Read Bibliya Yera 1951 Yohana 17 Bible Online

Yohana 17 - Bibliya Yera 1951 bible

Yohana 17

¹Yesu avuze ivyo, arangamiza mw ijuru, ati Data, igihe kirashitse: shimagiza Umwana wawe, ng’ Umwana agushimagize;

²nk’uko wamuhaye ububasha ku bafise umubiri bose, ngw abo wamuhaye bose abahe ubugingo budashira.

³Ubu ni bgo bugingo budashira, ko bamenya wewe, Imana yonyene y’ukuri, n’uwo watumye, Yesu Kristo.

⁴Nagushimagije mw isi, nnonosoye igikorwa wampaye gukora.

⁵Na none Data, unshimagizanye nawe, unshimagirishije bga bgiza nahoranye ndi kumwe nawe, isi itararemwa.

⁶Nahishuriye izina ryawe abantu wampaye mu b’isi; bar’ abawe, urabampa, kandi bitondeye ijambo ryawe.

⁷None bamenye yukw ivyo wampaye vyose biva kuri wewe:

⁸kukw amajambo wampaye nayabahaye, na bo bakayākīra, bakamenya vy’ukuri ko naturutse kuri wewe; bakizera kw ari wewe wantumye.

⁹Ndabasabira; sinsabira ab’ isi, ariko nsabira abo wampaye, kukw ar’ abawe;

¹⁰kand’ ivyanje vyose n’ivyawe, n’ivyawe na vyo n’ivyanje, kandi nashimagijwe muri bo.

¹¹Sinkiri mw isi, ariko bo bari mw isi, nanje ndaje kuri wewe. Data wera, ubazigamire mw izina ryawe wampaye, ngo babe umwe nk’uko natwe turi.

¹²Nkiri kumwe na bo, nabazigamiye mw izina ryawe wampaye. Narabashibamyeko, kandi nta n’umwe muri bo yapfuye rubi, atari wa mwana wo gupfa rubi, kugira ngw ivyanditswe bishike.

¹³Ariko none ndaje kuri wewe, kand’ ibi mbivuga ndi mw isi, kugira ngo bagire umunezero wanje wuzure muri bo.

¹⁴Nabahaye ijambo ryawe; kand’ ab’ isi barabanka, kukw atar’ ab’ isi, nk’uko nanje ntar’ uw’ isi.

¹⁵Singusaba ng’ ubakūre mw isi, ariko ng’ ubarinde wa Mubi.

¹⁶S’ab’ isi, nk’uko nanje ntar’ uw’ isi.

¹⁷Ubeze mu kuri: ijambo ryawe ni ryo kuri.

¹⁸Nk’uko wantumye mw isi, ni ko nanje nabatumye mw isi:

¹⁹kandi nanje niyeza kubgabo, kugira ngo na bo babe bejejwe mu kuri.

²⁰Sinsabira aba gusa, ariko ndasabira n’abo bazonyizera kubg’ ijambo ry’aba,

²¹kugira ngo bose babe umwe, nk’uko wewe, Data, uri muri jewe, nanje nkaba muri wewe, ngo na bo abe ari ko baba muri twebge, ngw isi yizere kw ari wewe wantumye.

²²Nanje nabahaye ubgiza wampaye, ngo babe umwe, nk’uko natwe tur’ umwe.

²³Jewe mbe muri bo, nawe ube muri jewe, ngo bahīngūrwe babe umwe, kugira ngw isi imenye kw ari wewe wantumye, ukabakunda, nk’uko wankunze.

²⁴Data, abo wampaye ndagomba kw aho ndi na bo bahabana nanje, ngo barābe ubgiza bganje wampaye, kuko wankunze itanguriro ry’isi ritarashirwaho.

²⁵Data ugororotse, isi ntiyakumenye, ariko jewe narakumenye, n’aba na bo bamenye kw ari wewe wantumye.

²⁶Nabamenyesheje izina ryawe, kandi nzoribamenyesha, ng’ urukundo wankunze rube muri bo, nanje mbe muri bo.