amajambo yose y’ivyo vyagezwe, babishitse.

⁴⁷Ivyo ntimubigire ivyoroshe; kukw ari vyo bugingo bganyu, kandi ni mwavyitondera bizobahesha kurambira mu gihugu, ico mugiye kujabuka Yorodani ngo mucinjire.

⁴⁸Kur’ uwo musi nyene Uhoraho abarira Mose,

⁴⁹ati N’udūge mur’ iyi misozi yo muri Abarimu, urinde ushika ku musozi Nebo, uri mu gihugu c’i Mowabu, aharābana n’i Yeriko; witegereze igihugu c’i Kanani nahaye Abisirayeli kw ishamvu.

⁵⁰Kand’ uzoca utambūrira kur’ uyo musozi udūze, uhamvye abanyu, nk’uko Aroni mukurwawe yapfiriye ku musozi Hori, akabahamvya;

⁵¹kuko mwampemukiye hagati mu Bisirayeli, igihe mwari ku mazi y’i Meriba h’i Kadeshi, mu bugaragwa bg’i Zini, ntimwerekane ukwera kwanje hagati mu Bisirayeli.

⁵²Ico gihugu uzogitereza amaso kiri kure yawe, ariko ntuzokigeramwo, ico gihugu mpaye Abisirayeli.