Read Bibliya Yera 1951 Yosuwa 11 Bible Online

Yosuwa 11 - Bibliya Yera 1951 bible

Yosuwa 11

¹Yabina umwami w’i Hasori avyumvise, atuma kuri Yobabu umwami w’i Madoni, no ku mwami w’i Shimuroni, no ku mwami w’i Akishafi,

²atuma no ku bami bo mu mugamba w’i burārūko, n’abo mu kiyaya Araba giherereye i Kinereti i bumanuko bgaho, n’abo mu gihugu c’imisozi iciye bugufi, n’abo mu misozi ihagaze y’i Dori ahahera i burengerazuba;

³atuma no ku Banyakanani b’i burasirazuba n’ab’i burengerazuba, no ku Bamori no ku Baheti no ku Baferizi no ku Bayebusi bo mu mugamba, no ku Bahiwi bo musi ya Herumoni mu gihugu c’i Misipa.

⁴Nuko bazanana n’ingabo zabo zose; bāri benshi nk’umusenyi wo kw isēsero ry’ikiyaga, bo n’amafarasi n’imikogote vy’isinzi.

⁵Abo bami bose bakoranira hamwe, baraza basagaza ku mazi y’i Meromu, ngo batere Abisirayeli.

⁶Maz’ Uhoraho abarira Yosuwa, ati Ntubatinye; kukw ejo nk’aya mango bose nzobagabura bagwe imbere y’Abisirayeli; amafarasi yabo uz’ uyacagagure ibitsi, n’imikogote yabo uz’ uyiturire.

⁷Nuko Yosuwa azanana n’ingabo ziwe zose, abaterera ku mazi y’i Meromu, abahungiye ata co bīnona.

⁸Uhoraho abagabura mu maboko y’Abisirayeli, barabanesha, barabakinagiza, babashitsa ku gisagara kinini Sidoni n’i Misirefoti‐mayimu no mu kiyaya c’i Misipe ahahera i burasirazuba; barabica ntibasiga n’uwa kirazira.

⁹Yosuwa abagirira nk’uk’ Uhoraho yamubariye; amafarasi yabo ayacagagura ibitsi, n’imikogote yabo arayiturira.

¹⁰Maz’ ico gihe Yosuwa arakebanuka, atsinda i Hasori, yicisha umwami waho inkota; kand’ i Hasori ubga mbere ni co cār’ igisagara gikuru mu bihugu vy’abo bami bose.

¹¹Batōngōza inkota abari muri co bose, barabageseza; ntihasigara n’umwe agihumeka, kandi n’i Hasori bahatōngōza umuriro.

¹²Yosuwa atsinda ibisagara vyose vy’abo bami, abo bami bose abicisha inkota, arabageseza, nk’uko Mose umusavyi w’Uhoraho yageze.

¹³Arikw ibisagara vyubatswe ku dusozi tunungaraye, Abisirayeli nta na kimwe bāturiye, atar’ i Hasori honyene: aho ho Yosuwa yarahaturiye.

¹⁴Iminyago yose y’ivyo bisagara, n’inka zose, Abisirayeli bavyijanira kw iminyago; arikw icitwa umuntu wese bamwicisha inkota, gushitsa babaranduye rwose: ntibasigaza n’umwe agihumeka.

¹⁵Nk’ uk’ Uhoraho yageze Mose umusavyi wiwe, ni ko Mose yageze Yosuwa, Yosuwa na we abigenza kuno: nta kintu na kimwe atākoze, mu vy’Uhoraho yageze Mose vyose.

¹⁶Uko ni ko Yosuwa yanesheje ico gihugu cose: umugamba waho, n’i Negebu hose, n’igihugu cose c’i Gosheni, n’ic’ imisozi iciye bugufi, n’ikiyaya Araba, n’umugamba witwa uwa Isirayeli, n’igihugu c’imisozi iciye bugufi kiwegamiye,

¹⁷uhereye ku musozi Halaki, uk’ udūga utumbereye i Seyiri, gushitsa i Bayali‐gadi ku mwonga w’i Lebanoni uri musi y’umusozi Herumoni; anesha n’abami baho bose, arabafata, arabica.

¹⁸Mbere Yosuwa yamaze igihe kirekire arwana n’abo bami bose.

¹⁹Nta gisagara na kimwe cigeze kwisaba Abisirayeli, atar’ Abahiwi bāba i Gibeyoni: ibindi bisagara vyose babinesheje birwanye.

²⁰Kukw ivyo vyari bivuye k’Uhoraho, yakomantaje imitima yabo, bakaza kurwana n’Abisirayeli, kugira ngw Abisirayeli babarandure rwose ata kagongwe, babageseze, nk’uk’ Uhoraho yari yarabariye Mose.

²¹Ico gihe Yosuwa aragenda, ageseza Abanaki bo mu gihugu c’ umugamba, uhereye i Heburoni n’i Debira n’i Anabu, umugamba wose watwaye Abayuda, n’umugamba wose watwaye Abisirayeli; Yosuwa arabarandura rwose, bo n’ibisagara vyabo.

²²Ntihagira n’umwe wo mu Banaki asigara mu gihugu c’Abisirayeli, atari bamwe‐bamwe basigaye i Gaza n’i Gati n’i Ashidodi.

²³Uko ni ko Yosuwa yanesheje ico gihugu cose, nk’uk’ Uhoraho yari yarabariye Mose. Maze Yosuwa akigabanganya Abisirayeli ngo kibe ishamvu yabo, nk’ukw imiryango yabo iri. Nukw igihugu gihabga impore.