Read Bibliya Yera 1951 Yohana 6 Bible Online

Yohana 6 - Bibliya Yera 1951 bible

Yohana 6

¹Hanyuma y’ivyo Yesu avayo, yīgira hakurya y’ikiyaga c’i Galilaya citwa Tiberiya.

²Ishengero ryinshi riramukurikira kuko ribonye ibimenyetso akora ku barwaye.

³Yesu adūga umusozi, yicaranayo n’abigishwa biwe.

⁴Kandi Pasika, imisi mikuru y’Abayuda, yari hafi.

⁵Yesu yunamuye amaso, abona ishengero ryinshi riza kuri we, abaza Filipo, ati Tugurira hehe imitsima, ngo barye bose?

⁶Icatumye avuga artyo kwār’ ukumugeza, kuk’ ubgiwe yar’ azi ico agira akore.

⁷Filipo aramwishura, at’ Imitsima y’idenariyo[1] amajana abiri ntiyobakwira, nah’ umuntu wese yohabga gatoya.

⁸Umwe mu bigishwa biwe, ni Andereya mwene nyina wa Simoni Petero, aramubgira,

⁹ati Hano har’ umuhungu ari n’udutsima dutanu twa sayiri, n’udufi tubiri, ariko tumaze iki mu bantu bangaho?

¹⁰Yesu aravuga, ati Ni mwicarike abantu. Kand’ aho hantu hār’ ivyatsi vyinshi: nukw abantu baricara, igitigiri cabo cari nk’ibihumbi bitanu.

¹¹Maze Yesu yābīra ya mitsima, arayihezagira, ayigaburira abicaye, n’ifi na zo nk’uko bagomba.

¹²Bamaze guhāga, abgira abigishwa biwe, ati Ni mutororokanye utumanyagu tw’ imisigazwa, hoye kugira igipfa ubusa.

¹³Baradutororokanya, buzuza ibisimbo cumi na bibiri vy’utumanyagu twa ya mitsima itanu ya sayiri, utw’ abāriye bashigaje.

¹⁴Bano bantu babonye ikimenyetso akoze, baravuga, bati N’ukuri uyu ni wa muntu avugishwa n’Imana yar’ akwiye kuza mw isi.

¹⁵Yesu amenye ko bagira baze kumufata ngo bamwimike, asubira ku musozi ari wenyene gusa.

¹⁶Buhwibiriye, abigishwa biwe bamanuka ku kiyaga,

¹⁷batambukira mu bgato, bajabuka baja hakurya y’ikiyaga i Kaperinawumu. Bgateranye Yesu atarabashikīra;

¹⁸ikiyaga gitangura kuzungazunga, kuk’ umuyaga mwinshi uhuhuta.

¹⁹Bamaze gusōza nka stadiyo[2] mirongwibiri na zitanu canke mirongwitatu, babona Yesu agendesha amaguru hejuru ku kiyaga, arikw arēgēra ubgato, na bo baratinya.

²⁰Maz’ arababgira, ati Ni jewe, nta co mutinya.

²¹Bumva bakunze kumushira mu bgato, buno nyene buca bushika i musozi aho bāja.

²²Bukeye bg’aho, rya shengero ryari rihagaze hakurya y’ikiyaga, rimenye kw ata bundi bgato bgāriho atari bumwe, kandi yuko na Yesu atājanye n’abigishwa biwe mu bgato, arikw abigishwa biwe ni bo bāri bījanye:

²³(mugabo hār’ amato ajabuka ava i Tiberiya, afata hafi ya ha hantu bārīriye imitsima ihezagiwe n’Umwami Yesu).

²⁴Nukw iryo shengero ribonye ko Yesu atari ho ari, n’abigishwa biwe na bo ar’ uko, rija mur’ ano mato na ryo, rijabuka i Kaperinawumu rirondera Yesu.

²⁵Bamubonye hakurya y’ikiyaga baramubaza, bati Mwigisha, waje ino ryari?

²⁶Yesu arabishura, ati N’ukuri, n’ukuri ndababgire: Ntimundondera kuko mwabonye ibimenyetso, ariko n’uko mwariye kuri ya mitsima, mugahāga.

²⁷Ntimukorere ivyo kurya biyoka, ariko mukorere ivyo kurya bihoraho bizana ubugingo budashira, ni vyo Umwana w’umuntu azobaha, kukw ari we Imana Data yashizekw ikimenyetso.[3]

²⁸Baramubaza, bati Tugire dute ngo dukore ibikorwa vy’Imana?

²⁹Yesu na we arabishura, at’ Igikorwa c’Imana ngiki: n’uko mwizera uwo yatumye.

³⁰Nuko baramubaza, bati Non’ ukora ikimenyetso ki, ngo tukirābe tukwizere? Ukora ikimeze gite?

³¹Ba sogokuruza bacu bārīra manu mu bugaragwa, nk’uko vyanditswe ngo Yabahaye umutsima wo kurya uvuye mw ijuru.

³²Yesu arababgira, ati N’ukuri, n’ukuri ndababgire: Si Mose yabahaye umutsima uvuye mw ijuru; Data ni we abaha umutsima w’ukuri uvuye mw ijuru.

³³Kuk’ umutsima w’Imana ar’ ūmanuka uva mw ijuru, ugaha abari mw isi ubugingo.

³⁴Baramubgira, bati Mugenzi, na ntaryo uz’ uhore uduha uwo mutsima.

³⁵Yesu arababgira, ati Ni jewe mutsima w’ubugingo: ūza kuri jewe ntazosonza na mba, kand’ ūnyizera nta ho azogira inyota na mba.

