Read Bibliya Yera 1951 Yosuwa 1 Bible Online

Yosuwa 1 - Bibliya Yera 1951 bible

Yosuwa 1

¹Mose umusavyi w’Uhoraho amaze gupfa, Uhoraho abarira Yosuwa mwene Nuni umufasha wa Mose,

²ati Mose umusavyi wanje yāpfuye; none rero va hasi, ujabukane aba bantu bose urwo ruzi Yorodani, muje mu gihugu mbahaye, mwebge Abisirayeli.

³Ahantu hose muzokandagiza ibirenge ndahabahaye, nk’uko nabariye Mose.

⁴Uhereye mu bugaragwa no kur’ uriya musozi Lebanoni, ugashitsa ku ruzi runini, ari rwo Efurate, ugahitana igihugu cose c’Abaheti, ukageza ku kiyaga kinini gihera i burengerazuba, ni rwo ruzoba urugabano rwanyu.

⁵Nta muntu n’umwe azoshobora kuguhagarara imbere imisi yose uzomara ukiriho: nk’uko nabanye na Mose ni ko nzobana nawe; sinzoguhemukira, sinzoguta.

⁶Shikama, ushire amanga, kukw ari wewe uzoshikiriza abo bantu igihugu narahiye ba sekuruza ko nzokibaha.

⁷Mugabo shikama, ushire amanga cane, kugira ngo witondere ivy’ ivyagezwe vyose bivuga, ubishitse, ivyo Mose umusavyi wanje yakugeze; ntuz’ utambamire i buryo cank’ i bumoso, kugira ng’ ugire ukuboko kwiza ah’ uja hose.

⁸Ibiri mur’ ico gitabo c’ivyagezwe ntuz’ ubikūre mu kanwa kawe; arik’ uze wame ubirīmbūra ku murango no mw ijoro, kugira ng’ubone kwitondera ivyanditswemwo vyose; ni ho ivyawe bizogenda neza, ukagira amahirwe.

⁹None si jewe nkwibaririye, nti Shikama, ushire amanga? Nuko ntutinye, nturanduke umutima, kuko jewe Uhoraho Imana yawe ndi kumwe nawe ah’ uzoja hose.

¹⁰Maze Yosuwa abarira abagaba abantu,

¹¹ati Ni mugende munyuranganye aho mushagaje, mubarire abantu, muti Ni murondere impamba, kuko mu misi itatu muzojabuka rurya ruzi Yorodani, kugira ngo mwinjire ico gihugu Uhoraho Imana yanyu yabahaye ngo mucegukire.

¹²Kandi Yosuwa abarira Abareyubeni n’Abagadi n’igice c’umuryango wa Manase,

¹³ati Ni mwibuke rya jambo Mose umusavyi w’Uhoraho yababariye, at’ Uhoraho Imana yanyu arabaruhuye, abahaye iki gihugu.

¹⁴Nukw abagore banyu n’abana banyu n’amasho yanyu bize bisigare mur’ iki gihugu Mose yabahaye co hakuno ya’Yorodani; ariko mwebge mwese abahizi, muze mujabuke imbere ya bagenzi banyu, mwitwaje ibirwanishwa, kugira ngo mubatabare,

¹⁵gushitsa ah’ Uhoraho azoruhurira bagenzi banyu nk’uko namwe yabaruhuye, na bo bakegukira igihugu Uhoraho Imana yanyu yabahaye; hanyuma mubone kugaruka mur’ iki gihugu mwegukiye, mukigerēre, ico Mose umusavyi w’Uhoraho yabahaye gihera i burasirazuba, hakuno ya Yorodani.

¹⁶Na bo bishura Yosuwa, bat’ Ivy’ utubariye vyose tuzobikora, kand’ ah’ uzodutuma hose tuzojayo.

¹⁷Nk’uko twahora twumvira Mose muri vyose, ni ko nawe tuzokwumvira; mugabo rero, Uhoraho Imana yawe az’ abane nawe nk’uko yabana na Mose.

¹⁸Umuntu wese azogarariza, akanka icagezwe cawe, ntiyumvire ic’ umubariye cose, azokwicwa. Mugabo, shikama, ushire amanga.