Read Bibliya Yera 1951 Ab’i Kolosayi 1 Bible Online

Ab’i Kolosayi 1 - Bibliya Yera 1951 bible

Ab’i Kolosayi 1

¹Paulo, nagizwe intumwa ya Kristo Yesu n’ukw Imana yabigomvye, na Timoteyo mwene Data,

²turabandikiye bene Data bo muri Kristo bera b’abizigirwa, mur’ i Kolosayi. Ubuntu n’amahoro bibe muri mwebge biva ku Mana Data wa twese.

³Dushima Imana Se w’Umwami wacu Yesu Kristo, twama tubasengera ubudasība,

⁴kuko twumvise ukwizera Kristo Yesu kwanyu, n’urukundo mufitiye abera bose,

⁵kubg’ ivyizigirwa mwabīkiwe mw ijuru, ivyo mwumvise kera, mw ijambo ry’ukuri kw’ ubutumwa bgiza,

⁶bgābashitseko, nk’uko buri mw isi yose bgama imbuto bugwira: kandi no muri mwebge bugenza burtyo, uhereye wa musi mwumviye mukamenya ubuntu bg’Imana vy’ukuri:

⁷nk’uko mwigishijwe na Epafura uwo dukunda, umugurano mugenzi wacu, ni we mukozi wa Kristo wo kwizigirwa abagaburira ivya Kristo mu gishingo cacu,

⁸kandi ni we yatumenyesheje urukundo rwanyu muhabga na Mpwemu.

⁹Ni co gituma natwe, uhereye igihe twavyumviye, tudahengeshanya kubasengera, no kubasabira ngo mwuzuzwe ukumenya ivy’ igomba n’ubgenge bgose no kumenya ivy’ impwemu,

¹⁰kugira ngo mugende nk’uko bibereye ab’ Umwami wacu, mumunezereza muri vyose, mwama imbuto mu bikorwa vyiza vyose, mugwizwa no kumenya Imana,

¹¹mushobozwa n’ubushobozi bgose, nk’ukw inkomezi z’ubgiza bgayo ziri, ngo mwihangane rwose, ntimurambirwe, mubigiranye umunezero.

¹²Mushime Data wa twese yabashoboje kuraganwa n’abera umwandu wo mu muco;

¹³yadukijije ububasha bg’umwiza, atwimurira mu bgami bg’Umwana wiwe akunda.

¹⁴Mur’ uwo ni ho dufise ugucungurwa, ni kwo guharirwa ivyaha vyacu.

¹⁵Ni we shusho y’Imana itaboneka, ni we mfura mu vyaremwe vyose:

¹⁶kuko muri we ari ho vyose vyaremewe, ivyo mw ijuru n’ivyo mw isi, ibiboneka n’ibitaboneka, ur’ intebe z’icubahiro, ur’ ubgami, ur’ ubukuru, ur’ ububasha: vyose vyaremwe na we, biremerwa kuba ivyiwe.

¹⁷We yabayeho vyose bitarabaho, kandi muri we vyose ni ho bifataniye.

¹⁸Ni we mutwe w’umubiri, ni wo shengero: kandi ni we tanguriro, ni we mfura mu kuva mu bapfuye, kugira ngw abe agaheta muri vyose.

¹⁹Kukw Imana yahimbawe n’uk’ ukunengesera kwayo kwose kuba muri we:

²⁰kandi yahimbawe no kumuha kwuzuza vyose na yo, ar’ ivyo mw isi, ar’ ivyo mw ijuru, izanishije impore amaraso yo ku musaraba wiwe.

²¹Namwe abāri bāratandukanijwe n’Imana kera, mugahindurwa abansi bayo mu mitima yanyu n’ivyo mwakoze bibi,

²²none yabuzurije na yo mu mubiri wiwe w’umuntu kubg’ urupfu yapfuye, ngw abashikane imbere yayo mur’ abera, mudafise agasembga, mutagira ico mwogawa;

²³asangwa muhora mwizeye, mushinzwe neza mutanyiganyiga, mudatirimuka mu vyizigiro biheshwa n’ubutumwa mwumvise, bgavuzwe mu bāremwe bose bo musi y’ijuru, ubgo jewe Paulo nacikiye umukozi wabgo.

²⁴None nnezererewe amagorwa yanje yo kubganyu, kand’ ivyasigaye ku marushwa ya Kristo nanje ndabishitsa mu mubiri wanje, kubg’ umubiri wiwe, ni wo shengero,

²⁵iryo nacikiye umukozi, nk’uko nahawe n’Imana ububgiriza bgo kugaburira mwebge, kugira ngo nkwize ijambo ry’Imana rishitse,

²⁶ni ryo banga ryari ryarahishijwe uhereye kera hose n’ibihe vyose, ariko noneho ryahishuriwe abera bayo,

²⁷abo Imana yakunze kumenyesha itunga ry’ubgiza bg’iri banga, rivugwa mu banyamahanga, ni ryo Kristo ari muri mwebge, ivyizigiro vyo kuzoronka ubgiza.

²⁸Natwe ni we twamamaza, duhanūra umuntu wese, twigishisha umuntu wese ubgenge bgose, ngo dushikirize Imana umuntu wese ahīngūriwe muri Kristo:

²⁹ico ni co kintamisha, mbirwanira nk’uk’ ubushobozi bgiwe buri, bunkoreramwo bishimitse.