Read Bibliya Yera 1951 1 Ab’i Korinto 10 Bible Online

1 Ab’i Korinto 10 - Bibliya Yera 1951 bible

1 Ab’i Korinto 10

¹Bene Data, singomba ko mutamenya yuko ba sogokuruza bose bāri musi ya ca gicu, kandi yuko bose bāciye hagati ya ca kiyaga cigabanije,

²bose bakabatirizwa kuba aba Mose mur’ ico gicu no mur’ ico kiyaga,

³bose bagasangira vya vyo kurya vy’impwemu,

⁴bose bagasangira vya vyo kunywa vy’ impwemu. Kuko bānywa ku gitandara c’impwemu cabakurikira, ico gitandara cāri Kristo.

⁵Arikw abenshi muri bo, Imana ntiyabashimye, kuko bahonerejwe mu bugaragwa.

⁶Arikw ivyo vyatubereye akarorero kugira ngo ntitwifuze ibibi, nk’uko ba bandi bāvyifuje.

⁷Kandi ntimugasenge ibishushanyo vy’ibigirwamana, nk’uko bamwe bo muri ba bandi bābisenga: nk’uko handitswe, ngw Abantu bicaritswe no kurya no kunywa, bava hasi baravyina.

⁸Kandi ntitugashakane, nk’uko bamwe bo muri ba bandi bāshakanye, maze hagapfamw’ abantu ibihumbi mirongwibiri na bitatu ku musi umwe.

⁹Kandi ntitukagerageze Umwami wacu, nk’uko bamwe bo muri ba bandi bāmugerageje, bakamarwa n’inzoka.

¹⁰Kandi ntimukidodombe, nk’uko bamwe bo muri ba bandi bidodomvye, bakamarwa n’umuranduzi.

¹¹Arikw ivyo vyababayeko kugira ngo bitubere akarorero, kandi vyandikiwe kuduhanūra twebge, abashikwako n’amaherezo y’ibihe.

¹²Nuko rer’ uwiyumvira kw ahagaze ni yiyubare ntagwe.

¹³Nta cabagerageje kitar’ ic’ umuntu yoshobora kwihanganira: arikw Imana n’iyo kwizigirwa ntizobakundira ko mugeragezwa n’ibiruta ivyo mushobora, ariko hamwe n’ikibagerageza izobacira icanzo, kugira ngo mubone ingene mushobora kucihanganira.

¹⁴Nuko, abo nkunda, ni muhunge gusenga ibigirwamana.

¹⁵Ndababgira nk’abanyabgenge; mwiyumvire ivyo mvuga, yukw ari ko biri.

¹⁶Igikombe c’umuhezagiro, ico duhezagira, mbega si kwo gusangira amaraso ya Kristo? Umutsima tumanyagura, si kwo gusangira umubiri wa Kristo?

¹⁷Nk’uk’ uwo mutsima ar’ umwe, twebge, naho turi benshi, tur’ umubiri umwe: kuko twese dusangira umutsima umwe.

¹⁸Murābe Abisirayeli ku rukoba: abarya ikimazi, mbega ntibasangira n’igicaniro?

¹⁹Nukw ico mvuga n’igiki? Mbega mvuga yukw icaterekerejwe ikigirwamana ar’ ikintu, canke yukw ikigirwamana ar’ ikintu?

²⁰Ariko mvuga yukw ibimazi abanyamahanga batanga, babiha abadayimoni, babiterekereza abadayimoni, ntibabiha Imana: nanje singomba yuko musangira n’abadayimoni.

²¹Ntimushobora kunywera ku gikombe c’Umwami wacu, no ku gikombe c’abadayimoni: ntimushobora gusangira ivyo ku meza y’Umwami wacu n’ivyo ku meza y’abadayimoni.

²²Cank’ Umwami tumutere ishari? Mbega tumurusha inkomezi?

²³Vyose turavyemererwa, arikw ibitugirira ikimazi si vyose. Vyose turavyemererwa, arikw ivyubaka si vyose.

²⁴Ntihagire umuntu ababara ivyiwe, arikw ababare ivya mugenzi we.

²⁵Izo zigurwa mw ibāgiro, mube muzirya ata co mubajije kubg’ ijwi ryo mu mutima:

²⁶kukw isi ar’iy’ Uhoraho, n’ibiyuzuye.

²⁷Umuntu wo mu batizera ni yabahamagara, mukagomba kugenda, ico bazoshira imbere yanyu cose, mube mukirya, ata co mubajije, kubg’ ijwi ryo mu mutima.

²⁸Ariko ni hagira umuntu ababgira, at’ Ico n’icāterekerejwe: ntimukakirye, kubg’ uyo abiseruye, no kubg’ ijwi ryo mu mutima.

²⁹Arik’ umutima mvuze s’uwawe, n’uwa wa wundi. N’iki gituma ukwidegemvya kwanje guhinyurwa n’umutima w’uwundi?

³⁰Ko ndya mbishimiye, n’iki gituma ntukirwa ivyo nshimiye?

³¹Nukw iyo murya, canke munywa, canke mukora ikindi kintu cose, mube mukorera vyose gushimisha Imana.

³²Ntimubere Abayuda igitsitaza, cank’ Abagiriki, cank’ ishengero ry’Imana:

³³nk’uko nanje nnezereza bose muri vyose, ntarondera ikigira ico kimmarira ubganje, ariko nkarondera ikigira ico kimarira abenshi, kugira ngo bakire.