Read Bibliya Yera 1951 Yosuwa 23 Bible Online

Yosuwa 23 - Bibliya Yera 1951 bible

Yosuwa 23

¹Hashize igihe kirekire, Uhoraho ahaye Abisirayeli impore, abakijije abansi babo bose bari babakikije; kandi Yosuwa yar’ ashaje, ageze mu zabukuru;

²Yosuwa ahamagaza Abisirayeli bose, abashingantahe babo n’abakuru, n’abacamanza babo n’abagabisha b’ingabo, arababarira, ati Rāba ndashaje, ngeze mu zabukuru.

³Kandi mwabonye ivyo Uhoraho yagiriye ayo mahanga yose kubganyu; kuk’ Uhoraho Imana yanyu ari we yagenda abarwanira.

⁴None rāba amahanga agisigaye, hamwe n’amahanga yose naranduye, nabahesheje ubupfindo ibihugu vyabo ngo bibe amashamvu y’imiryango yanyu, uhereye kuri Yorodani ugashitsa ku kiyaga kinini gihera i burengerazuba.

⁵Kand’ Uhoraho Imana yanyu azobakinagiza imbere yanyu, abirukane babave imbere, muheze mubone kwegukira igihugu cabo, nk’uk’ Uhoraho Imana yanyu yababgiye.

⁶Nuko rero ni mugumye imitima, mushikame, mubone kwitondera no gushitsa ivyanditswe vyose mu gitabo c’ivyagezwe vya Mose, kugira ngo ntimukikamire i buryo cank’ i bumoso, ngo mubiveko,

⁷mukifatanya n’ayo mahanga agisigaye muri mwebge, canke ngo mushire mu kanwa amazina y’imana zabo, canke ngo muzirahire, canke ngo muzisabe, canke ngo muzunamire;

⁸ariko muze mwifatanye akaramata n’Uhoraho Imana yanyu, nk’uko mwakoze kugeza ubu.

⁹Kuk’ Uhoraho yirukanye imbere yanyu amahanga ahambaye afise amagara; ariko mwebge nta muntu n’umwe yigeze kubahagarara imbere gushitsa ubu;

¹⁰arik’ umwe muri mwebge akinagiza abantu igihumbi, kuk’ Uhoraho Imana yanyu ari we abarwanira, nk’uko yababgiye.

¹¹Mugire umwete cane wo kubera maso ubugingo bganyu, kugira ngo mukunde Uhoraho Imana yanyu.

¹²Ariko ni mwahīrahīra mukarāba irya, mukīfatanya n’aya mahanga asigaye muri mwebge, mugashingirana na bo, mukābīra abageni babo, na bo bakābīra abanyu,

¹³mumenye rwose yuk’ Uhoraho Imana yanyu atazosubira kwirukana ayo mahanga ngw ayabakūre imbere, ariko bazobabera ururiba n’umutego, bababere nk’ikimōko kibakubita mu mbavu, nk’amahwa abahanda mu maso, kugeza aho muzorandukira, mugashira mur’ iki gihugu ciza Uhoraho Imana yanyu yabahaye.

¹⁴Rāba ubu ngiye kugenda nk’ ukw abandi bose bagenda; namwe mu mitima yanyu no mu vyiyumviro vyanyu murazi neza mwese yukw ata kintu na kimwe mu vyiza vyose Uhoraho Imana yanyu yabasezeraniye kitāshitse; vyose vyarasohoye, nta kintu na kimwe muri vyo kitāshitse.

¹⁵Nk’ ukw ivyiza vyose Uhoraho Imana yanyu yabasezeraniye vyāshitse, uko ni k’Uhoraho azobashitsakw ivyago vyose yababūriye, kugeza ah’ azobaherengetereza, mugashira mur’ iki gihugu ciza mwahawe n’ Uhoraho Imana yanyu,

¹⁶ni mwaca mw isezerano ryiwe yabasezeraniye, mukaja gusaba izindi mana, mukazūnamira. Uburake bg’Uhoraho buzoca bubaziriringira, muranduke bidatevye, mushire mu gihugu ciza yabahaye.