Read Bibliya Yera 1951 Yosuwa 2 Bible Online

Yosuwa 2 - Bibliya Yera 1951 bible

Yosuwa 2

¹Bakir’ i Shitimu, Yosuwa mwene Nuni atuma abantu babiri mu mpisho, ngo baje gutata; arababarira, ati Ni mugende mwitegereze ico gihugu, cane‐cane i Yeriko. Nuko baragenda, bashika mu nzu ya maraya yitwa Rahabu, bahāka indaro.

²Baja kubarira umwami w’i Yeriko, bat’ Erega kur’ uyu mugoroba haje abantu bo mu Bisirayeli, baje gutata igihugu.

³Uwo mwami atuma kuri Rahabu, ati Zana abo bantu baje i wawe, kuko bazanywe no gutata igihugu cose.

⁴Arik’ uwo mugore ajana abo bantu bompi, arabahisha; araheza abarira izo ntumwa, ati Ni koko haje abantu i wanje, ariko sinamenye iyo bavuye;

⁵nuko hageze mu mūgarira, buhwibiriye, abo bantu baciye bagenda, ariko sinzi aho baroye; enda ni mubakurikire, murabafata.

⁶Ariko yari yabūrije hejuru ku nzu, arabahisha, abarenzakw ibiti vya pishita[1] bitaribgakūbgekw inyuzi, ivyo yari yanikiye aho nyene ku nzu.

⁷Nuko ba bandi baragenda, baja kubakurikira mu nzira ija kuri Yorodani, ku majabukiro yarwo; bamaze kurenga irembo ry’igisagara, baca barugarira.

⁸Nuko batararyama, uwo mugore arūrira, aja ah’ abo bantu bari ku nzu,

⁹arababarira, ati Nzi yuk’ Uhoraho abahaye iki gihugu; kandi mwaduciye ivutu, mber’ abari mu gihugu bose bahiye cōba kubganyu.

¹⁰Kuko twumvise ingen’ Uhoraho yakamije Ikiyaga Gitukura imbere yanyu, igihe mwava muri Egiputa; kandi twumvise n’ivyo mwagiriye abami bompi b’Abamori hakurya ya Yorodani, Sihoni na Ogi, abo mwagesheje rwose.

¹¹Tuvyumvise, imitima yacu yaciye ituvamwo, nta muntu n’umwe yar’ agisigaranye umutima mu nda kubganyu: kuk’ Uhoraho Imana yanyu ari we Mana iri hejuru mw ijuru no hasi kw isi.

¹²Nuko rero ndabinginze, ni mundahire Uhoraho yuko muzogirira neza ab’ inzu ya data, nk’uko nanje ndabagiriye neza; mumpe ikimenyamenya c’ ukuri,

¹³yuko muzorokora data na mama, na basaza banje na barumuna banje n’ababo bose, mukadukiza ntidupfe.

¹⁴Abo bantu baramwishura, bati Ni mutatuvuga, amagara yacu mukijije natwe ntituzobura gukiza ayanyu. Maz’ Uhoraho ni yaduha iki gihugu, tuzokugirira neza, ntituzoguhemukira.

¹⁵Araheza abūrurukisha umugozi abacishije mw idirisha, kukw inzu yiwe yar’ ifatanye n’uruzitiro rw’amabuye ruzitiriye igisagara: ni ho yaba.

¹⁶Arababarira, ati Ni mugende ruguru ku misozi, kugira ngo ntimuhūre n’ababagenza; mwinyegezeyo kumara imisi itatu, gushitsa ah’ ababagenza bazogarukira: muheze muze mubone kugenda.

¹⁷Abo bantu baramwishura, bati Ni watirigana mu vyo tukubgira, iyo ndahiro ntizodufata.

¹⁸Enda ni twashika mur’ iki gihugu, uz’ upfundike aka kagozi gasa n’agahama kur’ iri dirisha uducishijemwo; maze so na nyoko n’abo muvukana n’abo mu rugo kwa so bose uz’ ubakoranirize aha i wawe.

¹⁹Mugabo, ūzotirimuka akava mu nzu yawe agasohoka, amaraso yiwe ni we azosubirako, natwe tweho tuzocuna; arik’ umuntu wese azoba kumwe nawe mu nzu, akagira ic’ aba, amaraso yiwe ni twebge azosubirako.

²⁰Ariko ni watuvuga, iyo ndahiro uturahije ntizodufata.

²¹Arabishura, ati Biraba nk’uko muvuze. Araheza arabasezera, baragenda. Maz’ apfundika ako kagozi gasa n’agahama kw idirisha.

²²Nuko baragenda barengera imisozi, bamaray’ imisi itatu, gushitsa ah’ abagiye kubagenza bagarukiye; ariko bari babarondeye mur’ iyo nzira yose, barabahebūra.

²³Maz’ abo bantu bompi baragaruka, bamanuka iyo misozi, barajabuka bashikīra Yosuwa mwene Nuni, bamudōndera ivyababayeko vyose.

²⁴Baramubarira, bati N’ ukuri koko, Uhoraho agabuye ico gihugu cose mu maboko yacu, mbere bene co bose twabaranduye imitima.