Read Bibliya Yera 1951 Ab’i Kolosayi 4 Bible Online

Ab’i Kolosayi 4 - Bibliya Yera 1951 bible

Ab’i Kolosayi 4

¹Ba shebuja, namwe ni mugirire abagurano banyu ibigororotse n’ibibereye, kuko muzi yuko namwe mufise Shobuja mw ijuru.

²Mukovye mu gusenga, mukubemwo maso, mushima;

³kandi natwe nyene mudusengere, kugira ngw Imana itwugururire urugi rwo kuvuga ijambo ryayo, tuvuge ibanga rya Kristo, iryo mbohewe,

⁴kugira ngo ndariserure nk’uko nkwiye kuvuga.

⁵Mugendane ubgenge ku bo hanze, mugura uburyo mubugwiza.

⁶Imvugo zanyu zamane ubuntu bg’Imana, zirunzwe umunyu, kugira ngo mumenye ingene mukwiye kwishura umuntu wese.

⁷Tukiko mwene Data dukunda, umukozi w’umwizigirwa, umugenzi dukorana mu Mwami wacu, azobīgānira ivyanje vyose.

⁸Ni we mbatumyeko kubg’ ivyo nyene, ngo mumenye ivyacu, kandi ngw aremeshe imitima yanyu,

⁹ndamutumanye na Onesimo mwene Data w’umwizigirwa, uwo dukunda, yavuye i wanyu; bazobīgānira ivy’ ino vyose.

¹⁰Arisitariko, uwo dusangiye umunyororo, arabatasha; na Mariko, mwene se wabo wa Barunaba, arabatasha, umwe mwabgirizwa ivyiwe: ni yaramuka aje i wanyu muze mumwākīre.

¹¹Na Yesu, ari we Yusito, arabatasha: abo bonyene bo mu bākebge ni bo bakorana nanje kubg’ ubgami bg’Imana, kandi bāmmaze umubabaro.

¹²Epafura w’i wanyu, umugurano wa Kristo Yesu, arabatasha, yama abarwanira mu gusenga kwiwe kugira ngo mushikame, mutunganye rwose, mumenya neza mudakekeranya ivy’ Imana igomba vyose.

¹³Ndamushingira intahe yukw abagirira umwete mwinshi, mwebge n’ab’i Lawodikiya n’ab’i Hiyerapoli.

¹⁴Luka, umuganga akundwa, na Dema, barabatasha.

¹⁵Muntahirize bene Data b’i Lawodikiya, na Numfa, n’ishengero ryo mu nzu yiwe.

¹⁶Kand’ iki cete ni mwaheza kugisomerwa, muze mwitwaririke ko gisomerwa ishengero ry’i Lawodikiya; kandi namwe muze musome ikizova i Lawodikiya nyene.

¹⁷Kandi muze mubarire Arukipo, mut’ Urābe igikorwa c’ubusuku wahawe mu Mwami wacu, ucuzuze.

¹⁸Uku ni kwo gutasha kwanje Paulo, kwanditswe n’ukwanje kuboko. Mwibuke iminyororo yanje. Ubuntu bubane namwe.