³⁶Ariko narababgiye yuko mwāmbonye, muraheza ntimwizera.

³⁷Ico Data ampa cose kiranshikīra, kand’ uwoza kuri jewe sinomuhinda na gatoya.

³⁸Kuko ntākūwe mw ijuru no gukora ivyo nigombera, ariko nazanywe no gukora ivy’ uwantumye agomba.

³⁹Kand’ ic’ uwantumye agomba ngiki: agomba yuko mu vyo yampaye vyose hatagira na kimwe kinzimirana, ariko ngo nze nkizure ku musi w’iherezo.

⁴⁰Kukw iki ari co Data agomba: agomba yuk’ ūbona Umwana wese akamwizera, agira ubugingo budashira, nanje nkazomuzura ku musi w’iherezo.

⁴¹Bun’ Abayuda baramwidodombera, kuko yavuze, ati Ni jewe mutsima wamanutse uva mw ijuru.

⁴²Bat’ Uyu si we Yesu mwene Yosefu? Na se na nyina turabazi: non’ avuga ate ngo Namanutse mva mw ijuru?

⁴³Yesu arabishura, ati Nta co mugira imyidodombo muri mwebge.

⁴⁴Nta n’umwe ashobora kuza kuri jewe Data yantumye atamukwegereye; nanje nzomuzura ku musi w’iherezo.

⁴⁵Mu majambo y’abavugishwa n’Imana handitswe, ngo Bose bazoba abigishijwe n’Imana. Uwumvise ivya Data wese akavyiga, aza kuri jewe.

⁴⁶S’ukugira ngo har’ uwabonye Data, atar’ uwavuye ku Mana: uwo ni we yabonye Data.

⁴⁷N’ukuri, n’ukuri ndababgire: Uwizera afise ubugingo budashira.

⁴⁸Ni jewe mutsima w’ubugingo.

⁴⁹Ba sogokuruza banyu bārīra manu mu bugaragwa, barapfa:

⁵⁰uyu ni wo mutsima umanuka uva mw ijuru, ng’ umuntu awuryako ntapfe.

⁵¹Ni jewe mutsima w’ubugingo wamanutse uvuye mw ijuru; ni hagira ūrya kur’ uwo mutsima azohorah’ ibihe bidashira: kand’ umutsima nzobaha n’umubiri wanje, utangirwa abari mw isi ngo bagire ubugingo.

⁵²Abayuda batanakw ibirake, bat’ Uyu ashobora ate kuduha umubiri wiwe ngo tuwurye?

⁵³Yesu arababgira, ati N’ukuri, n’ukuri ndababgire: Ni mutarya umubiri w’Umwana w’umuntu, ngo munywe amaraso yiwe, nta bugingo mwogira muri mwebge.

⁵⁴Ūrya umubiri wanje akanywa amaraso yanje, ni we afise ubugingo budashira, nanje nzomuzura ku musi w’iherezo.

⁵⁵Kuk’ umubiri wanje ar’ ico kurya c’ukuri, n’amaraso yanje ar’ ico kunywa c’ukuri.

⁵⁶Ūrya umubiri wanje akanywa amaraso yanje, aguma muri jewe, nanje nkaguma muri we.

⁵⁷Nk’uko Data w’ubugingo yantumye, nanje ndiho kubga Data, ni k’ūndya na we azobaho kubganje.

⁵⁸Uwo ni wo mutsima wamanutse uvuye mw ijuru, si nk’uwo ba sogokuruza banyu bāriye, ariko bagapfa; ūrya uwo mutsima azohorah’ ibihe bidashira.

⁵⁹Ivyo yabivugiye mw isinagogi yigisha i Kaperinawumu.

⁶⁰Nuko benshi mu bigishwa biwe bavyumvise, baravuga, bat’ Iryo jambo riragoye: har’ uworyumva akarishobora?

⁶¹Yesu amenye mu mutima kw abigishwa biwe bidodomba ivyo, arababaza, ati Mbeg’ ivyo birabatsitaje?

⁶²None bizomera bite ni mwabona Umwana w’umuntu adūga aja iyo yahora ubga mbere?

⁶³Impwemu ni zo zitera ubugingo, umubiri nta co umaze: amajambo mbabgiye n’impwemu n’ubugingo.

⁶⁴Ariko muri mwebge hariho bamwe batizera. Kuko Yesu yahereye ubga mbere azi abatizera ab’ ari bo, n’ūzomugura uw’ ari we.

⁶⁵Kand’ aravuga, ati Ni co catumye mbabgira kw ata wushobora kuza kuri jewe atabihawe na Data.

⁶⁶Kuva ico gihe benshi mu bigishwa biwe bamuva inyuma, ntibāba bakijana na we.

⁶⁷Yesu abaza bamwe cumi na babiri, ati Mbega namwe muragomba kwīgīra?

⁶⁸Simoni Petero aramwishura, ati Tuje kwa nde ga Mugenzi? Kw ari wewe ufise amajambo y’ubugingo budashira,

⁶⁹natwe twarizeye, tumenya yuko wewe ur’ Uwera w’Imana.

⁷⁰Yesu aramwishura, ati Mbega si jewe nabatoranije uko mur’ icumi na babiri? Arik’ umwe muri mwebge n’umurwanizi.

⁷¹Yavuga Yuda Isikaryota, mwene Simoni, kukw ari we yagira az’ amugure, yar’ uwo muri bamwe cumi na babiri.