Read Bibliya Yera 1951 Yosuwa 17 Bible Online

Yosuwa 17 - Bibliya Yera 1951 bible

Yosuwa 17

¹Maz’ ubupfindo bgerekana ishamvu y’umuryango wa Manase, ari we mfura ya Yosefu; imfura ya Manase yari Makiri, se wa Gileyadi; Makiri uwo, ni we yahawe i Gileyadi n’i Bashani, kuko yar’ umuhizi.

²Ubupfindo bgerekana n’amashamvu ya bene Manase bandi, nk’ukw amazu yabo ari, ni bo ba Abiyezeri n’aba Heleki n’aba Asiriyeli n’aba Shekemu n’aba Heferi n’aba Shemida; abo ni bo bahungu ba Manase mwene Yosefu, nk’ukw amazu yabo ari.

³Ariko Selofehadi mwene Heferi, Heferi wa Gileyadi, Gileyadi wa Makiri, Makiri wa Manase, ntiyari yaravyaye abahungu, atar’ abakobga gusa; aya ni yo mazina yabo: Makila na Nowa na Hogila na Miluka na Tirusa.

⁴Baza kuri Eleyazari umuherezi na Yosuwa mwene Nuni n’abakuru, bat’ Uhoraho yabariye Mose kw azoduha ishamvu muri basāzācu. Nuko Yosuwa abaha ishamvu muri ba se wabo, nk’uk’ Uhoraho yari yarabigeze.

⁵Nuk’ umuryango wa Manase wahawe imigabane cumi, ukūye igihugu c’i Gileyadi n’i Bashani vyo hakurya ya Yorodani;

⁶kukw abuzukuruza ba Manase b’abakobga bāhānye amashamvu n’abandi bo mu biwe; kand’ igihugu c’i Gileyadi kiba ic’ abandi bo mu ba Manase nyene.

⁷Nuk’ urubibe rw’Abamanase rwāhēra ahitwa Asheri, rugaca i Mikimetati herekeye i Shekemu ku ruhande rw’i burasirazuba; rugaheza rugakevya rugaca i buryo, rugashika mu b’i Eni‐Tapuwa.

⁸Intāra y’i Tapuwa yar’ iy’ Abamanase, arikw igisagara Tapuwa ubgaco, cāri ku rubibe rw’Abamanase, cār’ ic’ Abefurayimu.

⁹Urwo rubibe rugaheza rukamanuka, rugashika ku mugezi witwa Kana, i bumanuko bgawo; ibisagara vyaho vyar’ ivy’ Abefurayimu, naho vyari hagati mu vy’Abamanase; urwo rubibe rw’Abamanase rukajana i burārūko bg’ uwo mugezi, rukaruma ku kiyaga;

¹⁰i bumanuko bgawo hār’ ah’ Abefurayimu, i burārūko bgawo hār’ ah’ Abamanase, bakagarukira ku kiyaga; bāhāna urubibe n’ Abasheri ku ruhande rw’i burārūko, n’Abisakari ku ruhande rw’i burasirazuba.

¹¹Kand’ Abamanase ibisagara bāhāwe mu bg’Abisakari no mu bg’Abasheri ni vy’ ibi: Beti‐sheyani na Ibuleyamu n’ababa i Dori n’ababa i Endori, n’ababa i Tanaki n’ababa i Megido, bo n’udusagara tugenda tuhakūkira; iyo ni yo misozi itatu ihagaze.

¹²Mugabo, Abamanase ntibashoboye kwirukana ben’ ivyo bisagara, kukw Abanyakanani bāgataye kuva mur’ ico gihugu.

¹³Maz’ Abisirayeli bamaze guhama, bashinga Abanyakanani ibikebere, ntibabirukana ngo babaherengeteze.

¹⁴Ab’ umuryango wa Yosefu babaza Yosuwa, bati N’iki catumye uduhesha ubupfindo igisate kimwe gusa kuba ishamvu yacu, kandi tur’ umuryango munini, kuk’ Uhoraho yaduhaye umugisha kugeza ubu?

¹⁵Nuko Yosuwa arabishura, ati Ko mur’ umuryango munini, ni mudūge muje mu kibira, mugiteme mwiyagurire mu gihugu c’Abaferizi n’Abarefa, asangw’ umugamba w’Abefurayimu wābāgiye.

¹⁶Aba Yosefu baravuga, bat’ Ek’ uwo mugamba ntiwodukwira; kand’ Abanyakanani bo mu biyaya, ar’ab’i Beti‐sheyani n’ibisagara bihakūkira, ar’ abo mu kiyaya c’i Yezireli, bose bafise imikogote y’ ivyuma.

¹⁷Yosuwa yishura ab’ umuryango wa Yosefu, ari bo Befurayimu n’Abamanase, ati Mur’ umuryango munini koko, kandi mur’ abahizi: ntimwohabga umugabane umwe gusa.

¹⁸Arikw igihugu c’umugamba kizoba icanyu, kandi nah’ ar’ ikibira muzogitema, kand’ imicāmo yaho izoba iyanyu; kand’ Abanyakanani, naho bafise imikogote y’ivyuma, kand’ ar’ abahizi, muzobirukana.