Read Bibliya Yera 1951 Yohana 11 Bible Online

Yohana 11 - Bibliya Yera 1951 bible

Yohana 11

¹Hārih’ uwar’ arwaye, ni Lazaro w’i Betaniya, ni wa musozi Mariya na mwene nyina Marita bābako.

²Uwo Mariya ni we yasīze Umwami Yesu amavuta atāmirana ku birenge, amuhanaguza umushatsi wiwe; uyo Lazaro yar’ arwaye ni we musaza we.

³Bashiki biwe batuma kuri Yesu, bati Mugenzi, wa wundi ukunda ararwaye.

⁴Yesu avyumvise aravuga, at’ Iyo ndwara s’iyo kumwica, ariko n’iyo gushimagirisha Imana, kugira ngo n’Umwana w’Imana imushimagirishe.

⁵Kandi Yesu yarakunda Marita na mwene nyina na Lazaro.

⁶Nuko yumvise kw arwaye, asībira aho hantu yar’ ari imisi ibiri.

⁷Hanyuma y’ivyo abgira abigishwa biwe, ati Dusubire i Yudaya.

⁸Abigishwa baramubgira, bati Mwigisha, Abayuda baheruka gushaka kugutera amabuye, non’ usubireyo?

⁹Yesu arabishura, ati Non’ isaha z’umurango s’icumi na zibiri? Ūgenda ku murango ntatsitara, kukw abona umuco w’iyi si.

¹⁰Arik’ ūgenda mw ijoro aratsitara, kuk’ umuco utari muri we.

¹¹Amaze kuvuga ivyo, arababgira, ati Lazaro, umukunzi wacu, arasinziriye, nanje ndagiye kumukangura.

¹²Nukw abigishwa baramubgira, bati Mugenzi, asangw’ asinziriye, azokira.

¹³Yamara Yesu yavuga urupfu rwiwe, ariko bo bagira ngw avuga kuruhuka kwo gusinzira.

¹⁴Buno Yesu avuga abifoboye, ati Lazaro yahwereye;

¹⁵ariko kubganyu ndanezerewe ko ntāriyo, kugira ngo muze mwizere; noneho ni muze tuje iy’ ari.

¹⁶Toma ari we Hasa abgira abigishwa bagenzi biwe, ati Ngo tugende, dupfane na Yesu.

¹⁷Nuko Yesu ashitse asanga amaze imisi ine mu mva.

¹⁸I Betaniya hāri hafi y’i Yerusalemu nka stadiyo[4] cumi na zitanu.

¹⁹Nukw Abayuda benshi bāri baje kwa Marita na Mariya kubirura kubga musaza wabo.

²⁰Nuko Marita yumvise ko Yesu aje, aragenda aramusanganira; ariko Mariya asigara yicaye mu nzu.

²¹Marita abgira Yesu, ati Mugenzi, iy’ uba wari hano, musazanje ntaba yāhwereye.

²²Kandi n’ubu ndazi kw ivyo wosaba Imana vyose, Imana yobiguha.

²³Yesu aramubgira, ati Musazawe azozuka.

²⁴Marita aramwishura, ati Ndazi kw azozuka mw izuka ryo ku musi w’iherezo.

²⁵Yesu aramubgira, ati Ni jewe kuzuka n’ubugingo. Ūnyizera n’iyo yoba yarapfuye, azobaho;

²⁶kand’ ūriho wese anyizera, nta ho azokwigera apfa gushitsa ibihe bidashira. Urizeye ivyo?

²⁷Na we at’ Ego me Mugenzi, nizeye k’uri Kristo, Umwana w’Imana, umwe wo kuza mw isi.

²⁸Avuze ivyo, asubira inyuma, yonjorora Mariya, mwene nyina, at’ Umwigisha ari hano, araguhamagaje.

²⁹Na we avyumvise, ava hasi n’ingoga, aja ah’ ari.

³⁰Yesu ntiyaribgashike mur’ iyo mihana, ariko yar’ akiri ha handi aho Marita yamusanganiriye.

³¹Bun’ Abayuda bāri kumwe na Mariya mu nzu bamwirura, babonye avuye hasi n’ingoga, asohotse, baramukurikira, bagira ngw agiye kuririra ku mva.

