Read Bibliya Yera 1951 Yosuwa 21 Bible Online

Yosuwa 21 - Bibliya Yera 1951 bible

Yosuwa 21

¹Maz’ abakuru b’amazu ya ba sekuruza b’Abalewi baza kuri Eleyazari umuherezi na Yosuwa mwene Nuni n’abakuru b’ amazu ya ba sekuruza b’imiryango y’Abisirayeli,

²aho bāri bari nyene i Shilo mur’ ico gihugu c’i Kanani, barababarira, bat’ Uhoraho yatumye Mose, avuga ko tuzohabga ibisagara vyo kubamwo, hamwe n’amaragiro inyuma yavyo y’amasho yacu.

³Nukw Abisirayeli baha Abalewi mu mashamvu yabo ibi bisagara hamwe n’amaragiro ar’ inyuma yavyo, nk’uk’ Uhoraho yavuze.

⁴Ubupfindo bushika ku mazu y’ Abakohati; maz’ abuzukuruza ba Aroni umuherezi, bo mu muryango w’Abalewi nyene, ubupfindo bubaha ibisagara cumi na bitatu, bikūwe ku vy’umuryango w’Abayuda no ku vy’uw’ Abasimeyoni no ku vy’uw’ Ababenyamini.

⁵Abasigaye mu Bakohati ubupfindo bubaha ibisagara cumi, bikūwe ku vy’amazu y’umuryango w’Abefurayimu no ku vy’uw’ Abadani no ku vy’igihimba c’umuryango w’Abamanase.

⁶Abagerushoni ubupfindo bubaha ibisagara cumi na bitatu, bikūwe ku vy’amazu y’umuryango w’Abisakari no ku vy’uw’ Abasheri no ku vy’uw’ Abanafutali no ku vy’ikindi gihimba c’umuryango w’Abamanase i Bashani.

⁷Abamerari bahabga ibisagara cumi na bibiri, nk’ukw amazu yabo ari, bikūwe ku vy’umuryango w’ Abareyubeni no ku vy’uw’ Abagadi no ku vy’uw’ Abazebuloni.

⁸Ibisagara Abisirayeli bāhesheje Abalewi ubupfindo, hamwe n’ amaragiro yavyo, nk’uk’ Uhoraho yabivuze atumye Mose, vyar’ ibi:

⁹ku vy’umuryango w’Abayuda no ku vy’uw’ Abasimeyoni batanga ibi bisagara bigiye kudōndwa amazina,

¹⁰ngo bibe ivy’ ab’ inzu ya Aroni, imwe mu mazu y’Abakohati, bo mu muryango w’Abalewi, kukw ari bo ubupfindo bgabanje kwerekana.

¹¹Nuko babaha Igisagara ca Araba,[8] ari ho Heburoni, mu mugamba w’Abayuda, hamwe n’amaragiro ahakikije; (Araba uwo ni we se wa Anaki).

¹²Arikw indimiro zo kur’ ico gisagara, n’imihana ihakūkira, babiha Kalebu mwene Yefune kuba ishamvu yiwe.

¹³Nukw ab’inzu ya Aroni umuherezi ni kwo kubaha i Heburoni nyene, bo n’amaragiro yaho; kandi car’ igisagara c’ubuhungiro bg’uwishe uwundi; babaha n’i Libuna,

¹⁴n’i Yatiri n’i Eshitemowa,

¹⁵n’i Holoni n’i Debira,

¹⁶n’i Ayini n’i Yuta n’i Beti‐shemeshi, bo n’amaragiro bigendanye; vyar’ ibisagara cenda bivuye mur’ iyo miryango ibiri.

¹⁷Kandi ku vy’ umuryango w’Ababenyamini batanga Gibeyoni n’i Geba,

¹⁸n’i Anatoti n’i Alunoni, bo n’amaragiro bigendanye; vyar’ ibisagara bine.

¹⁹Ibisagara vyose na vyose vy’ab’ inzu ya Aroni, ari bo baherezi, vyar’ icumi na bitatu, hamwe n’amaragiro bigendanye.

²⁰Abalewi bo mu yandi mazu y’Abakohati asigaye, ibisagara bāhawe n’ubupfindo vyākūwe ku vy’umuryango w’Abefurayimu.

