Read Bibliya Yera 1951 Yohana 9 Bible Online

Yohana 9 - Bibliya Yera 1951 bible

Yohana 9

¹Arikw arahita, abona umuntu yavutse ar’ impumyi.

²Abigishwa biwe baramubaza, bati Mwigisha, ni nde yakoze icaha, n’uyo, canke n’abavyeyi biwe, ko yavutse ar’ impumyi?

³Yesu arabishura, at’ Uyu ntiyakoze icaha, kandi s’abavyeyi biwe, ariko n’ukugira ngw ibikorwa vy’Imana bibonekere kuri we.

⁴Twebge dukwiye gukora ibikorwa vy’uwantumye hakibona; buhava bgira, ata wugishobora gukora.

⁵Nkiri mw isi, nd’ umuco w’isi.

⁶Avuze ivyo, acira amate hasi, avurungisha amate utwondo, araheza amusīga utwo twondo ku maso;

⁷aramubarira, ati Genda wiyuhagire mu kidengeri Silowamu; (Silowamu risobanurwa ngo Mutumwa). Nukw aragenda ariyuhagira, agaruka abona.

⁸Nukw ababanyi biwe, n’abāhora bamubona kw ar’ umusēzi, barabazanya, bati Mbeg’ uyu si we yahora yicaye asēgerereza?

⁹Abandi bati Ni we; abandi bat’ Oya, n’uwo basa. Na we arababgira, ati Ni jewe.

¹⁰Nuko baramubaza, bati Mbega non’ amaso yawe yahumūtse ate?

¹¹Na we arabishura, ati Wa muntu yitwa Yesu yavurunze utwondo, atunsīga ku maso, arambgira, ati Ja kuri Silowamu wiyuhagire; nuko ndagenda, ndiyuhagira, ndahumūka.

¹²Baramubaza, bat’ Ari hehe? Ati Sindahazi.

¹³Umwe yahora ar’impumyi bamujana ku Bafarisayo.

¹⁴Kand’ uwo musi war’ isabato, Yesu yavurunzek’ utwondo, agahumūra amaso yiwe.

¹⁵Abafarisayo basubira kumubaza ingene yahumūtse, na we arababgira, ati Yansīze utwondo ku maso, ndiyuhagira, ndahumūka.

¹⁶Bamwe mu Bafarisayo baravuga, bat’ Uwo muntu ntava ku Mana, kukw ataziririza isabato. Abandi bati Mbeg’ umuntu w’umunyavyaha yoshobora ate gukora ibimenyetso bingana birtyo? Baramupfa.

¹⁷Basubira kubaza umwe yahora ar’ impumyi, bati Weho uvuga kw ar’ iki, kuko yaguhumūye amaso? Na we ati N’ūvugishwa n’Imana.

¹⁸Maz’ Abayuda ntibemera ivy’ uwo, yuko yamye ar’impumyi, agaheza agahumūka, kugeza aho bāhamagariye abavyeyi b’uwahumūtse,

¹⁹barababaza, bati Mbeg’ uyu n’umwana wanyu, mwebge muvuga ko yavutse ar’ impumyi? None yahumūtse ate?

²⁰Abavyeyi biwe barabishura, bat’ Uyu turazi kw ar’ umwana wacu, kandi ko yavutse ar’ impumyi;

²¹arikw icatumye abona ubu, ntitukizi, kandi n’uwamuhumūye, tweho ntitumuzi. Mumwibarize, n’umugabo, arivugira.

²²Abavyeyi biwe bāvugiye ivyo, kuko bātinya Abayuda, kukw Abayuda bāri bamaze kuja ingingo, ng’umuntu wese azokwatura Yesu kw ari Kristo acibge mw isinagogi.

²³Ni co catumye abavyeyi biwe bavuga, bati N’umugabo, ni mumwibarize.

²⁴Maze bahamagara ubugira kabiri wa muntu yahora ar’ impumyi, baramubgira, bati Ni wubahe Imana, twebge tuzi yuk’ uwo muntu ar’ umunyavyaha.

²⁵Na we arabishura, ati Namb’ ar’ umunyavyaha sindabizi: ico nzi ni kimwe, n’uko nar’ impumyi, none nkaba mbona.

²⁶Baramubaza, bati Yakugiriye ate? Yahumūye amaso yawe ate?

²⁷Arabishura, ati Namaze kubibabgira, ko mutavyumvise? Mugombera iki gusubira kuvyumva? Mbega namwe mugomba kuba abigishwa biwe?

²⁸Baramutuka, bati Ni wewe mwigishwa wiwe, natwe tweho tur’ abigishwa ba Mose.

²⁹Twebge tuzi yukw Imana yavuganye na Mose, arik’ uwo ntituzi ah’ aturuka.

³⁰Wa muntu arabishura, at’ Erega n’igitangaza ko mutazi ah’ aturuka, kand’ ari we yahumūye amaso yanje.

³¹Turazi kw Imana itumviriza abanyavyaha, arik’ ūyubaha, agakora ivyo igomba, uwo ni we yumviriza.

³²Uhereye kera hose ntihumvikanye ko har’ umuntu yahumūye amaso y’uwavutse ar’ impumyi.

³³Iyaba uyo atāvuye ku Mana, nta co yoshoboye gukora.

³⁴Baramwishura, bati Wewe wavukiye mu vyaha gusa gusa, ni wewe utwigisha? Bamuhindira hanze.

³⁵Yesu yumvise ko bamuhindiye hanze, aja kumurāba, aramubaza, ati Mbega wizeye Umwana w’Imana?

³⁶Na we aramwishura, ati Ni nde ga Mugenzi, nkamwizera?

³⁷Yesu aramubgira, ati Wamubonye, kandi ni we muriko muravugana.

³⁸Na we ati Ndizeye, Mwami. Araheza aramupfukamira.

³⁹Yesu aravuga, ati Naje mur’ iyi si kuba agahinyuza, ngw abatabona babone, n’ababona babe impumyi.

⁴⁰Bamwe mu Bafarisayo bāri kumwe na we bumvise ivyo, bati Mbega natwe tur’ impumyi?

⁴¹Yesu arababgira, at’ Iyo muba mwar’ impumyi, nta caha muba mufise, ariko noneho muvuga muti Turabona: icaha canyu camaho.