Read Bibliya Yera 1951 Abaroma 7 Bible Online

Abaroma 7 - Bibliya Yera 1951 bible

Abaroma 7

¹Canke ga bene Data, ntimuzi yukw ivyagezwe biganza umuntu akiriho? mbgiye abazi ivyagezwe.

²Kukw ivyagezwe bihambirira umugore ku mugabo wiwe, akiriho: arik’ umugabo wiwe iy’ apfuye, umugore aba ahamburuwe ngo ntaganzwe na we.

³None rero, umugabo wiwe akiriho, yokwābīrwa n’uwundi mugabo, yokwitwa umusambanyikazi: arik’ umugabo wiwe iy’ apfuye, ntaba akiganzwa n’ivyagezwe, bituma atoba umusambanyikazi, naho yokwābīrwa n’uwundi mugabo.

⁴None rero namwe, bene Data, gukoranywa n’umubiri wa Kristo kwatumye mucika abapfuye ku vyagezwe, kugira ngo mwābīrwe n’uwundi, ni we yazutse mu bapfuye, twamire Imana imbuto.

⁵Tukiganzwa n’akameremere kacu, ukwifuza kw’ivyaha kw’uburyo bginshi kwazanywe n’ivyagezwe kwakorera mu mibiri yacu, kugira ngo twamire urupfu imbuto.

⁶Ariko noneho ntitukiganzwa n’ivyagezwe, kuko twapfuye ku camye kidufashe, ni co gituma tuba abagurano, dukorera Mpwemu adukoresha uburyo busha, tudakoreshwa bga buryo bga kera bg’inyuguti.

⁷Nuko tuvuge iki? Mbeg’ ivyagezwe n’icaha? Eka na mba. Ariko simba naramenye icaha, iyo ntakimenyeshwa n’ivyagezwe; kuko ntaba naramenye ukwifuza, iy’ ivyagezwe bitavuga ngo Ntukifuze.

⁸Arikw icaha kibonye urwitwazo mu vyagezwe, gikorera muri jewe ukwifuza kw’uburyo bgose: kukw icaha kiba gipfuye, ivyagezwe bitariho.

⁹Nanje kera nariho, ntafise ivyagezwe: maz’ icagezwe kije, icaha kirarabūka, nanje ndapfa;

¹⁰kand’ ico cagezwe co kuzana ubugingo nakibona kinzanira urupfu.

¹¹Kukw icaha campendahenze, kibonye urwitwazo mu cagezwe, kandi kigitera kunyica.

¹²None rer’ ivyagezwe n’ivyera, kand’ ibgirizwa n’iryera, rigororotse, ryiza.

¹³Mbeg’ iciza cambereye urupfu? Eka na mba! Arikw icaha ni co cārubaye, ngo kimenyekane kw ar’ icaha, kuko canyicishije iciza, ngw icagezwe gitume icaha kirushiriza kuba kibi.

¹⁴Kuko tuzi yukw ivyagezwe ar’ ivy’ impwemu; ariko jewe nganzwa n’akameremere kanje, naguriwe kuba umugurano w’icaha.

¹⁵Sinzi ico nkora; kukw ico ngomba atari co nkora, arikw ico nanka akaba ari co nkora.

¹⁶Ariko ko nkora ico ntagomba, mba nemeye ivyagezwe kw ari vyiza.

¹⁷None rero si jewe nkibikora, ariko n’icaha kimbamwo.

¹⁸Ndazi yuko muri jewe, mu kameremere kanje, ata ciza kimbamwo: kuko kugomba gukora iciza kubana nanje, ariko kugikora nta kwo.

¹⁹Kukw iciza ngomba atari co nkora, arikw ikibi ntagomba akaba ari co nkora.

²⁰Ariko ko nkora ico ntagomba, si jewe nkigikora, ariko n’icaha kimbamwo.

²¹Ni ko mbona ikingera, yuko naho ngomba gukora iciza, ikibi kibana nanje.

²²Nnezererwa ivyagezwe n’Imana mu mutima wanje,

²³ariko mbona ikindi kingera kiri mu mubiri wanje kirwanya ikingera co mu mutima wanje, kikamfatira mpiri kuganzwa n’ikingera kiri mu mubiri wanje, ikingera c’icaha.

²⁴Ewe jewe ndagowe! Ni nde yonkiza umubiri untera uru rupfu?

²⁵Imana ishimwe, kubga Yesu Kristo Umwami wacu. Nuko jewe mu mutima wanje njakariye ivyagezwe n’Imana, ariko mu kameremere njakariye ikingera c’icaha.