Read Bibliya Yera 1951 2 Ab’i Korinto 9 Bible Online

2 Ab’i Korinto 9 - Bibliya Yera 1951 bible

2 Ab’i Korinto 9

¹Ivy’ ukugaburira abera sindinda kubibandikira.

²Kuko nzi umutima ukunze wanyu, ni wo nirata mu Banyamakedoniya yuko muwufise, mvuga yukw Abanyakaya bāri basanzwe biteguye, uhereye mu mwaka ushize, kandi gushishikara kwanyu kwateye abenshi umwete.

³Kandi ndungitse abo bene Data kugira ng’ ukwirata mwebge kwacu ntikuze gupfe ubusa mur’ ivyo; kugira ngo muze mube mwiteguye nk’uko nababgiye,

⁴twebge (sinovuga mwebge) ntituze tumāramāzwe n’ivyo twari twizigiye, namb’ Abanyamakedoniya bamwe bazozanana nanje bagasanga mutiteguye.

⁵Ni co gitumye niyumviriye yuko nkwiye kwinginga abo bene Data kunyitangira imbere mu kuza i wanyu, ngo babanze gutunganya ivy’ ubuntu mwasezeranye kera, bibe vyiteguwe nk’ivy’ ubuntu, ata kinubge.

⁶Arikw ico mvuga ngiki, ng’ Ūbiba nke, azokwimbura bike, ūbiba nyinshi azokwimbura vyinshi.

⁷Umuntu wese atange nk’ukw abigabiye mu mutima wiwe, atababaye cank’ atagōberewe, kukw Imana ikunda ūtanga anezerewe.

⁸Kand’ Imana ishobora kubasāzako ubuntu bgose, kugira ngo murushirize gukora ivyiza vyose, mufise ibibahāgije muri vyose.

⁹Nk’uko handitswe, ngo Yatanze isābagire, yahaye abakene, Ukugororoka kwiwe kwamah’ ibihe bidashira.

¹⁰Kand’ Īha umubivyi imbuto n’imitsima yo kurya, ni yo izobaha, ibongeranirize imbuto zanyu zo kubiba, kand’ izogwiza imbuto z’ukugororoka kwanyu.

¹¹Namwe muzotungishwa muri vyose, ngo mugire ubuntu bgose, butuma dushimisha Imana.

¹²Kukw igikorwa c’ukwo kugabura kitamara ubgoro bg’abera gusa, ariko kandi kirushiriza gushimisha Imana muri benshi.

¹³Kuk’ uburyo mwageragejwe n’ukwo kugabura bgatumye abo bahimbaza Imana yuko muyumvira, mwātura ubutumwa bgiza bga Kristo, kandi yuko mwagize ubuntu bginshi bgo kubafasha no gufasha abandi bose.

¹⁴Kandi mu kubasengera babagirira inkumbu, kuk’ ubuntu bg’ Imana burushiriza kuba muri mwebge.

¹⁵Imana ishimirwe ingabire yayo nziza itovugwa.