Read Bibliya Yera 1951 Yosuwa 3 Bible Online

Yosuwa 3 - Bibliya Yera 1951 bible

Yosuwa 3

¹Bukeye Yosuwa arazinduka, avana i Shitimu n’Abisirayeli bose, bashika kuri Yorodani, barāra batajabutse.

²Hashize imisi itatu, abagaba abantu banyuranganya aho bashagaje,

³babarira abantu, bati Ni mwabona isandugu y’isezerano ry’Uhoraho Imana yanyu ireruwe n’abaherezi ari bo Balewi, muze muce muhaguruka muve aho muri, muyikurikire,

⁴kugira ngo mumenye inzira mukwiye kujana, kuko mutigeze guca mur’ iyi nzira. Mugabo, hagati yanyu na yo haze hasigare ikirere c’intambuko igihumbi;[2] ntimuze muyēgēre.

⁵Maze Yosuwa abarira abantu, ati Ni mwiyeze, kukw ejo Uhoraho azokora ibitangaza muri mwebge.

⁶Yosuwa araheza abarira abaherezi, ati Ni murerure isandugu y’ isezerano, mwītangire imbere y’ abantu mu kujabuka. Nuko barerura iyo sandugu, bītangira imbere y’abantu.

⁷Maz’ Uhoraho abarira Yosuwa, at’ Uyu musi ngira ntangure kugukuza imbere y’Abisirayeli bose, kugira ngo bamenye yuko ndi kumwe nawe nk’uko nāmana na Mose.

⁸Kand’ ubarire abaherezi bareruye isandugu y’isezerano, uti Ni mwashika ah’ amazi ya Yorodani agarukira, muyashōreremw’ ibirenge, muhagararemwo.

⁹Yosuwa abarira Abisirayeli, ati Ni mwigire hano, mwumve amajambo y’Uhoraho Imana yanyu.

¹⁰Araheza aravuga, at’ Iki ni co kigira kibamenyeshe yukw Imana nzima iri muri mwebge, kandi yukw itazobura kwirukana Abanyakanani imbere yanyu, bo n’ Abaheti n’Abahiwi n’Abaferizi n’Abagirugashi n’Abamori n’Abayebusi.

¹¹Ehe rāba, isandugu y’isezerano ry’Uhoraho Nyen’ isi yose igira ibītangire imbere mu kuja muri Yorodani.

¹²Nuko ni murobanure abantu cumi na babiri mu miryango y’Abisirayeli, mu muryango wose havemw’ umuntu umwe‐umwe.

¹³Maz’ abaherezi barerura isandugu y’ Uhoraho Nyen’ isi yose ni bashinga ibirenge mu mazi ya Yorodani, amazi yarwo ava ruguru aca yīmīrwa, yirundanye.

¹⁴Nukw abantu bashīngūra amahema yabo, kugira ngo bajabuke Yorodani, kand’ abaherezi bareruye isandugu y’isezerano babītangira imbere.

¹⁵Nukw abo baherezi bareruye iyo sandugu bashika kuri Yorodani, maze bagishōrera ibirenge vyabo ah’amazi agarukira (kuko mu gihe c’iyimbura, Yorodani rwama rurenga inkombe zarwo),

¹⁶amazi ava ruguru aca arīmīrwa, yirundaniriza aharinganiye n’igisagara citwa Adamu kibangikanye n’i Saretani, kure y’aho bagomba kujabukira, kand’ ayo hepfo atembera mu kiyaga co mu kiyaya citwa Araba, ari co Kiyaga c’Umunyu, arakamuka. Nukw abantu barajabuka batumbereye i Yeriko.

¹⁷Abaherezi bareruye isandugu y’isezerano ry’Uhoraho bahagarara muri Yorodani hūmūtse, maz’ Abisirayeli bose bajabukira ahūmūtse, kugeza ah’ abantu bose barangirije kujabuka Yorodani.