Read Bibliya Yera 1951 Yohana 7 Bible Online

Yohana 7 - Bibliya Yera 1951 bible

Yohana 7

¹Hanyuma y’ivyo Yesu agendagenda i Galilaya: ntiyashaka kugendagenda i Yudaya, kukw Abayuda bārondera ingene bomwica.

²Imisi mikuru y’Abayuda yitwa iy’ Insago yarikw irashika.

³Nuko bene nyina baramubgira, bati N’uve ino, uje i Yudaya, abigishwa bawe na bo barābe ibikorwa ukora;

⁴kukw ata wogira ico akora mu mpisho, na we ngw arondere kumenyekana. K’ukora ivyo, ni wiserure mu b’isi.

⁵Kuko na bene nyina na bo batāmwizera.

⁶Maze Yesu arabishura, at’ Igihe canje ntikiragera, arikw igihe canyu co, cama kiriho.

⁷Ab’ isi ntibabanka, ariko jewe baranyanka, kuko mbavugira ibikorwa vyabo kw ari bibi.

⁸Mwebge ni mudūge kumara iyo misi mikuru, ariko jeho sindayidūgako, kukw igihe canje kitaragera.

⁹Ababgiye ivyo, aguma i Galilaya.

¹⁰Bene nyina bamaze kudūga i Yerusalemu kumara iyo misi mikuru, na we aradūga, ntiyibonekeza, arikw agenda nk’uwomba.

¹¹Maz’ Abayuda bamurondera mur’ iyo misi mikuru, bati Mbega wa wundi ari hehe?

¹²Haba ivyongoshwe vyinshi mw ishengero bamuvuga: bamwe bati N’umuntu mwiza, abandi bat’ Oya, arazimiza abantu.

¹³Ariko nta n’umwe yamuvuze atobora, kuko batinya Abayuda.

¹⁴Ya misi mikuru igeze hagati, Yesu adūga mu rusengero, arigisha.

¹⁵Abayuda baratangara, bati Mbeg’ uyu yakūye ubgenge hehe, atigishijwe?

¹⁶Maze Yesu arabishura, at’ Izi nyigisho zanje s’izanje, n’iz’ uwantumye.

¹⁷Ni hāba har’ ūgomba gukora ivyo uwo akunda, azomenya izi nyigisho, ko zavuye ku Mana, canke ko mbivuga mvyigeneye.

¹⁸Ūvuga ivyo yigeneye aba yironderera icubahiro; arik’ ūrondera icubahiro c’uwamutumye, ni we w’ukuri, kandi nta kugabitanya kuba kuri muri we.

¹⁹Mbega Mose si we yabahaye ivyagezwe? Ariko muri mwebge nta n’umwe yitondera ivyo vyagezwe. Muronderera iki kunyica?

²⁰Ishengero riramwishura, rit’ Urimwo dayimoni! Ni nde ashaka kukwica?

²¹Yesu arabishura, ati Nakoze igikorwa kimwe, mwese muratangara.

²²Mose yabahaye ugukebga — mugabo ntikwavuye kuri Mose, ni kuri ba sogokuruza banyu — kandi murakeba umuntu kw isabato.

²³None se, k’umuntu akebga kw isabato, kugira ngw icagezwe ca Mose ntimukirenge, none jewe mumpōra iki ko kw isabato nakijije umuntu yiramvuriye?

²⁴Ntimupfe guca imanza ku biboneka, ariko muce imanza z’ukuri.

²⁵Bamwe mu b’i Yerusalemu baravuga, bati Mbeg’ uwo si we bashaka kwica?

²⁶Ehe avuga akararamango, nta co baruha bamubgira. Mbega harya abakuru bemeye vy’ ukuri k’uyo ari we Kristo?

²⁷Uyo ko tuzi aho yaturutse, ariko Kristo ah’azozira, nta wuzi ah’ azoturuka.

²⁸Nuko Yesu arasemerera yigisha mu rusengero, ati Jewe muranzi, n’aho naturutse murahazi, kandi sinaje nitumye, arik’ uwantumye n’uw’ ukuri, mwebge ntimumuzi;

²⁹jeho ndamuzi, kuko navuye kuri we, kand’ ari we yantumye.

³⁰Buno barondera ingene bomufata, ariko ntihagira ūmukozako n’intoke, kukw igihe ciwe kitaribgagere.

³¹Benshi mw ishengero baramwizera baravuga, bati Kristo ni yaza, mugira ngw azokora ibimenyetso vyinshi birengeye ivyo uyu akora?

³²Abafarisayo bumvise kw ishengero rimuvugana ivyo mu twongoshwe, abaherezi bakuru n’Abafarisayo batuma abagendanyi kumufata.

³³Maze Yesu aravuga, ati Hasigaye igihe gito nkiri kumwe namwe, nkaja ku wantumye.

³⁴Muzondondera, ariko ntimuzombona, kand’ iyo nzoba ndi ntimuzoshobora gushikayo.

³⁵Maz’ Abayuda baravugana, bati Mbeg’ uyo agira aje hehe, aho twebge tutazoshobora kumubona? Agira aje mu bāsābagiriye mu Bagiriki, ngw aze yigishe Abagiriki?

³⁶Mbeg’ iryo jambo atubgiye n’iriki, ngo Muzondondera, ariko ntimuzombona, kandi ngw Iyo nzoba ndi mwebge ntimuzoshobora gushikayo?

³⁷Nuko ku musi uherūkira ya misi mikuru, ni wo musi uruta iyindi, Yesu arahagarara, arasemerera, ati Namba har’ ūfise inyota, n’aze kuri jewe, anywe.

³⁸Ūnyizera, inzūzi z’amazi y’ubugingo zizotemba ziva mu nda yiwe, nk’ukw ivyanditswe bivuga.

³⁹Arikw ivyo yabivuze kuri Mpwemu, uwo abamwizera bāgira bahabge; kuko Mpwemu ataribgatangwe, kuko Yesu ataribgashike mu bgiza bgiwe.

⁴⁰Bamwe mw ishengero bumvise ayo majambo, bati N’ukuri uyu ni wa muntu avugishwa n’Imana.

⁴¹Abandi bat’ Uyu ni we Kristo. Abandi bat’ Oya, mbega Kristo yova i Galilaya?

⁴²Mbeg’ icanditswe ntikivuga ko Kristo azova mu ruvyaro rwa Dawidi, i Betelehemu, wa musozi Dawidi yabako?

⁴³Ishengero riramupfa,

⁴⁴bamwe muri bo bashaka kumufata, ariko ntihāgira n’umwe amukozako n’intoke.

⁴⁵Nuko ba bagendanyi basubira ku baherezi bakuru n’Abafarisayo, na bo barababaza, bati Ko mutamuzanye?

⁴⁶Abagendanyi barabishura, bat’ Erega ntihigeze kuboneka umuntu avuga nka we.

⁴⁷Abafarisayo barababaza, bati Mbega namwe mwajimijwe?

⁴⁸Har’ umukuru n’umwe yamwizeye, cank’ Umufarisayo?

⁴⁹Arikw abo bantu batazi ivyagezwe n’ibivume.

⁵⁰Nikodemo, umwe yaza kuri we mbere, yar’ umwe muri bo, arababaza,

⁵¹ati Mbeg’ ivyagezwe vyacu biratsindisha umuntu batabanje kumwumva no kumenya ico yakoze?

⁵²Baramwishura, bati Mbega nawe ur’ uw’ i Galilaya? Sesa urābe yuko har’ ūvugishwa n’Imana yova i Galilaya. [

⁵³Bose baca baritahira.