Read Bibliya Yera 1951 Yosuwa 13 Bible Online

Yosuwa 13 - Bibliya Yera 1951 bible

Yosuwa 13

¹Kandi Yosuwa yar’ ashaje, ageze mu zabukuru; nuk’ Uhoraho aramubarira, at’ Eh’ urashaje, ugeze mu zabukuru; ariko haracasigaye ibihugu vyinshi mutaregukira.

²Ibi ni vyo bihugu bisigaye: igihugu cose c’Abafilisitiya, n’ic’ Abageshuri cose,

³uhēreye ku ruzi Shihori rurābana na Egiputa, gushitsa ku rubibe rw’i Ekuroni ahahera i burārūko, ahavugwa kw ar’ ah’ Abanyakanani: kand’ abaganwa batanu b’Abafilisitiya n’aba: uw’i Gaza, n’uw’i Ashidodi, n’uw’i Ashikeloni, n’uw’i Gati, n’uw’i Ekuroni; bo n’igihugu c’Abavimu,

⁴ahahera i bumanuko; bo n’igihugu cose c’ Abanyakanani, n’i Meyara h’Abasidoni, ugashitsa kuri Afeka ku rubibe rw’Abamori;

⁵bo n’igihugu c’Abagebali, n’i Lebanoni hose aherekeye i burasirazuba, uhereye i Bayali‐gadi musi y’umusozi Herumoni, ugashitsa ahafata i Hamati;

⁶ababa mu mugamba bose, uhereye i Lebanoni ugashitsa i Misirefoti‐mayimu, ni bo Basidoni bose; at’ Abo nzotuma biruka imbere y’Abisirayeli; ariko wewe, pfa kuhagabanganya Abisirayeli, nk’uko nakugeze.

⁷None rer’ ivyo bihugu ubigabanganye imiryango cenda, bo na ca gihimba c’Abamanase.

⁸Ikindi gihimba c’Abamanase, bo n’Abareyubeni n’Abagadi, bāri bamaze guhabga ishamvu yabo hakurya ya Yorodani ahahera i burasirazuba, nk’uko Mose umusavyi w’Uhoraho yabahaye;

⁹uhereye kuri Aroweri ho ku mucāmo hejuru y’umwonga wo kuri Arunoni, no ku gisagara kiri hagati mur’ uwo mwonga nyene, n’ikiyaya cose c’i Medeba, ugashitsa i Diboni;

¹⁰n’ibisagara vyose vya Sihoni umwami w’Abamori yatwara i Heshiboni, no kugeza ku rubibe rw’Abamoni,

¹¹n’i Gileyadi, n’ igihugu c’Abageshuri n’ic’ Abanyamayaka, n’umusozi wose w’i Herumoni, n’i Bashani hose gushitsa i Saleka;

¹²n’igihugu cose ca Ogi umwami w’i Bashani, yaganziriza ahitwa Ashitaroti n’ahitwa Edireyi; uwo ni we yar’ agasigarira k’Abarefa; abo ni bo Mose yanesheje, arabasohora.

¹³Yamar’ Abisirayeli bo ntibirukanye Abageshuri cank’ Abanyamayaka; arikw Abageshuri n’Abanyamayaka baciye babana n’Abisirayeli kugeza na bugingo n’ubu.

¹⁴Arik’ umuryango w’Abalewi wo nta shamvu Mose yabahaye; ibimazi vyashikaniwe Uhoraho Imana y’ Abisirayeli bigatōngōrwa n’umuriro, ni vyo vyar’ ishamvu yabo, nk’uk’ Uhoraho yamubariye.

¹⁵Mose ni we yahaye umuryango w’Abareyubeni ishamvu, nk’ ukw amazu yabo ari.

¹⁶Igihugu cabo cāhēra kuri Aroweri ho ku mucāmo hejuru y’umwonga wo kuri Arunoni, no ku gisagara kiri hagati mur’ uwo mwonga nyene, n’ikiyaya cose c’i Medeba,

¹⁷n’i Heshiboni n’ibisagara vyose vyo mu kiyaya bihakūkira, n’i Diboni n’i Bamoti‐bayali, n’i Beti‐bayali‐meyoni,

¹⁸n’i Yahasi n’i Kedemoti n’i Mefayati,

¹⁹n’i Kiriyatayimu n’i Sibuma, n’i Sereti-shahari hubatswe ku musozi wo mu kiyaya,

²⁰n’i Beti‐peyori, n’ agahanamo ka Pisiga, n’i Beti‐yeshimoti,

²¹n’ibisagara vyose vyo mu kiyaya, n’igihugu cose car’ ica Sihoni umwami w’Abamori yaganziriza i Heshiboni, uwo Mose yanesheje hamwe n’abaganwa b’i Midiyani, ni bo aba: Ewi na Rekemu na Tsuri na Huri na Reba, ni bo baganwa bākūkira Sihoni bāba mur’ ico gihugu.

²²Kandi na Balamu mwene Beyori w’umumenyi, Abisirayeli bāmwicishije inkota hamwe n’abandi bishe.

²³Igihugu c’Abareyubeni cāgarukira kuri Yorodani: ni rwo rwar’ urubibe rwabo. Iyo ni yo shamvu y’Abareyubeni, nk’ukw amazu yabo ari, ukw ibisagara vyaho biri, bo n’imihana yaho.

²⁴Kandi Mose yahaye umuryango w’Abagadi ishamvu, nk’ukw amazu yabo ari.

²⁵Igihugu cabo cāhēra i Yazeri, n’ibisagara vyose vy’i Gileyadi, n’igihimba c’igihugu c’Abamoni gushitsa kuri Aroweri aharābana n’i Raba,

²⁶no guhēra i Heshiboni ugashitsa i Ramati‐Misipa n’i Betonimu, no guhēra i Mahanayimu ugashitsa ku rubibe rw’i Debira;

²⁷bo n’ibisagara vyo mu kiyaya, i Beti‐haramu n’i Beti‐nimura n’i Sukoti n’i Safoni, n’igihimba casigaye c’igihugu ca Sihoni, umwami w’i Heshiboni; Yorodani ni rwo rwar’ urubibe rwabo gushitsa ah’ ikiyaga c’i Kinereti kigarukira, hakurya ya Yorodani ahahera i burasirazuba.

²⁸Iyo ni yo shamvu y’Abagadi, nk’ukw amazu yabo ari, ukw ibisagara vyaho biri, bo n’imihana yaho.

²⁹Kandi Mose yahaye ishamvu igihimba c’umuryango wa Manase: haba umugabane wabo, nk’ukw amazu yabo ari.

³⁰Igihugu cabo cāhēra i Mahanayimu, n’i Bashani hose, igihugu cose ca Ogi umwami w’i Bashani, n’ibisagara vyose vya Yayiri vy’i Bashani nyene, vyose na vyose vyari mirongwitandatu;

³¹n’igihimba c’i Gileyadi, n’ahitwa Ashitaroti n’ahitwa Edireyi, yar’ imirwa ya Ogi umwami w’i Bashani; ivyo ni vyo vyatwaye aba Makiri mwene Manase; ni co ca gihimba c’Abamakiri, nk’ ukw amazu yabo ari.

³²Ayo ni yo mashamvu Mose yagabuye ari mu kiyaya c’i Mowabu, hakurya ya Yorodani, aharābana n’i Yeriko ku ruhande rw’i burasirazuba.

³³Arik’ umuryango wa Lewi wo, Mose nta shamvu yabahaye: Uhoraho Imana y’Abisirayeli ni we shamvu yabo, nk’uko yababariye.