Read Bibliya Yera 1951 1 Ab’i Korinto 12 Bible Online

1 Ab’i Korinto 12 - Bibliya Yera 1951 bible

1 Ab’i Korinto 12

¹Bene Data, ivy’ ingabire za Mpwemu, singomba ko mutabimenya.

²Murazi yuko mukir’ injabuka mwakwegwa, mukaja ku bigirwamana bitazi kuvuga, nk’uko mwabikwegeweko.

³Ni co gituma mbamenyesha yukw ata muntu avugishwa na Mpwemu w’Imana, avuga ati Yesu n’ikivume: kand’ ata muntu ashobora kuvuga, ati Yesu n’Uhoraho, atabivugishijwe na Mpwemu Yera.

⁴Yamara harih’ ingabire z’uburyo bginshi, ariko Mpwemu n’umwe.

⁵Kandi har’ amabango menshi, arik’ Umwami n’umwe.

⁶Kandi harih’ uburyo bginshi bgo gukora, arikw Imana n’imwe, ikorera vyose muri bose.

⁷Yamara, umuntu wese ahabga ikimwerekanako Mpwemu, kugira ngo bigire ikimazi.

⁸Kuk’ umwe aheshwa na Mpwemu ijambo ry’ubgenge, uwundi agaheshwa n’uwo Mpwemu ijambo ryo kumenya,

⁹uwundi agaheshwa n’uwo Mpwemu ukwizera, uwundi agaheshwa n’uwo Mpwemu umwe ingabire zo gukiza indwara,

¹⁰uwundi agahābga gukora ibitangaza, uwundi agahabga kuvugishwa n’Imana, uwundi agahabga kurobanura impwemu, uwundi agahabga kuvuga indimi nyinshi, uwundi agahabga gusobanura indimi:

¹¹arikw ivyo vyose uwo Mpwemu umwe ni we abikorera muri bo, agabira umuntu wese ukw agomba.

¹²Nk’uk’ umubiri ar’ umwe, ukagira ingingo nyinshi, kand’ ingingo z’umubiri zose nah’ ari nyinshi ar’ umubiri umwe, ni ko na Kristo ari.

¹³Kuko muri Mpwemu umwe, twese ari ho twabatijwe ngo tube umubiri umwe, naho boba Abayuda cank’ Abagiriki, naho boba abagurano cank’ abidegemvya. Kandi twese twanyweshejwe Mpwemu umwe.

¹⁴Umubiri s’urugingo rumwe, ariko ni nyinshi.

¹⁵Ikirenge covuga, kiti Ko ntar’ ikiganza sind’ uwo ku mubiri; ivyo ntivyotuma kitaba ico ku mubiri.

¹⁶Kand’ ugutwi kwovuga, kuti Ko ntar’ ijisho, sind’ uwo ku mubiri; ivyo ntivyotuma kutaba ukwo ku mubiri.

¹⁷Iy’ umubiri wose uba ijisho, kwumva kwobaye hehe? Iyo wose uba kwumva, kumoterwa kwobaye hehe?

¹⁸Ariko noneh’ Imana yashizeh’ ingingo z’umubiri, urugingo rwose aho yagomvye.

¹⁹Kand’ iyo zose ziba urugingo rumwe, umubiri wobaye hehe?

²⁰Ariko noneho, ingingo ni nyinshi, umubiri ukaba umwe.

²¹Ijisho ntiryoshobora kubarira ikiganza, ngo Nta co ummariye; cank’ umutwe kubarira ibirenge, ngo Nta co mummariye.

²²Ariko bir’ ukundi rwose: ingingo z’umubiri ziyumvirwa kw ar’ iz’ intege nke inyuma y’izindi, ni zo zitōhara;

²³kand’ izo ku mubiri twiyumvira ko zidafise icubahiro, ni zo zirushiriza kuronka icubahiro: kand’ ingingo zacu ziteye isoni ni zo zirushiriza gusharizwa.

²⁴Yamar’ izidateye isoni ntizirinda kwambikwa: arikw Imana yafatanije umubiri hamwe, urugingo rukennye icubahiro iruha icubahiro kirushiriza,

²⁵kugira ng’umubiri ntiwireme ibice, arikw ingingo zibabarane kumwe.

²⁶Kand’ urugingo rumwe iyo rubabaye, ingingo zose zirababazanywa na rwo: cank’ iy’ urugingo rumwe ruhawe icubahiro, ingingo zose zihimbaranwa na rwo.

²⁷Namwe mur’ umubiri wa Kristo, kand’ umuntu wese wo muri mwebge n’urugingo rwawo.

²⁸Kand’ Imana yabanje gushira mw ishengero bamwe kuba intumwa, maz’ aba kabiri ibashiraho kuba abavugishwa na yo, maz’ aba gatatu, ibashiraho kuba abigisha, maz’ ishirah’ abakora ibitangaza, maz’ ishirah’ abāhawe ingabire zo gukiza indwara, n’abāhawe gufasha abandi, n’abāhawe kurōngōra, n’abāhawe kuvuga indimi nyinshi.

²⁹Mbega bose n’intumwa? Bose n’abavugishwa n’Imana? Bose n’abigisha? Bose bakora ibitangaza?

³⁰Bose bafise ingabire zo gukiza indwara? Bose bavuga izindi ndimi? Bose basobanura indimi?

³¹Ariko mwifuze cane ingabire ziruta izindi. Kandi ndabereka inzira irushiriza kuba nziza.