Read Bibliya Yera 1951 Gusubira mu Vyagezwe 5 Bible Online

Gusubira mu Vyagezwe 5 - Bibliya Yera 1951 bible

Gusubira mu Vyagezwe 5

¹Mose ahamagara Abisirayeli bose, arababarira, ati Yemwe Bisirayeli, ni mwumve amabgirizwa n’ivyagezwe mvugira mu matwi yanyu uyu musi, kugira ngo muvyige, muvyitondere, mubishitse.

²Uhoraho Imana yacu yasezeranye natwe isezerano kuri Horebu.

³Ba sogokuruza si bo Uhoraho yasezeranye na bo iryo sezerano, ariko ni twebge abakiriho, turi hano uyu musi.

⁴Uhoraho yavugiye mu muriro, yivuganira namwe imbonankubone kuri wa musozi.

⁵Nanje nahagaze hagati y’Uhoraho namwe ico gihe, kugira ngo mbashikirize ijambo ryiwe, kuko mwari mutinye uwo muriro, ntimudūge kur’ uwo musozi. Aravuga,

⁶ati Nd’Uhoraho Imana yawe, yagukūye mu gihugu ca Egiputa, mu nzu y’ubuja.

⁷Ntukagire izindi mana umbangikanya.

⁸Ntukībāzire igishushanyo, cank’ igisa n’ishusho y’ikintu na kimwe kiri hejuru mw ijuru, canke hasi kw isi, canke mu mazi yo mu biyaga;

⁹ntuz’ uvyikubite imbere, ntuz’ ubisabe, kuko jewe Uhoraho Imana yawe nd’Imana ifūha, mpōra abana ibigabitanyo vya ba se, nkageza ku runganwe rugira gatatu no ku rugira kane rw’abanyanka,

¹⁰nkagirira īkigongwe abankunda, bakitondera ivyagezwe vyanje, nkageza ku runganwe rwabo uko ruzogenda rukurikirana gushitsa igihumbi.

¹¹Ntugapfe kuvuga izina ryanje, jewe Uhoraho Imana yawe, ku vy’ubusābusa, kuk’ uworivuga ku vy’ubusābusa, jewe Uhoraho ntobura kubimuhōra.

¹²Uze witondere umusi w’isabato, kugira ng’ uwuziririze, nk’ uko jewe Uhoraho Imana yawe nabikugeze.

¹³Mu misi itandatu az’ abe ari yo ukoreramw’ ibikorwa vyawe vyose:

¹⁴arik’ umusi ugira indwi ni wo sabato yanje, jewe Uhoraho Imana yawe. Ntukagire igikorwa na kimwe ukora kuri wo, wewe ubgawe, cank’ umuhungu wawe, cank’ umukobga wawe, cank’ umugurano wawe, cank’ umuguranokazi wawe, cank’ inka yawe, cank’ indogoba yawe, cank’ ibitungano vyawe ivy’ ari vyo vyose, cank’ uw’ inyambukīra aba i wawe; kugira ng’ umugurano wawe n’umuguranokazi wawe babone kuruhūka nkawe.

¹⁵Kand’ uze wibuke yuko nawe wari mu buja mu gihugu ca Egiputa, jewe Uhoraho Imana yawe nagukūjey’ ukuboko kw’inkomezi kandi kubanguye; ni co catumye jewe Uhoraho mbikugera kuziririza umusi w’isabato.

¹⁶Wubahe so na nyoko, nk’ uko jewe Uhoraho Imana yawe nabikugeze, kugira ng’ urambire mu gihugu jewe Uhoraho Imana yawe nzoguha, uhamererwe neza.

¹⁸Kandi ntugasambane.

¹⁹Kandi ntukibe.

²⁰Kandi ntukāgirize ibinyoma mugenzawe.

²¹Kandi ntukifuze umugore wa mugenzawe, ntukifuze inzu ya mugenzawe, cank’ itongo ryiwe, cank’ umugurano wiwe, cank’ umuguranokazi wiwe, cank’ inka yiwe, cank’ indogoba yiwe, cank’ ikintu na kimwe ca mugenzawe.

²²Ayo majambo Uhoraho yayababgiye mukoraniye hamwe mwese kuri wa musozi, ntiyagira ikindi yongera kuri yo; ayavugisha ijwi rirenga, ayavugiye mu muriro, no muri ca gicu c’igipfungu, no mu mwiza w’ umuzimagiza. Araheza ayandika ku bisate bibiri vy’ amabuye, arabimpa.

²³Maze mwumvise ijwi rivuye mur’ uwo mwiza, n’umusozi urik’ urāka umuriro, muza kuri jewe, abakuru mwese bo mu miryango yanyu n’ abashingantahe bo muri mwebge,

²⁴muravuga, mut’ Uhoraho Imana yacu kw atweretse ubgiza bgiwe n’ububasha bgiwe, tukumva ijwi ryiwe rivuye hagati mu muriro, uyu musi tubonye yukw Imana ivugana n’umuntu, akabaho ntapfe.

²⁵None turinda gupfira iki kandi? kuk’ urya muriro uhambaye uhava utuyogeza, kandi ni twakomeza kwumva ijwi ry’Uhoraho Imana yacu, turapfa.

²⁶Muti Ni nde mu baremwe bose yigeze kwumva ijwi ry’Imana nzima rivugira hagati mu muriro, nk’uko twebge turyumvise, agaheza akabaho ntapfe?

²⁷Muti Ba ari wewe wēgēra, wumve ivyo Uhoraho Imana yacu avuga vyose; uheze utubarire ivyo Uhoraho Imana yacu akubarira vyose, natwe tuzovyumvira, tuvyitondere.

²⁸Maz’ Uhoraho yumva amajambo yanyu mumbariye; nukw arambarira, ati Numvise amajambo y’abo bantu bakubariye; ivyo bavuze vyose babivuze ko.

²⁹At’ Icompa bagahorana ben’ uwo mutima, ubatera kunyubaha no kwama bitondera ivyagezwe vyanje vyose, kugira ngo bamererwe neza, bo n’uruvyaro rwabo, ibihe vyose!

³⁰Ati Genda ubabgire, uti Ni mwisubirire mu mahema yanyu.

³¹At’ Ariko weho, ugume hano aho ndi, nkubarire ivyagezwe vyose n’amabgirizwa n’ibishinzwe ukwiye kubigisha, kugira ngo baze bavyitondere bashitse mu gihugu nabahaye kuzokwegukira.

³²Nuko rero muze mwitondere ivyo Uhoraho Imana yanyu yababariye; ntimuze mutambamire i buryo cank’ i bumoso.

³³Muze mujane inzira yose Uhoraho Imana yanyu yabarangiye, kugira ngo mubone kubaho, mumererwe neza, muze muhore muba mur’ ico gihugu mugiye kwegukira.