²¹Babaha Shekemu n’amaragiro yaho mu mugamba w’Abefurayimu nyene, kandi car’ igisagara c’ubuhungiro bg’uwishe uwundi; babaha n’i Gezeri,

²²n’i Kibuzayimu n’i Beti‐horoni, bo n’amaragiro bigendanye; vyar’ ibisagara bine.

²³Ku vy’umuryango w’ Abadani babaha Eliteke n’i Gibetoni,

²⁴n’i Ayaloni n’i Gati‐rimoni, bo n’amaragiro bigendanye; vyar’ ibisagara bine.

²⁵Ku vy’igihimba c’umuryango w’Abamanase babaha Tanaki n’amaragiro yaho, n’i Gati‐rimoni n’amaragiro yaho, ivyo bisagara ukw ari bibiri.

²⁶Ibisagara vyose na vyose vy’amazu asigaye y’Abakohati vyar’ icumi, hamwe n’amaragiro bigendanye.

²⁷ Abagerushoni bo mu mazu y’ Abalewi, ku vy’igihimba c’umuryango w’Abamanase babaha Golani i Bashani n’amaragiro yaho; car’ igisagara c’ubuhungiro bg’ uwishe uwundi; babaha n’i Beshitera n’amaragiro yaho; ivyo bisagara ukw ari bibiri.

²⁸Ku vy’umuryango w’Abisakari babaha Kishiyoni n’i Daberati,

²⁹n’i Yaramuti n’i Eni‐ganimu, bo n’ amaragiro bigendanye; vyar’ ibisagara bine.

³⁰Ku vy’umuryango w’Abasheri babaha Mishali n’i Abudoni,

³¹n’i Helikati n’i Rehobu, bo n’amaragiro bigendanye; vyar’ ibisagara bine.

³²Ku vy’umuryango w’Abanafutali babaha Kedeshi i Galilaya n’ amaragiro yaho; car’ igisagara c’ ubuhungiro bg’uwishe uwundi; babaha n’i Hamoti‐dora n’amaragiro yaho, n’i Karitani n’amaragiro yaho; vyar’ ibisagara bitatu.

³³Ibisagara vyose na vyose vy’Abagerushoni, nk’ukw amazu yabo ari, vyar’ icumi na bitatu, hamwe n’amaragiro bigendanye.

³⁴Amazu y’Abamerari, ari bo Balewi bāsigaye guhabga, babaha ku vy’umuryango w’Abazebuloni ahitwa Yokineyamu n’i Karita,

³⁵n’i Dimuna n’i Nahalali, bo n’ amaragiro bigendanye; vyar’ ibisagara bine.

³⁶Ku vy’umuryango w’Abareyubeni babaha Beseri n’i Yahasi,

³⁷n’i Kedemoti n’i Mefati, bo n’amaragiro bigendanye; vyar’ ibisagara bine.

³⁸Ku vy’umuryango w’Abagadi babaha Ramoti i Gileyadi n’amaragiro yaho; car’ igisagara c’ubuhungiro bg’uwishe uwundi; babaha n’i Mahanayimu,

³⁹n’i Heshiboni n’i Yazeri, bo n’amaragiro bigendanye; vyar’ ibisagara bine.

⁴⁰Ivyo vyose vyar’ ibisagara vy’ Abamerari, nk’ukw amazu yabo ari, ari yo mazu yar’ agisigaye guhabga mu y’Abalewi; ubupfindo bgabahaye ivyo bisagara ukw ar’ icumi na bibiri.

⁴¹Ibisagara Abalewi bāhawe mu mashamvu y’Abisirayeli bandi, vyose na vyose vyari mirongwine n’umunani, hamwe n’amaragiro bigendanye.

⁴²Ivyo bisagara vyose vyari bikikijwe n’amaragiro yavyo; vyose iyo biva bikagera ni ko vyari bimeze.

⁴³Uko ni k’Uhoraho yahaye Abisirayeli bose igihugu yasezeraniye ba sekuruza, ni ko bācegukiye, bakibamwo.

⁴⁴Uhoraho abaha impore impande zose, nk’uko yarahiye ba sekuruza muri vyose; nta muntu n’umwe mu bansi babo yigeze kubahagarara imbere, arik’ Uhoraho yagenda agabura abansi babo bose mu maboko yabo.

⁴⁵Nta kintu na kimwe mu vyiza vyose Uhoraho yasezeraniye ab’ inzu ya Isirayeli kitāshitse: ariko vyose vyarasohoye.