Read Bibliya Yera 1951 1 Ab’i Korinto 1 Bible Online

1 Ab’i Korinto 1 - Bibliya Yera 1951 bible

1 Ab’i Korinto 1

¹Jewe Paulo, nahamagariwe kuba intumwa ya Yesu Kristo, nk’ukw Imana yagomvye, na Sositene mwene Data,

²turabandikiye mwebge abo mw ishengero ry’Imana ry’i Korinto, bejejwe muri Kristo Yesu, bāhamagariwe kuba abera, hamwe na bose bambariza ahantu hose izina ry’Umwami wacu Yesu Kristo, ni we Mwami wabo n’uwacu.

³Ubuntu n’amahoro bibe muri mwebge, biva ku Mana Data wa twese no ku Mwami Yesu Kristo.

⁴Ndashima Imana yanje na ntaryo kubganyu, kubg’ ubuntu bg’Imana mwahērewe muri Kristo Yesu:

⁵kuko muri vyose mwatungiye muri we, mu vyo muvuga vyose, no mu bgenge bgose,

⁶kuk’ ugushingira intahe Kristo kwakomejwe muri mwebge.

⁷Bituma mutagira ingabire n’imwe muhaza, mwiteze guhishurwa kw’ Umwami wacu Yesu Kristo.

⁸Ni we azobakomeza gushitsa kw iherezo, kugira ngo ntimuze mugawe kuri wa musi w’Umwami wacu Yesu Kristo.

⁹Imana n’iyo kwizerwa, yabahamagariye kugirirana ubumwe n’Umwana wayo Yesu Kristo Umwami wacu.

¹⁰Ariko ndabinginga, bene Data, mw izina ry’Umwami wacu Yesu Kristo, mwese mube imvugarimwe, kandi n’ibice ntibiremwe muri mwebge, ariko mutunganywe rwose hamwe, muhūje umutima n’inama.

¹¹Kuko nabariwe ivyanyu, bene Data, n’abo kwa Kilowe, yuko har’ imitongano muri mwebge.

¹²Ico mvuze n’iki, yuk’ umuntu wese muri mwebge avuga, ati Jeho nd’uwa Paulo; uwundi ati Jeho nd’uwa Apolo; uwundi ati Jeho nd’uwa Kefa; uwundi ati Jeho nd’uwa Kristo.

¹³Mbega Kristo aragabanijwemw’ ibice? Paulo yarababambiwe? Canke mwabatijwe mw izina rya Paulo?

¹⁴Nshimira Imana yukw ata n’umwe nabatije muri mwebge, atari Kirisipo na Gayo;

¹⁵kugira ngo ntihagire umuntu avuga yuko mwabatijwe mw izina ryanje.

¹⁶Kandi nabatije n’abo kwa Stefana: atar’ abo, sinzi ko har’ uwundi nabatije.

¹⁷Kuko Kristo atāntumye kubatiza, ariko yantumye kuvuga ubutumwa bgiza, ntavugishije ubgenge bg’amajambo, kugira ng’ umusaraba wa Kristo ntucīke ubusa.

¹⁸Kukw ijambo ry’umusaraba ku bahona ar’ ubupfu, ariko kuri twebge abakizwa n’ubushobozi bg’Imana.

¹⁹Kuko handitswe, ngo Nzohonnya ubgenge bg’abanyabgenge, N’ubuhanga bg’abahanga nzobuhindura ubusa.

²⁰Umunyabgenge ari hehe? Umwanditsi ari hehe? Umunyabihāri wo mur’ iki gihe ari hehe? Mbeg’ Imana ntiyahinduye ubupfu ubgenge bg’iyi si?

²¹Kuko nah’ ubgenge bg’Imana bgageze yukw ab’ isi batazohabga n’ubgenge bg’isi kumenya Imana, Imana yahimbawe gukirisha abayizera ubupfu bg’ivyigishwa.

²²Kukw Abayuda basaba ibimenyetso, Abagiriki barondera ubgenge,

²³ariko tweho tubabarira ivya Kristo yabambge: uyo ku Bayuda n’ikigwisha, ku banyamahanga n’ubupfu:

²⁴ariko ku bahamagarwa, b’Abayuda n’Abagiriki, ni Kristo, ubushobozi bg’Imana, kandi n’ubgenge bg’Imana.

²⁵Kuk’ ubupfu bg’Imana burusha abantu ubgenge; kandi n’intege nke z’Imana zirusha abantu inkomezi.

²⁶Muzirikane ihamagarwa ryanyu, bene Data, yukw ab’ ubgenge bg’abantu bāhamagawe atari benshi, abakomeye bāhamagawe atari benshi, abapfasoni bāhamagawe atari benshi.

²⁷Arikw Imana yatoranije ibipfu vyo mw isi, ngw imāramāze abanyabgenge: kandi yatoranije ibinyantege nke vyo mw isi ngw imāramāze ibikomeye,

²⁸kandi n’ivyoroshe vyo mw isi, n’ibikēngērwa, mbere n’ibitariho, Imana yarabitoranije ngw itītūre ibiriho:

²⁹kugira ngo ntihagire umuntu yirata imbere y’Imana.

³⁰Ni yo ibaha kuba muri Kristo Yesu, yaduhindukiye ubgenge buva ku Mana, n’ukugororoka n’ukwezwa n’ugucungurwa:

³¹kugira ngo bibe nk’uko handitswe, ng’ Uwirata, yirate Uhoraho.