Read Bibliya Yera 1951 Gusubira mu Vyagezwe 34 Bible Online

Gusubira mu Vyagezwe 34 - Bibliya Yera 1951 bible

Gusubira mu Vyagezwe 34

¹Maze Mose ava mu kiyaya c’i Mowabu, adūga umusozi Nebo, ashika ku gatwe Pisiga, aharābana n’i Yeriko. Uhoraho amwereka igihugu cose c’i Gileyadi gushitsa i Dani,

²n’ic’ Abanafutali cose, n’ic’ Abefurayimu, n’ic’ Abamanase, n’ic’ Abayuda cose, gushitsa ku kiyaga c’i burengerazuba.

³Amwereka n’i Negebu, n’ikiyaya co kuri Yorodani, ari ho haca igihogoro c’i Yeriko, igisagara co mu bigazi, gushitsa i Sowari.

⁴Uhoraho aramubarira, ati Ngīkirīya igihugu narahiye Aburahamu na Isaka na Yakobo, nti Nzogiha uruvyaro rwanyu. None nguhaye kukirābisha amaso, ariko ntuzojabuka ng’ ujeyo.

⁵Nuko Mose umusavyi w’ Uhoraho apfira ngaho mu gihugu c’i Mowabu, nk’ukw ijambo ry’ Uhoraho ryavuze.

⁶Uhoraho amuhamba mu mwonga wo mu gihugu c’i Mowabu, aharābana n’i Beti‐Peyori; ariko nta wuzi imva yiwe na bugingo n’ubu.

⁷Mose yapfuye amaze imyaka ijana na mirongwibiri; kand’ amaso yiwe ntiyaribgarābe ivyijiji, cank’ inkomezi ziwe ngo zigabanuke.

⁸Abisirayeli bamara imisi mirongwitatu baririra Mose, bari mu kiyaya c’i Mowabu; nukw imisi yo kuririra Mose no kumugandarira irarangira.

⁹Kandi Yosuwa mwene Nuni yari yuzuye impwemu y’ubgenge, kuko Mose yari yaramurambitsekw ibiganza. Nukw Abisirayeli baramwumvira, bagenza nk’uk’ Uhoraho yari yarabariye Mose.

¹⁰Kandi mu Bisirayeli ntihigeze kuboncka ūvugishwa n’Imana ahwanye na Mose, uwo Uhoraho yibonanira na we imbonankubone.

¹¹Nta wogereranywa na we kubg’ ibimenyetso n’ibitangaza vyose Uhoraho yamutumye gukorera mu gihugu ca Egiputa, ngw abigirire Farawo n’abamenyekana biwe bose n’igihugu ciwe cose;

¹²no kubg’ ivy’ ububasha n’ibiteye ubgoba vyose Mose yakoreye imbere y’ Abisirayeli bose.