³²Mariya ashitse aho Yesu ari, amubonye, yikubita imbere y’ibirenge vyiwe, ati Mugenzi, iy’ uba wari hano, musazanje ntaba yāhwereye.

³³Yesu abonye kw arira, n’Abayuda bāri kumwe na we barira, agira ikigumbagumba mu mutima, arawuhagarika,

³⁴arababaza, ati Mwamutaye hehe? Bati Mugenzi, ngwino urābe.

³⁵Yesu ararira.

³⁶Abayuda baravuga, bat’ Eh’ ingene yamukunda.

³⁷Ariko bamwe muri bo baravuga, bati Mbeg’ uyo yahumūye amaso y’impumyi, ntiyoshoboye kubuza uyo ngo ntapfe?

³⁸Yesu yongera kugira ikigumbagumba mu mutima, ashika ku mva; kandi yar’ isenga yugajwe ikibuye.

³⁹Yesu aravuga, ati Ni mukūreh’ iryo buye. Marita mushiki w’uwapfuye, aramubgira, ati Mugenzi, ereg’ ubu aramaze kunuka, kw amaze imisi ine.

⁴⁰Yesu aramubgira, ati Sinakubgiye nti Ni wizera urabona ubgiza bg’Imana?

⁴¹Nuko bakūrah’ ikibuye. Buno Yesu ararangamiza, ati Data, ndagushima ko wanyumvirije.

⁴²Jewe nari nsanzwe nzi k’unyumviriza ubudasība, ariko mbivugishijwe n’ishengero rihagaze ngaha, kugira ngo bizere kw ari wewe wantumye.

⁴³Amaze kuvuga ivyo, asemerera n’ijwi rirenga, ati Lazaro, ngwino, sohoka.

⁴⁴Uwari yāpfuye arasohoka, azingiriwekw impuzu ku maguru no ku maboko, n’igitambara gipfutse mu maso hiwe. Yesu arababgira, ati Ni mumuhamburure, mumureke, agende.

⁴⁵Nuko benshi mur’ abo Bayuda bari baje kwa Mariya, babonye ico Yesu akoze, baramwizera,

⁴⁶ariko bamwe muri bo baja ku Bafarisayo, bababgira ivyo Yesu akoze.

⁴⁷Nukw abaherezi bakuru n’Abafarisayo bakoranya abanyekombe, barababaza, bati Mbega, tugire dute? K’uyu muntu akora ibimenyetso vyinshi.

⁴⁸Ni twamurekeraho durtyo, bose bazohava bamwizera, kand’ Abaroma bazoza batikize igisagara cacu n’ubgoko bgacu.

⁴⁹Arik’ umwe muri bo, ni Kayafa, yar’ umuherezi mukuru mur’ uwo mwaka, arababgira, ati Mwebge nta co muzi na mba,

⁵⁰kandi nta co mwiyumvira yukw ar’ ibibereye kubganyu k’umuntu umwe apfira abantu, hak’ ubgoko bgose buhona.

⁵¹Ivyo ntiyabivuze avyigeneye, ariko, kuko yar’ umuherezi mukuru mur’ uwo mwaka, yavugishijwe ko Yesu agira apfire ubgo bgoko;

⁵²kandi s’ubgo bgoko bgonyene, ariko ngw abana b’Imana bose bari basanzaye, abakoranirize hamwe.

⁵³Nuko bahēra uwo musi baja inama yo kumwica.

⁵⁴Maze Yesu ntiyaba akigenda yibonekeza mu Bayuda, arikw avayo, aja mu gihugu kiri hafi y’ubugaragwa mu gisagara citwa Efurayimu, agumanayo n’abigishwa.

⁵⁵Maze Pasika y’Abayuda yarikw irashika, benshi bava mu misozi, badūga i Yerusalemu, Pasika itarashika, ngo bihumanure.

⁵⁶Maze barondera Yesu, babazanya bahagaze mu rusengero, bati Mbega, mugira ngw iki? Ubgo ntazoza mur’ iyi misi mikuru?

⁵⁷Kand’ abaherezi bakuru n’Abafarisayo bāri bashinze ng’ uwomenya ah’ ari aharange, ngo bamufate.