Read Bibliya Yera 1951 Abaroma 15 Bible Online

Abaroma 15 - Bibliya Yera 1951 bible

Abaroma 15

¹Twebge abakomeye dukwiye kwihanganira intege nke z’abadakomeye, no kutinezereza.

²Umuntu wese muri twebge anezereze mugenzi we, kugira ngw abone ivyiza, akomezwe.

³Kuko na Kristo atinejereje, nk’uko handitswe, ngw Ibitutsi vy’abāgutuka vyaguye kuri jewe.

⁴Kukw ivyanditswe kera vyose vyandikiwe kutwigisha, kugira ngo kwihangana no guhumurizwa guheshwa n’ivyanditswe biduhe kwizigira ibizoba.

⁵Arikw Imana itanga ukwihangana n’uguhumurizwa ibahe guhūza imitima yanyu, nk’uko Kristo Yesu agomba,

⁶kugira ngo muhimbaze n’umutima umwe n’akanwa kamwe Imana y’Umwami wacu Yesu Kristo, ni yo Se.

⁷Nuko mwemerane, nk’uko Kristo na we yabemeye, kugira ngw Imana ishimishwe.

⁸Ico mvuga n’uko Kristo yacitse umukozi w’abākebge wo kubagaburira ivy’ Imana, kubg’ ukuri kwayo, kugira ngw ashitse ivyo ba sogokuruza bāsezeraniwe,

⁹kandi ngw abanyamahanga bahimbarize Imana imbabazi zayo, nk’uko handitswe, ngo Ni co gituma nzogutazira mu mahanga, Ndirimbe izina ryawe.

¹⁰Kandi yongera kuvuga, ati Yemwe banyamahanga ni munezeranwe n’abantu bayo.

¹¹Kand’ arongera, ati Yemwe banyamahanga mwese, ni mushime Uhoraho, Kand’ amoko yose amuhimbaze.

¹²Kandi Yesaya na we yaravuze, ati Hazobah’ igishitsi ca Isayi, Ni we azohaguruka kuganza amahanga, Ni we abanyamahanga bazokwizigira.

¹³Imana itanga ivyizigiro ibuzuze umunezero wose n’amahoro biva ku kwizera, kugira ngo murushirize kwizigira ibizoba, mubihawe n’ubushobozi bga Mpwemu Yera.

¹⁴Bene Data, nanje nyene ndazi ivyanyu ntakekeranya, yuko mwuzuye ineza, mwuzuye ubgenge bgose, mushobora no guhanūrana.

¹⁵Ariko mbandikiye hamwe-hamwe ndushirije gushira amanga, nk’ūbibutsa, kubg’ ubuntu nahawe n’Imana,

¹⁶ngo mbe umusuku wa Kristo Yesu ku banyamahanga, nsukūrira ubutumwa bgiza bg’Imana nk’umuherezi, kugira ngw abanyamahanga babe ikimazi gishimwa, cejejwe na Mpwemu Yera.

¹⁷Nuko mfise ukwirata mu vy’Imana muri Kristo Yesu.

¹⁸Sinzotinyuka kuvuga ikintu na kimwe atar’ ico nakoreshejwe na Kristo, kugira ngw abanyamahanga baganduke, ampaye amajambo n’ibikorwa,

¹⁹n’ubushobozi bg’ibimenyetso bikomeye, n’ibitangaza, n’ubushobozi bga Mpwemu Yera. Ivyo vyatumye nshitsa ubutumwa bga Kristo, utanguriye i Yerusalemu, ugakikuza, ugashika no muri Iluriko,

²⁰namanye imigabo yo kuvuga ubutumwa bgiza, ah’ izina rya Kristo ritaribgamenyekane, ngo sinubake kw itanguriro ryubatswe n’uwundi:

²¹yamara ngo bimere nk’uko handitswe, ngw Abatīgāniwe ivyiwe bazobibona, Kand’ abataravyumva bazovyitegereza.

²²Ni co gituma ngira igisīvya kenshi co kuza i wanyu:

²³ariko none ntihakinyagukiye mur’ ibi bihugu, kand’ uhereye mu myaka myinshi nifuza kuza i wanyu,

²⁴aho nzogīra i Sipaniya. Kuko nizigira kuzobarāba nciye iyo, mukamperekeza, mukansezera neza njayo, ni namara kubashira inkumbu buhoro.

²⁵Arik’ ubu ndiko ndaja i Yerusalemu kugaburira abera.

²⁶Kukw ab’i Makedoniya no muri Akaya bahimbawe no gusorōranya ivyo gutabara aboro bo mu bera b’i Yerusalemu.

²⁷Vyarabahimbaye, kandi babafitiye umwenda: kuko namb’ abanyamahanga bāsangiye ivy’ impwemu vyabo, bafise umwenda wo kubafasha ku vy’umubiri.

²⁸Ni naheraheza ivyo, mmaze kubashikiriza neza izo mbuto z’ubuntu, nzovayo, nce i wanyu, nje i Sipaniya.

²⁹Kandi ndazi yukw aho nzozira i wanyu, nzoza nzanye umugisha wa Kristo wuzuye.

³⁰Nuko ndabinginga, bene Data, kubg’ Umwami wacu Yesu Kristo, no kubg’ urukundo ruva kuri Mpwemu, murwanane nanje munsabire Imana,

³¹nkire ab’i Yudaya batayumvira, kand’ ingaburo yanje ngiye kugabura i Yerusalemu ishimwe n’abera;

³²mbone uko nza i wanyu nnezerewe, Imana ni yabikunda, nduhukane namwe.

³³Imana Nyen’ amahoro ibane namwe mwese. Amen.